AZƏRTAC-ın İdarə Heyəti sədrinin “İnformasiya yaradıcılığı: standartlar və yeni yanaşmalar” kitabı barədə Türkiyə mediasında geniş məlumat yayılıb

Bakı:

23 °C

54 %

1 m/s

AZ RU EN

Ana səhifə / Siyasət / AZƏRTAC-ın İdarə Heyəti sədrinin “İnformasiya yaradıcılığı: standartlar və yeni yanaşmalar” kitabı barədə Türkiyə mediasında geniş məlumat yayılıb

AZƏRTAC-ın İdarə Heyəti sədrinin “İnformasiya yaradıcılığı: standartlar və yeni yanaşmalar” kitabı barədə Türkiyə mediasında geniş məlumat yayılıb

30.03.2021 [09:06]

AZƏRTAC-ın İdarə Heyətinin sədri, Asiya və Sakit Okean Ölkələri İnformasiya Agentlikləri Təşkilatının (OANA) vitse-prezidenti Aslan Aslanovun Avrasiya Yazıçılar Birliyi (AYB) tərəfindən Ankarada türk dilində nəşr olunan “İnformasiya yaradıcılığı: standartlar və yeni yanaşmalar” kitabı barədə Türkiyənin kütləvi informasiya vasitələrində geniş məlumat yayılıb.
AZƏRTAC xəbər verir ki, Anadolu agentliyi, “TRT Haber”, “TRT Avaz”, “TRT-Azərbaycan radiosu”, www.ekoavrasya.net, www.igdir15temmuzgazetesi.com, www.yesiligdir.com, www.gazetekars.com, www.konhaber.com və digər informasiya resurslarında yayılan xəbərlərdə kitabın ümumi məzmunu barədə oxuculara ətraflı məlumat verilir.
Kitab barədə yayılan xəbərlərdə Ankara Hacı Bayram Vəli Universitetinin Jurnalistika fakültəsinin dekanı, professor Zakir Avşarın rəyinə geniş yer ayrılıb. Bundan başqa, Zakir Avşarın yazdığı “Publisist Aslan Aslanov və “İnformasiya yaradıcılığı: standartlar və yeni yanaşmalar” sərlövhəli məqalə Türkiyənin məşhur “FM” aylıq jurnalında işıq üzü görüb.
Müasir dünyada oxuculara doğru və operativ informasiya çatdırılmasının əhəmiyyətini vurğulayan professor Zakir Avşar yazır: “Bu ənənə AZƏRTAC-da uzun illərdən bəri davam etməkdədir. Agentlik xüsusilə Azərbaycanın 44 günlük Vətən müharibəsi dövründə beynəlxalq ictimaiyyəti düzgün məlumatlandıraraq yaxşı nümunə göstərib. Ermənistanın yalanlarına qarşı mübarizə apararaq obyektiv informasiyalarla təkcə Azərbaycan və Türkiyə üçün deyil, dünya ictimaiyyəti üçün də etibarlı xəbərin ünvanına çevrilib”.
Kitab barədə yayılan informasiyalarda diqqətə çatdırılır ki, yeni nəşrdə, həmçinin beynəlxalq media təşkilatları barədə ətraflı məlumat verilir, AZƏRTAC-ın bu qurumlara üzvlükdən başlayaraq onların rəhbər orqanlarında təmsilçiliyinədək keçdiyi yol əksini tapır.
“Qloballaşan dünyada informasiya axını, müasir informasiyaların işlənmə və yayılma problemləri”, “İnformasiya işində ənənə və müasirlik”, “İnformasiya agentliklərinin beynəlxalq və regional təşkilatları” adlı bölmələrdə ənənəvi media ilə sosial şəbəkələr arasındakı fərqli və oxşar cəhətlər, müasir İKT-lərin rolu, AZƏRTAC-ın beynəlxalq media qurumları ilə əməkdaşlığı təhlil olunur. Heydər Əliyev Fondunun prezidenti Mehriban Əliyevanın dəstəyi ilə Dünya Xəbər Agentliklərinin V Konqresinin və OANA-nın XVI Baş Assambleyasının Azərbaycanda keçirildiyi, 2016-2019-cu illərdə hər iki mötəbər beynəlxalq quruma AZƏRTAC-ın sədrlik etdiyi diqqətə çatdırılır. Müəllif qeyd edir ki, bu siyasətin təməl prinsiplərinin formalaşması və inkişafı Ümummilli Lider Heydər Əliyevin adı ilə bağlıdır. Ulu Öndər AZƏRTAC-a daim diqqət və qayğı ilə yanaşırdı. Bu ənənənin Prezident İlham Əliyev tərəfindən davam etdirilməsinin nəticəsidir ki, agentlik müasir texnologiyalarla təmin olunub, beynəlxalq informasiya məkanında mövqelərini möhkəmləndirib. Qarşısına Azərbaycan həqiqətlərini daha geniş coğrafiyada yaymaq vəzifəsi qoyan AZƏRTAC hazırda bir çox ölkələrin milli informasiya agentlikləri, habelə mötəbər xarici KİV-lərlə səmərəli əməkdaşlıq edir, qarşılıqlı xəbər mübadiləsi aparır.
Qeyd edək ki, Ankara Hacı Bayram Vəli Universitetinin Jurnalistika fakültəsinin dekanı, professor Zakir Avşarın rəyi və elmi redaktorluğu ilə işıq üzü görən kitabın baş redaktoru Avrasiya Yazıçılar Birliyinin sədri Yaqub Öməroğludur. “Bengü” brendi ilə təqdim olunan nəşrlərin yayım auditoriyası bütün türk dünyasını əhatə edir.

Paylaş:

Baxılıb: 607 dəfə