Diaspor rəhbəri: Misirdəki diasporumuz Prezident İlham Əliyevin qarşıya qoyduğu vəzifələri yerinə yetirmək əzmindədir

Bakı:

27 °C

47 %

3 m/s

AZ RU EN

Ana səhifə / Siyasət / Diaspor rəhbəri: Misirdəki diasporumuz Prezident İlham Əliyevin qarşıya qoyduğu vəzifələri yerinə yetirmək əzmindədir

Diaspor rəhbəri: Misirdəki diasporumuz Prezident İlham Əliyevin qarşıya qoyduğu vəzifələri yerinə yetirmək əzmindədir

29.12.2020 [09:30]

2019-cu il dekabrın 3-də Azərbaycan Respublikasının Prezidenti, Silahlı Qüvvələrin Müzəffər Ali Baş Komandanı İlham Əliyev “Azərbaycan Respublikasının “Diaspor fəaliyyətində xidmətə görə” medalının təsis edilməsi ilə əlaqədar “Azərbaycan Respublikasının orden və medallarının təsis edilməsi haqqında” Azərbaycan Respublikasının Qanununda dəyişiklik edilməsi barədə” Qanunu imzalayıb. Diasporla İş üzrə Dövlət Komitəsinin bu il Dünya Azərbaycanlılarının Həmrəylik Günü münasibətilə Azərbaycan diasporunun fəaliyyətinə mühüm töhfələr verən diaspor təşkilatlarının üzvlərini və diaspor fəallarını “Diaspor fəaliyyətində xidmətə görə” medalı ilə təltif etdiyi soydaşlarımızın arasında “Vətənpərvər” Misirdəki Azərbaycan Diaspor Təşkilatları Birliyinin sədri Seymur Nəsirov da var.
Dövlətimizin başçısına və Diasporla İş üzrə Dövlət Komitəsinə təşəkkürünü bildirən S.Nəsirov AZƏRTAC-ın müxbirinə müsahibəsində bildirib ki, bu mükafat Misirdə fəaliyyət göstərən diaspor təşkilatlarının hər bir üzvünün əməyinə verilən yüksək qiymətdir. O qeyd edib ki, Prezident İlham Əliyevin qarşıya qoyduğu vəzifələrə uyğun olaraq, səfirliklə birgə fəaliyyət göstərən diasporumuz 44 günlük Vətən müharibəsi dövründə Azərbaycan həqiqətlərinin təbliği, şanlı Ordumuzun torpaqlarımızı azad etməsi haqqında xəbərlərin yerli ictimaiyyətə çatdırılması istiqamətində mühüm işlər görüb. Belə ki, Misirin və digər ərəb ölkələrinin KİV-lərində məqalələr dərc etdirilib, ermənilərin vəhşilikləri, xüsusən İslam abidələrini dağıtması və məscidləri təhqir etməsi barədə ətraflı məlumatlar yayılıb. Eyni zamanda, Misir parlamentinin üzvləri, dini qurumlar və cəmiyyətlərin rəhbərləri ilə mütəmadi əlaqə saxlanılıb.
S.Nəsirov, həmçinin deyib: “Qələbədən sonra diaspor təşkilatımızın üzərinə daha çox vəzifə düşür. Biz Yaxın Şərq və Şimali Afrika ölkələrində hələ də güclü təbliğat aparan erməni diasporunun yalan və iftira dolu məlumatlarının qarşısının alınması, onlara vaxtında və tutarlı, tarixi faktlara və müasir reallıqlara əsaslanan cavab verilməsi istiqamətində daha səmərəli fəaliyyət göstərməliyik. Vətən müharibəsi günlərində Misirdəki hər bir azərbaycanlı sosial şəbəkələrdə bu qətiyyətli fəaliyyəti nümayiş etdirdi. Bu gün də fəaliyyətimiz davam edir. Bundan sonra da Misir ictimaiyyəti arasında, yerli KİV-lərdə doğma Azərbaycanımızın haqq səsinin daha çox yayılması, xalqımızın mədəniyyətinin və tarixinin təbliği istiqamətində səyləri artıracağıq. Əminəm ki, yeni ildə qarşıda duran vəzifələrin yerinə yetirilməsi üçün Misirdə yaşayan hər bir azərbaycanlı diaspor fəaliyyətinə öz töhfəsini verəcək”.

Paylaş:

Baxılıb: 521 dəfə