Şuşadan dünyaya ünvanlanan mühüm mesajlar

Bakı:

25 °C

57 %

7 m/s

Əlaqə

AZ RU EN

Ana səhifə / YAP xəbərləri / Şuşadan dünyaya ünvanlanan mühüm mesajlar

Şuşadan dünyaya ünvanlanan mühüm mesajlar

15.07.2026 [16:31]

2026-cı il iyulun 13-də Şuşa şəhərində keçirilən IV Şuşa Qlobal Media Forumu müasir informasiya məkanında baş verən qlobal dəyişikliklərin müzakirə olunduğu ən nüfuzlu beynəlxalq platformalardan biri kimi yadda qaldı. Dünyanın müxtəlif ölkələrindən media nümayəndələrinin, ekspertlərin və beynəlxalq təşkilatların təmsilçilərinin iştirak etdiyi forum bir daha göstərdi ki, Azərbaycan artıq təkcə regionun deyil, həm də qlobal informasiya gündəliyinin formalaşmasına töhfə verən dövlətlər sırasındadır.

Forum çərçivəsində Azərbaycan Respublikasının Prezidenti cənab İlham Əliyevin çıxışı xüsusi maraq doğurdu. Dövlət başçısı beynəlxalq münasibətlər sistemində baş verən dəyişikliklər, media mühitində yeni çağırışlar, dezinformasiya ilə mübarizə, rəqəmsal transformasiya və regionda davamlı sülhün təmin olunması istiqamətində Azərbaycanın mövqeyini aydın və əsaslandırılmış şəkildə beynəlxalq auditoriyaya çatdırdı.

Prezident İlham Əliyevin çıxışında diqqət çəkən əsas məqamlardan biri həqiqətə söykənən informasiya siyasətinin əhəmiyyətinin xüsusi vurğulanması idi. Müasir dövrdə informasiya təhlükəsizliyi milli təhlükəsizliyin ayrılmaz tərkib hissəsinə çevrilib. Bu baxımdan media nümayəndələrinin peşəkarlığı, obyektivliyi və məsuliyyəti cəmiyyətlərin düzgün məlumatlandırılması və beynəlxalq etimadın möhkəmləndirilməsi baxımından mühüm rol oynayır.

Şuşa şəhərinin belə mötəbər beynəlxalq tədbirə ev sahibliyi etməsi isə xüsusi rəmzi məna daşıyır. Azərbaycan xalqının mədəniyyət paytaxtı olan Şuşa artıq təkcə tarixi və mədəni irsin deyil, eyni zamanda beynəlxalq dialoq, əməkdaşlıq və fikir mübadiləsinin mühüm mərkəzinə çevrilib. Burada keçirilən beynəlxalq forumlar Azərbaycanın azad edilmiş ərazilərdə həyata keçirdiyi genişmiqyaslı bərpa və quruculuq işlərinin dünya ictimaiyyətinə nümayiş etdirilməsi baxımından da böyük əhəmiyyət kəsb edir.

Prezident İlham Əliyev forumda çıxışı zamanı Azərbaycanın xarici siyasət kursunun əsas prioritetlərinə də toxunaraq bildirdi ki, ölkəmiz qarşılıqlı hörmətə, beynəlxalq hüququn norma və prinsiplərinə əsaslanan əməkdaşlığın tərəfdarıdır. Azərbaycanın təşəbbüsü ilə həyata keçirilən regional layihələr, nəqliyyat və enerji dəhlizləri, iqtisadi əməkdaşlıq platformaları ölkəmizin etibarlı tərəfdaş kimi nüfuzunu daha da artırır.

Dövlət başçısının çıxışında media sahəsində süni intellektin tətbiqi, rəqəmsallaşmanın sürətlənməsi və informasiya manipulyasiyalarına qarşı mübarizənin gücləndirilməsi məsələlərinə toxunulması da müasir dövrün reallıqlarına verilən mühüm qiymət kimi dəyərləndirilə bilər. İnformasiya texnologiyalarının sürətlə inkişaf etdiyi bir zamanda media nümayəndələrinin məsuliyyəti daha da artır və cəmiyyətlərin düzgün məlumatlandırılması qlobal sabitliyin vacib amillərindən birinə çevrilir.

Bu gün Azərbaycan Prezident İlham Əliyevin rəhbərliyi ilə beynəlxalq münasibətlər sistemində etibarlı tərəfdaş, sözünə və öhdəliklərinə sadiq dövlət kimi tanınır. IV Şuşa Qlobal Media Forumu da bir daha nümayiş etdirdi ki, ölkəmiz qlobal informasiya məkanında dialoqun təşviqi, həqiqətin müdafiəsi və beynəlxalq əməkdaşlığın genişləndirilməsi istiqamətində mühüm təşəbbüslərlə çıxış edir.

Şuşadan dünyaya ünvanlanan bu mesajlar Azərbaycanın artan beynəlxalq nüfuzunun, milli maraqlara əsaslanan müstəqil siyasətinin və gələcəyə hesablanmış inkişaf strategiyasının növbəti təsdiqi kimi tarixə düşdü. Bu baxımdan IV Şuşa Qlobal Media Forumu təkcə media sahəsinə həsr olunmuş beynəlxalq tədbir deyil, həm də Azərbaycanın müasir dünyada artan siyasi, diplomatik və informasiya gücünün nümayişi oldu.

Fidan Hüseynova
YAP Quba rayon təşkilatının sədri

Paylaş:

Baxılıb: 502 dəfə