Mətbuat Şurasının Şikayətlər üzrə Komissiyasının iclası keçirilib

Bakı:

20 °C

73 %

4 m/s

Əlaqə

AZ RU EN

Ana səhifə / Sosial / Mətbuat Şurasının Şikayətlər üzrə Komissiyasının iclası keçirilib

Mətbuat Şurasının Şikayətlər üzrə Komissiyasının iclası keçirilib

18.10.2014 [11:03]

Dünən Azərbaycan Mətbuat Şurasının Şikayətlər üzrə Komissiyasının iclası keçirilib. İclasda Gəncə Ağır Cinayətlər Məhkəməsinin “Azadlıq” və “Yeni Müsavat” qəzetlərində, həmçinin, “Azpolitika.info” saytında 2014-cü ilin əvvəlindən başlayaraq gedən bir sıra materiallarla bağlı müraciətinə, Azərbaycan Respublikasının Milli Məclisinin deputatı İqbal Məmmədovun “dia.az” saytı ilə əlaqədar şikayətinə baxılıb, “pia.az” saytının fəaliyyətindəki narazılıq doğuran cəhətlər ətrafında müzakirələr aparılıb.
İclasda öncə Azərbaycan Respublikasının Milli Məclisinin deputatı İqbal Məmmədovun “dia.az” saytı ilə əlaqədar şikayəti araşdırılıb.
Şikayətlər üzrə Komissiya müzakirələrdən sonra belə rəyə gəlib ki, məsələnin məğzində jurnalistin konkret təmənnanın ödənilmədiyi təqdirdə öz peşə səlahiyyətlərindən sui-istifadəyə yol verməsi dayanır. Belə hallar isə qələmə alınmış materialın obyektivliyinə şübhə yaradır. Saytın rəhbəri M.Ərsoy Şikayətlər üzrə Komissiyanın iclasına qatılmadığından cavabdeh tərəf kimi yazdığını əsaslandırmır. Belə olan halda, məsələnin Şuranın “Reket jurnalistika”ya qarşı Mübarizə Komissiyasında araşdırılması zərurəti yaranır.
Eyni rəy “pia.az” saytı barədə də çıxarılıb. Bu zaman sözügedən internet xəbər portalının fəaliyyəti ilə bağlı Şuraya son zamanlar daxil olmuş müraciətlərdə ifadə olunan motivlər əsas götürülüb. Şuranın “pia.az” saytı ilə əlaqədar yekun qərarının “Reket jurnalistika”ya qarşı Mübarizə Komissiyasının rəyinə əsaslanmasının vacibliyi önə çəkilib.
İclasda müzakirə edilən sonuncu məsələ Gəncə Ağır Cinayətlər Məhkəməsinin “Azadlıq” və “Yeni Müsavat” qəzetlərində, həmçinin, “Azpolitika.info” saytında 2014-cü ilin əvvəlindən başlayaraq gedən bir sıra materiallarla bağlı müraciəti olub. Cavabdeh tərəf qismində “Yeni Müsavat” qəzetinin hüquqşünası Vaqif Hüseynov və “Azpolitika.info” saytının rəhbəri Elnur Məhərrəmli iştirak edib. Onların hər ikisi məsələ ilə bağlı mövqelərini bildiriblər.
Mətbuat Şurasının Şikayətlər üzrə Komissiyası belə rəyə gəlib ki, “Azadlıq”, “Yeni Müsavat” qəzetləri və “Azpolitika.info” saytı “Azərbaycan Jurnalistlərinin Peşə Davranışı Qaydaları”nın “Şərəf və ləyaqətin qorunması, şəxsi həyatın toxunulmazlığı” adlı 3-cü prinsipinin 3.10-cu bəndinin “cinayət əməli törətməsi ilə bağlı şəxsə qarşı ittiham irəli sürülmüşsə, bu mövzuda məhkəmənin obyektivliyinə təsir göstərəcək reportajlar hazırlanmamalı, hazırlanan reportajlarda isə bütün tərəflərin fikirləri əks olunmalıdır” tələbini pozub. Həmçinin, bu tələbin gözlənilməməsi AJPDQ-nın “Həqiqətə xidmət, dəqiqlik və obyektivlik” adlı 1-ci prinsipinin “jurnalistikanın ali məqsədi həqiqəti yaymaqdır, obyektivlik isə əsas peşəkarlıq meyarıdır” tələbinin pozulmasına da səbəb olub. Buna görə də, “Azadlıq”, “Yeni Müsavat” qəzetlərinə və “Azpolitika.info” saytına Azərbaycan Mətbuat Şurası tərəfindən xəbərdarlıq edilir. Komissiya həm bu KİV-ləri, eləcə də müraciətdə adı çəkilməyən, ancaq oxşar yazıların verildiyi digər media orqanlarını materiallarında ölkə qanunvericiliyinin tələblərinə riayət etməyə çağırır, onlara cəmiyyətdə çaşqınlıq yaratma ehtimalı yüksək olan, ədalət mühakiməsinin, bu və ya digər məsələ ilə bağlı yekun qərarına təsir göstərə biləcək məqamları gündəmə gətirməkdən uzaq durmağı, yaradıcılıq nümunələri hazırlayarkən həssas davranmağı tövsiyə edir.

Paylaş:

Baxılıb: 935 dəfə