Qüdrət Həsənquliyev: Hazırda Azərbaycanda güclü vətəndaş birliyi mövcuddur

Bakı:

26 °C

66 %

9 m/s

Əlaqə

AZ RU EN

Ana səhifə / Siyasət / Qüdrət Həsənquliyev: Hazırda Azərbaycanda güclü vətəndaş birliyi mövcuddur

Qüdrət Həsənquliyev: Hazırda Azərbaycanda güclü vətəndaş birliyi mövcuddur

28.10.2020 [08:54]

“Müharibə təkcə döyüş meydanında yox, diplomatiya və informasiya müstəvisində də aparılır. Biz siyasi partiyalar olaraq dövlətimizin mövqeyini həm xalqımıza, həm də dünya ictimaiyyətinə çatdırmalıyıq”. Bu fikirləri Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyev deyib.
Torpaqlarımızın işğaldan azad olunması uğrunda əsgərlərimizin böyük ruh yüksəkliyi ilə döyüşdüyünü deyən Q.Həsənquliyev qeyd edib ki, ordumuz əslində, bütün xalqımızın iradəsini ifadə edir. Ona görə də, siyasi partiyalar, QHT-lər, mətbuat, bütövlükdə cəmiyyətimiz ordumuzun arxasındadır, ona dəstək verir. Cəmiyyətimizdə həddindən artıq böyük ruh yüksəkliyi var. “Bir məqamı qeyd edim ki, erməni cəmiyyəti təlaş içindədir, Paşinyan dünya ölkələrinin liderlərinə zəng edib yalvarır ki, Azərbaycanı dayandırın. Yəni ermənilər müharibənin davam etməsindən qorxurlar, bizim cəmiyyətdə isə narahatlıq ondan ibarətdir ki, birdən beynəlxalq güclərin təzyiqi ilə döyüşlər dayanar. Yəni bütün cəmiyyətimiz torpaqlarımızın işğaldan azad edilməsi üçün döyüş ruhunda köklənib. Azərbaycan və erməni cəmiyyətində fərq bundan ibarətdir. Mən əminəm ki, Azərbaycan bu məsələdə ədalətli mövqeyimizi müdafiə edən dövlətlərin mənəvi dəstəyi ilə 30 il işğal altında qalan torpaqlarımızı azad edəcək, 1 milyondan çox insan öz doğma yurdlarına qayıdacaq”, - deyə BAXCP sədri vurğulayıb.
Partiya sədrinin sözlərinə görə, belə bir şəraitdə ölkəmizdə fəaliyyət göstərən siyasi partiyalar da vahid mövqedən çıxış etməkdə davam edirlər. Onun fikrincə, bu amil siyasi islahatların müsbət nəticəsi kimi dəyərləndirilə bilər. Q.Həsənquliyev qeyd edib ki, sentyabrın 27-də Ermənistanın ölkəmizə qarşı növbəti hərbi təxribatından sonra Azərbaycanda fəaliyyət göstərən 50 siyasi partiya birgə bəyanat imzalayaraq Qarabağ məsələsində Prezident, Ali Baş Komandanın yanında olduqlarını bəyan etdi: “Bu yaxınlarda isə 50 siyasi partiya tərəfindən ATƏT-in Minsk qrupunun həmsədrlərindən olan Fransanın prezidenti Emmanuel Makronun ünvanına birgə etiraz bəyanatı qəbul olundu. Ümumiyyətlə, bu gün ölkəmizdə heç vaxt olmadığı kimi güclü milli birlik mövcuddur. Hazırda Azərbaycanda möhkəm vətəndaş birliyi yaranıb. Hesab edirəm ki, torpaqlarımızın işğaldan azad olunması yolunda qələbə qazanana qədər bu birliyə heç kim mane ola bilməz. Digər vacib bir məqam ondan ibarətdir ki, əvvəllər ayrı-ayrı partiyalar arasında əməkdaşlıq yox idi. Amma bu gün isə yaranmış siyasi dialoq nəticəsində partiyalar bir-biri ilə təmasda olur. Bu əməkdaşlıq ona gətirib çıxaracaq ki, ölkədə siyasi mədəniyyət yüksələcək, çoxpartiyalı sistem inkişaf edəcək, cəmiyyətimiz bundan faydalanıb irəli gedəcək”.
N.BAYRAMLI

Paylaş:

Baxılıb: 435 dəfə