Azərbaycan və Türkiyə strateji tərəfdaş, müttəfiq ölkələrdir

Bakı:

30 °C

51 %

2 m/s

Əlaqə

AZ RU EN

Ana səhifə / Siyasət / Azərbaycan və Türkiyə strateji tərəfdaş, müttəfiq ölkələrdir

Azərbaycan və Türkiyə strateji tərəfdaş, müttəfiq ölkələrdir

14.08.2010 [09:06]

Mübariz Qurbanlı: Türkiyə Prezidenti Abdullah Gülün Azərbaycana gözlənilən səfəri münasibətlərimizin inkişafı baxımından böyük əhəmiyyət kəsb edir
“Azərbaycan və Türkiyə strateji tərəfdaş, müttəfiq ölkələrdir. Hər iki ölkənin maraqları o qədər bir-birinə yaxındır ki, bir dövlət digərinin maraqlarını həmişə diqqətdə saxlayır. Son vaxtlar baş verən hadisələrdə bir daha şahid olduq ki, Türkiyə və Azərbaycan bu bölgədə sülhə, sabitliyə nail olmaq üçün birgə səylər göstərirlər”. Bu fikirləri www.yap.org.az saytına açıqlamasında YAP İcra katibinin müavini, Milli Məclisin deputatı Mübariz Qurbanlı Türkiyə Prezidenti Abdullah Gülün Azərbaycana gözlənilən səfərinin əhəmiyyətini şərh edərkən deyib.
M.Qurbanlı bildirib ki, Türkiyə dövlətinin Ermənistanın Azərbaycana təcavüzü nəticəsində yaranmış Dağlıq Qarabağ problemində nə qədər həssas bir mövqedən çıxış etməsi ölkəmiz üsün böyük önəm kəsb edir. Türkiyənin bu məsələdəki mövqeyində hansısa bir dəyişikliyin baş vermədiyini müşahidə edirik.
“1993-cu ildə Ermənistan Kəlbəcəri işğal etdiyi vaxdan Türkiyə bu işğalçı dövlətlə diplomatik əlaqələrini dayandırıb. Bir daha vurğulamaq istərdim ki, bu məsələdə Türkiyə daim Azərbaycanı müdafiə edib. Və sərhədlərin açılması ilə bağlı Qərb tərəfdən nə qədər təzyiqlər olsa da, Ermənistanın işğalçılıq siyasətinə son qoymayınca sərhədləri açmayacağını bəyan edib”-deyə o, qeyd edib.
Azərbaycanın Türkiyə ilə münasibətləri daim diqqətdə saxladığını deyən YAP İcra katibinin müavini vurğulayıb ki, Ulu öndər Heydər Əliyevin “Bir millət, iki dövlət” tezisi bu gün də hər iki ölkədə əlaqələrin tənzimlənməsi və inkişafı üçün fundamental bir ideya kimi istifadə olunur. Onun sözlərinə görə, Prezident İlham Əliyevin yürütdüyü xarici siyasətdə Türkiyə ilə münasibətlər çox diqqətdə saxlanılan istiqamətdir və hər iki ölkənin münasibətlərinin inkişafı üçün Prezident İlham Əliyev xarici siyasət kursunda önəmli addımlar atır.
“Türkiyə və Azərbaycan dövlət rəhbərləri, rəsmi şəxsləri davamlı olaraq qarşılıqlı səfərlər edirlər. Təbii ki, bütün bunlarla yanaşı bizim münasibətlərimizin daha da inkişaf etdirilməsi, bölgədə yaranmış vəziyyət, beynəlxalq aləmdəkı vəziyyət və digər məsələlərin müzakirə edilməsi üçün Türkiyə və Azərbaycan rəhbərlərinin mütəmadi görüşlər keçirməsinə ehtiyac var. Prezident Abdullah Gülün Azərbaycana növbəti səfəri də iki qardaş dövlətin prezidentlər səviyyəsində cari məsələlərin müzakirə edilməsinin ehtiyacından irəli gəlir. Bu səfər gedişində Türkiyə - Azərbaycan münasibətləri, iqtisadi, siyasi və digər sahələr üzrə əməkdaşlıq məsələləri müzakirə ediləcək. Türkiyə mətbuatı Prezident Abdullah Gülün Azərbaycana səfərinə xüsusi diqqət ayırır, siyasi təhlillər verilir”, - deyən M.Qurbanlının fikrincə, bütövlükdə bu səfər mühüm hadisədir, münasibətlərimizin inkişafı baxımından xüsusi əhəmiyyət kəsb edir.

Paylaş:

Baxılıb: 1144 dəfə