Şəkidə “İşığın düşmə bucağı” sənədli filminin təqdimatı keçirilib

Bakı:

26 °C

51 %

2 m/s

Əlaqə

AZ RU EN

Ana səhifə / Sosial / Şəkidə “İşığın düşmə bucağı” sənədli filminin təqdimatı keçirilib

Şəkidə “İşığın düşmə bucağı” sənədli filminin təqdimatı keçirilib

13.09.2014 [10:51]

Sentyabrın 12-də Şəki şəhərindəki “Şəki saray” hotelində Azərbaycanda ilk qadın nəşri olan “İşıq” qəzetinə həsr olunmuş “İşığın düşmə bucağı” sənədli filminin təqdimatı keçirilib.
AzərTAc xəbər verir ki, mərasimdə çıxış edən Azərbaycan Mətbuat Şurasının (MŞ) sədri Əflatun Amaşov təqdimatı keçirilən filmin rəhbərlik etdiyi qurumun milli mətbuat tariximizdə önəmli rolu olan mətbu nəşrlər, eləcə də tarixi şəxsiyyətlərlə bağlı çəkdiyi “Milli mətbuatımız, istiqlal yolumuz” silsiləsindən növbəti ekran əsəri olduğunu bildirib.
İndiyədək şuranın “O film” studiyası ilə birgə layihəsinin məhsulu olaraq görkəmli mütəfəkkirlər Məhəmməd Əmin Rəsulzadənin və Əli bəy Hüseynzadənin həyat və fəaliyyətindən bəhs edən filmlərin ərsəyə gətirildiyini deyən Ə.Amaşov götürülmüş xəttin davamlı olacağını vurğulayıb.
MŞ-nin sədri təqdimatı keçirilən filmin həsr olunduğu “İşıq” qəzeti ilə bağlı məlumat verərək bildirib ki, mətbu orqan XX əsrin əvvəllərində cəmiyyətdə maarifçilik ideyalarının yayılmasında müstəsna rol oynayıb. Ə.Amaşov qeyd edib ki, həmin dövrdə Azərbaycanın ziyalıları və mətbuatı müsəlman qadınının azadlığı uğrunda mübarizə aparmaq kimi məsul vəzifəni üzərinə götürmüşdü. Qadınların təhsil, ailə-nikah, sosial problemlərinin ictimai şüura çatdırılması yolunda gərgin əmək sərf edilirdi. Bu, həmin vaxt olduqca çətin bir vəzifə idi.
“Nəşrin cəmi 68 nömrəsinin işıq üzü görməsinə baxmayaraq, o vaxtdan uzun illər keçsə də, “İşıq” örnəkdir. Qəzetin redaktoru Xədicə xanım Əlibəyova Azərbaycanda ilk qadın redaktor kimi tarixə düşüb”, - deyən Ə.Amaşov, həmçinin bu kimi mətbu orqanlar, eləcə də orada çalışan qadın jurnalistlərin həyat və yaradıcılığı ilə bağlı geniş araşdırmaların aparılmasına zərurət duyulduğunu diqqətə çatdırıb.
Şuranın sədri, həmçinin təqdimatı keçirilən filmdə X.Əlibəyovanın həyat və fəaliyyətinə geniş yer verildiyini vurğulayıb. O, həmçinin filmin təqdimatının X.Əlibəyovanın doğma yurdu olan Şəkidə təşkilinin rəmzi məna daşıdığını diqqətə çatdırıb. Bildirib ki, X.Əlibəyovanın maarifçilik fəaliyyətinin əhəmiyyətli qismi Şəki ilə bağlı olub.
Mərasimdə çıxış edənlər bildiriblər ki, “İşıq” qəzeti geniş imkanlara malik olmamasına, daimi işçi heyətinin məhdudluğuna baxmayaraq, Azərbaycan qadınının, bütövlükdə müsəlman qadın aləminin qarşısında duran problemlərin və onların həlli yollarının araşdırılmasında əvəzedilməz işlər görüb. Qəzet maarifçi ideyalarla gündəmə gəlib, qadınları öz taleyini düşünməyə səfərbər edib. Nəşrin redaktoru Xədicə xanım isə Həlimə xanım Axundova, Çayqıraqlı Həyat xanım, Tubu xanım Salatınzadə, Asya Axundova, Nabat Nərimanova kimi qadın müxbirlərin yetişməsində müstəsna pay sahibi olub.
Toplantıda “İşıq” qəzetinin cəmiyyətdə milli vətənpərvərlik ruhunun aşılanmasındakı müstəsna roluna dair maraqlı faktlar açıqlanıb. Bildirilib ki, qəzet anaları öz övladlarını Qafqaz İslam Ordusuna yazdırmağa çağırırdı. Vətən, müstəqillik uğrunda mübarizəni təlqin edirdi.
Mərasim iştirakçıları, həmçinin “İşıq” qəzetində irəli sürülən ideyaların Azərbaycan qadınının bu günü üçün də mühüm əhəmiyyət kəsb etdiyini vurğulayıblar.
Qeyd edək ki, “İşığın düşmə bucağı” sənədli filminin ideya müəllifi Azərbaycan Mətbuat Şurası idarə heyətinin üzvü, Milli Məclisin deputatı Cavanşir Feyziyev, layihənin rəhbəri MŞ-nin sədri Əflatun Amaşov, baş məsləhətçisi və ssenari müəllifi “O film” studiyasının rəhbəri, jurnalist Bəxtiyar Qaracadır.

Paylaş:

Baxılıb: 1038 dəfə