“Artsax” qalıqları Parisdə...

Ana səhifə / Siyasət / “Artsax” qalıqları Parisdə...

“Artsax” qalıqları Parisdə...

23.06.2022 [10:24]

Fransa niyə qondarma quruma qucaq açır?

Nicat Dilqəmli

Tarixin bütün dövrlərində Ermənistan hər zaman özünə himayədar axtarışında olub. Bu, onların siyasətinin ana xəttidir. Heç şübhəsiz, bir çox qabaqcıl dünya ölkələri Ermənistanın məkrli məqsədlərini başa düşür və buna görə də işğalçı dövləti özündən uzaqlaşdırır. İllərdir “böyük Ermənistan” xülyası ilə yaşayan mənfur düşmənin planları 44 günlük Vətən müharibəsinin parlaq nəticəsi ilə yerlə bir oldu. İndi Ermənistan dövləti başa düşür ki, bu illər ərzində xalqa danışdığı yalanların hesabatını vermək vaxtı gəlib çatıb. Eyni zamanda, Azərbaycanın regionda yaratdığı yeni reallıqları qəbul etmək bir o qədər asan olmasa da, buna məcburdur.

Ümumiyyətlə, dövlət sözünün Ermənistanla yanaşı işlədilməsi bir o qədər doğru deyil. Çünki müstəqil bir dövlətin daxili işinə heç bir qüvvə qarışa bilməz. Ermənistanın əsas ipləri isə həmişə havadarlarının əlində olub. Əvvəllər arxalandığı yerlərin güclü olduğunu düşündüklərinə görə onlar xəyallara dalıb gerçəkliyi unutmuşdular.

Azərbaycanın təklifləri ilə razılaşıb şad-xürrəm yaşamaq əvəzinə Ermənistan hələ də kimlərdənsə nələrsə umur, bütün qapıları döyür. Özlərinə yeni havadarlar tapmaq niyyəti ilə xaricə üz tuturlar. Yeri gəlmişkən, bu günlərdə “artsax parlamenti”nin “rəhbəri” Artur Tovmasyanın Parisdə peyda olması da bu məqsədə xidmət edir. O, bu ölkədə qeyri-qanuni fəaliyyətinə şərait yaradılmış qondarma qurumun “daimi nümayəndəsi” Hovhannes Gevorgyanla görüşüb. Məlumata görə, görüşdə 2020-ci ildə 44 günlük müharibə zamanı bəzi fransız siyasətçiləri tərəfindən göstərilən yardım və bunun davam etdirilməsinin zəruriliyi müzakirə edilib.

Bu kimi “səfərlərin” Bakıda etirazlar doğurmasına baxmayaraq, Paris iddia edir ki, həmin şəxslərin səfəri fərdi xarakter daşıyır və Fransa hökumətinin bu səfərin təşkilində heç bir iştirakı olmur. Lakin belə bir formal izahat Fransanın niyyətini və siyasətini təmizə çıxarmaq üçün kifayət deyil. Çünki müharibədən sonra da qondarma rejimin nümayəndəliyinin Fransada “fəaliyyətini” davam etdirməsi regionda sülhə xidmət etmədiyi aydındır.

“Əfsuslar olsun ki, bu, Fransanın uzunmüddətli maraqlarına cavab vermir, regiondakı proseslərdə bu ölkənin iştirakını şübhə altında salır, eyni zamanda, Azərbaycan-Fransa münasibətlərinə mənfi təsir edir”.

Bu fikirləri “Yeni Azərbaycan”a açıqlamasında siyasi şərhçi İlqar Vəlizadə səsləndirib. Politoloq deyir ki, oradakı erməni diasporası Fransa siyasətində təsirli rola malikdir: “Fransa hökuməti bir çox hallarda Azərbaycanla və regionla bağlı olaylarda erməni diasporasının fikirləri ilə hesablaşır, onların sözü önəm daşıyır. Çünki hər seçki prosesində Erməni diasporasının aktivliyi bəzi siyasətçilərin qalib gəlməsinə imkanlar yaradır”.

İ.Vəlizadə bildirib ki, bu kimi hallara son qoyulmayınca heç bir təhlükəsizlik məsələsindən danışmaq düzgün sayılmaz: “Bu hal bir daha onu göstərir ki, separatçılara sərt münasibət aşılanmalıdır. Beynəlxalq hüquq normalarında bununla bağlı müvafiq bəndlər var, həmin qaydalar işləməlidir. Belə hallara son qoyulmalıdır. Çünki belə olduğu halda heç bir təhlükəsizlikdən, o cümlədən Avropa miqyaslı təhlükəsizlikdən danışmaq mümkün deyil”.

Paylaş:

Baxılıb: 109 dəfə

Xəbər lenti

Hamısına bax