Genişmiqyaslı infrastruktur layihələri həyata keçirilir

Bakı:

28 °C

57 %

2 m/s

Əlaqə

AZ RU EN

Ana səhifə / YAP xəbərləri / Genişmiqyaslı infrastruktur layihələri həyata keçirilir

Genişmiqyaslı infrastruktur layihələri həyata keçirilir

19.06.2026 [15:40]

Azərbaycanın müasir tarixinin ən şərəfli və strateji mərhələsi olan işğaldan azad edilmiş ərazilərin bərpası prosesi öz miqyasına, tempinə və strateji əhəmiyyətinə görə dünyada analoqu olmayan bir layihədir. 2020-ci il Vətən müharibəsində əldə olunan tarixi zəfərdən dərhal sonra, dövlətimiz tərəfindən həyata keçirilən genişmiqyaslı bərpa və yenidənqurma proqramı, təkcə dağıdılmış şəhər və kəndlərin abadlaşdırılması deyil, həm də keçmiş məcburi köçkünlərin öz doğma yurdlarına layiqli qayıdışını təmin edən qlobal bir missiyadır.

Bərpa prosesinin ən mühüm istiqaməti müasir infrastrukturun yaradılmasıdır. Dövlət büdcəsindən ayrılan 15 milyard ABŞ dollarından artıq vəsaitin əsas hissəsi məhz bu təməl sütunlara - yolların, elektrik şəbəkələrinin, su anbarlarının və yaşayış massivlərinin tikintisinə sərf edilib. Ümumilikdə 17 milyard ABŞ dollarına yaxın investisiya həcmi, regionun iqtisadi potensialının tam şəkildə reallaşdırılması üçün atılan fundamental addımdır.

Bu investisiyalar çərçivəsində inşa edilən beynəlxalq səviyyəli hava limanları Füzuli, Zəngilan və Laçın - regionu nəinki ölkəmizin digər bölgələri, həm də beynəlxalq nəqliyyat-logistika şəbəkəsi ilə birləşdirən "hava qapıları"na çevrilib. Eyni zamanda, "ağıllı şəhər" və "ağıllı kənd" konsepsiyaları əsasında inşa olunan yaşayış məntəqələri, qabaqcıl texnologiyaların tətbiqi ilə ekoloji cəhətdən dayanıqlı və müasir yaşayış mühiti formalaşdırır.

İnfrastrukturun yaradılması prosesin bir tərəfidirsə, digər tərəfi həmin ərazilərin yenidən məskunlaşması və insanların orada həyatına davam etməsidir. Hazırda 90 minə yaxın insanın Qarabağ və Şərqi Zəngəzurda yaşaması, çalışması və təhsil alması, regionun sosial həyatının tamamilə bərpa olunduğunu göstərir.

Bu rəqəmlər sadəcə statistika deyil, bu, məcburi köçkünlərin öz yurdlarına qayıdışının sevincini, minlərlə şagirdin yenidən inşa edilmiş müasir məktəblərdə təhsil almasını, müxtəlif müəssisələrdə minlərlə yeni iş yerinin yaradılmasını əks etdirir. Regionun iqtisadi müstəqilliyi və dayanıqlı inkişafı üçün sahibkarlara yaradılan şərait, vergi güzəştləri və investisiya təşviqləri yerli istehsalın və xidmət sektorunun sürətlə inkişafına təkan verir.

Azərbaycanın işğaldan azad edilmiş ərazilərdə apardığı bərpa işlərinin ən diqqətçəkən xüsusiyyətlərindən biri də "Yaşıl enerji" zonasının yaradılmasıdır. Qarabağ və Şərqi Zəngəzurun təbii potensialı su, günəş və külək enerjisi regionu ölkənin enerji təhlükəsizliyində mühüm bir mərkəzə çevirir. "Yaşıl enerji" proqramları təkcə daxili tələbatı ödəməyəcək, həm də Azərbaycanın ixrac potensialını artıraraq, Avropanın enerji təhlükəsizliyinə töhfə verəcək.

Bərpa prosesi zamanı ətraf mühitə vurulan ziyanın aradan qaldırılması, meşə zolaqlarının bərpası və çayların ekosisteminin qorunması dövlətin prioritetidir. "Yaşıl dünya" naminə həyata keçirilən layihələr, regionun turizm potensialını da gücləndirir. Şuşa şəhərinin mədəniyyət paytaxtı kimi dirçəldilməsi, tarixi-mədəni abidələrin bərpası bölgənin dünya miqyasında turistlər üçün cəlbedici məkana çevrilməsini təmin edir.

Qarabağ və Şərqi Zəngəzurun bərpası, Azərbaycan dövlətinin və xalqının sarsılmaz iradəsinin təzahürüdür. 17 milyard dollarlıq investisiya, sadəcə binaların və yolların tikintisi deyil, eyni zamanda Azərbaycanın gələcəyinin fundamentidir. Regionda aparılan işlər, müharibədən çıxmış bir ərazinin qısa müddətdə necə inkişaf və rifah mərkəzinə çevrilə biləcəyinin ən parlaq nümunəsidir.

Bu gün biz, Qarabağ və Şərqi Zəngəzurun timsalında, Azərbaycanın yeni inkişaf modelini görürük. Bu model, innovasiya, əməksevərlik və milli ruhun vəhdətindən doğan bir müvəffəqiyyət hekayəsidir. İşğaldan azad edilmiş ərazilər, yaxın gələcəkdə regionun ən müasir, firavan və dayanıqlı inkişaf edən bölgələrindən biri olmaqla, Azərbaycanın iqtisadi və sosial tərəqqisinə yeni bir enerji qatacaq.

Şamo Qasımov

Yeni Azərbaycan Partiyası Laçın rayon təşkilatının sədr müavini

Paylaş:

Baxılıb: 360 dəfə