İstanbul, ya da Antalya ...

Bakı:

21 °C

62 %

1 m/s

Əlaqə

AZ RU EN

Ana səhifə / Siyasət / İstanbul, ya da Antalya ...

İstanbul, ya da Antalya ...

22.04.2022 [10:06]

Türkiyə Rusiya və Ukrayna liderlərinin görüşünü təşkil etməyə hazırlaşır

Nardar BAYRAMLI

Türkiyə Rusiya-Ukrayna müharibəsinin dayandırılması üçün böyük fəallıq göstərir. Türkiyənin bu yöndə təşəbbüsləri müharibə aparan ölkələr tərəfindən də təqdir olunur. Rəsmi Ankara bölgədə sabitliyin təmin olunması üçün dəfələrlə Putin ilə Zelenskinin görüşünün təşkil olunmasına çalışıb. Hələ görüş baş tutmasa da, qardaş ölkə bu istiqamətdə səylərini davam etdirir. Belə ki, Türkiyənin xarici işlər naziri Mövlud Çavuşoğlu bildirib ki, Rusiya və Ukrayna liderləri arasında görüş hər an baş tuta bilər. “İki ölkə liderlərinin görüşü hazırda müzakirə olunur. Putinlə Zelenski arasında görüş baş tutsa, bu, İstanbulda və ya Antalyada ola bilər”, - deyə o vurğulayıb.

Ümumiyyətlə, belə bir görüş nə qədər realdır və onun nəticələri necə ola bilər? Məsələ ilə bağlı qəzetimizə açıqlama verən Milli Məclisin deputatı Ramil Həsən bildirib ki, Türkiyə böyük dövlətdir və bölgədə baş verən proseslərə təsir imkanları var. Onun sözlərinə görə, son illər Türkiyə regional güc kimi özünü təsdiq edib: “Yaxın Şərq böhranı ilə bağlı rəsmi Ankaranın oynadığı rol beynəlxalq birliyə çox yaxşı məlumdur. Hazırda isə Rusiya-Ukrayna müharibəsinin tezliklə bitməsi üçün Türkiyənin böyük fəallığı göz önündədir. Bir vacib məqam ondan ibarətdir ki, Türkiyənin təşəbbüslərinə müharibənin tərəfi olan hər iki ölkə etimad göstərir. Nəzərə alaq ki, ABŞ və Avropa İttifaqı ölkələri, eləcə də Böyük Britaniya Ukraynaya fəal dəstək verir. Bu da Rusiya tərəfindən qəbulolunmaz hesab edilir. Rusiyanı dəstəkləyən ölkələr isə Ukrayna tərəfindən qəbul olunmur. Amma qardaş Türkiyə iki ölkə arasında müharibənin bitməsi üçün heç bir maraq güdmədən, səmimi olaraq çalışır. Bu baxımdan, Rusiya və Ukrayna liderlərinin görüşünün Türkiyədə keçirilməsi daha realdır. Bilirsiniz ki, Türkiyə müharibədən əziyyət çəkən insanlara humanitar yardım göstərir, eləcə də onun vasitəçiliyi ilə münaqişə zonalarında dinc əhali üçün humanitar dəhlizlər açılıb. Antalya Diplomatiya Forumu çərçivəsində Rusiya və Ukrayna xarici işlər nazirlərinin görüşü keçirildi. Eyni zamanda, Rusiya və Ukrayna nümayəndə heyətlərinin İstanbulda keçirdiyi görüş sülh prosesinə müsbət təkan verdi. Rusiyanın Kiyev və Çerniqovda hərbi əməliyyatlarını əhəmiyyətli dərəcədə azaltmaq qərarı həqiqətən də mühüm addım idi və bu, İstanbul görüşünün nəticəsi idi. Amma sonradan müəyyən hadisələr bu müsbət addımların davamının qarşısını aldı. Bununla belə, rəsmi Ankara sülh təşəbbüslərini davam etdirir. Gündəmdə iki ölkə liderinin görüşünün təşkil olunmasıdır”.

Millət vəkili qeyd edib ki, Türkiyə Prezidenti Rəcəb Tayyib Ərdoğan daim Putin və Zelenski ilə təmasdadır: “Rəcəb Tayyib Ərdoğan və onun hökuməti bu prosesdə çox fəaldır. Rəsmi Ankara dəfələrlə bəyan edib ki, dövlət başçıları səviyyəsində keçiriləcək görüşə ev sahibliyi etməyə hazırdır. Məqsəd isə qan tökülməsinin qarşısını almaqdır. Liderlərin görüşü müharibəyə tamamilə son qoya bilər. Ona görə də, liderlərin görüşünün Türkiyədə keçirilməsi üçün aktiv iş aparılır. Beləliklə, qardaş Türkiyə sülhün əldə olunmasına vəsilə ola bilər”.

Paylaş:

Baxılıb: 684 dəfə