Sülh sazişi problemləri 100 faiz həll edəcəkmi?

Bakı:

16 °C

94 %

3 m/s

Əlaqə

AZ RU EN

Ana səhifə / Siyasət / Sülh sazişi problemləri 100 faiz həll edəcəkmi?

Sülh sazişi problemləri 100 faiz həll edəcəkmi?

26.12.2023 [10:50]

Sənəd normal qonşuluq münasibətlərinin əsasını qoyacaq

Nardar BAYRAMLI

44 günlük Vətən müharibəsində torpaqlarımızın işğaldan azad edilməsindən sonra Azərbaycan dövləti Cənubi Qafqaz regionunun sülh və əməkdaşlıq məkanına çevrilməsi üçün təşəbbüslərlə çıxış edib. Ermənistanla sülh sazişi imzalamaq təklifi də ilk olaraq Azərbaycan tərəfindən verilib. Münaqişə başa çatdıqdan sonra xalqımızın uzun illər ərzində məruz qaldığı əzab-əziyyətə, məhrumiyyətlərə və dağıntılara baxmayaraq, Azərbaycan tərəfindən Ermənistanla davamlı sülhün təmin edilməsi istiqamətində fəal iş aparılır. Məqsəd regionun sülh və əməkdaşlıq məkanına çevrilməsidir.

Xarici işlər naziri Ceyhun Bayramov da KİV-ə müsahibəsində bildirib ki, sülh müqaviləsi və proses ilə bağlı bütün əhəmiyyətli təşəbbüslərin müəllifi məhz Azərbaycan dövləti olub: “Ona görə biz sülhü real görürük”. Bu prosesin bir tərəfin istəyindən və arzusundan asılı olmadığını bildirən nazir deyib ki, burada hər iki tərəfə uyğun müvafiq addımların atılması önəmlidir. “Düşünürəm ki, 2024-cü ildə Ermənistan tərəfi ilə fiziki görüşlər keçiriləcək. 2023-cü ildə bir neçə dəfə belə görüşlər olmuşdu. Sonradan görüşlər sırasında fasilə baş verdi. Biz bu məsələyə çox real, nikbin baxırıq”,- deyən nazir əlavə edib ki, ki, bu sülh müqaviləsinə hər şeyin 100 faiz həlli demək olmaz. Bu, iki ölkə arasında münasibətlərin inkişaf etdirilməsinin əsasını yarada bilər. “Sülh müqaviləsi normal qonşuluq münasibətlərinin əsasının qoyulması, ölkələr arasındakı prinsipləri müəyyənləşdirən bir saziş ola bilər. Azərbaycan dövləti olaraq bizdən asılı olan bütün addımları atacağıq”, - deyə o vurğulayıb.

Nazirin sözlərinə görə, son zamanlar, xüsusilə Azərbaycan bütün ərazilərində suverenliyini tam bərpa etməsindən sonra Ermənistanın siyasi rəhbərliyi tərəfindən səsləndirilən mesajları diqqətlə izlənilir: “Ancaq pozitiv mesajların və sözlərin verilməsi nə qədər önəmli olsa da, onların real işlərə transformasiya edilməsi ən önəmli məqamdır. Biz noyabrın sonunda Ermənistan tərəfindən sülh müqaviləsi ilə bağlı növbəti təkliflər paketini almışdıq, 1 ay ərzində bizim tərəfimizdən qarşı tərəfə işlənilmiş təkliflər paketi qaytarıldı. Bu proses gedir”.

Artıq Ermənistan XİN də Azərbaycan tərəfindən sülh sazişi ilə bağlı növbəti təkliflər paketi aldıqlarını təsdiqləyib. Məlumdur ki, sülh sazişi üzrə iki ölkənin xarici işlər nazirləri arasında altı görüş keçirilib. Bu görüşlərin biri Cenevrədə, ikisi Moskvada, üçü isə Vaşinqtonda baş tutub. Bundan başqa, tərəflər sülh sazişinin layihə üzrə işləri onlayn formada da həyata keçirirlər.

Bütövlükdə, əgər rəsmi İrəvan bölgədə sülh və təhlükəsizliyin təmin olunmasını istəyirsə, təxribatlardan çəkinməli, əsassız yerə Azərbaycanı ittiham etməməli və beynəlxalq ictimaiyyəti çaşdırmamalıdır. Ən doğru yol isə Ermənistanın üzərinə götürdüyü öhdəlikləri yerinə yetirməsi və Azərbaycanın sülh təşəbbüslərinə adekvat cavab verməlidir.

Paylaş:

Baxılıb: 517 dəfə