Sabir Hacıyev: Bu zəfər yürüşündə Azərbaycan xalqı Ali Baş Komandana və ordumuza birmənalı dəstək göstərir

Bakı:

26 °C

55 %

8 m/s

AZ RU EN

Ana səhifə / Siyasət / Sabir Hacıyev: Bu zəfər yürüşündə Azərbaycan xalqı Ali Baş Komandana və ordumuza birmənalı dəstək göstərir

Sabir Hacıyev: Bu zəfər yürüşündə Azərbaycan xalqı Ali Baş Komandana və ordumuza birmənalı dəstək göstərir

22.10.2020 [09:06]

“Azərbaycan müstəqillik tarixinin ən uğurlu dönəmini yaşayır. Sentyabrın 27-də Ermənistan silahlı qüvvələrinin təxribatına cavab olaraq Azərbaycan Ordusunun əks-hücum əməliyyatları uğurla davam edir. Demək olar ki, hər gün xalqımız yeni müjdələr verir. Bu zəfər yürüşündə Azərbaycan xalqı Ali Baş Komandana və Azərbaycan Ordusuna birmənalı dəstək göstərir”.
Bu fikirləri “Yeni Azərbaycan”a açıqlamasında Vətəndaş Birliyi Partiyasının sədri, Milli Məclisin deputatı Sabir Hacıyev deyib.
Partiya sədri bildirib ki, Azərbaycan xalqının birlik və yüksək əzm göstərməsi düşməni ciddi narahat edir: “Döyüş meydanında ciddi məğlubiyyətlərlə üzləşən Ermənistan Azərbaycanın dinc sakinlərinə qarşı terror cəhdlərinə əl atır. Cəbhəyanı ərazilərdəki yaşayış məntəqələri ilə yanaşı, döyüş bölgəsindən aralıda yerləşən Gəncə şəhərinə raket hücumları terrorçuluğun və vandallığın bariz nümunəsidir. Gəncəyə sonuncu raket hücumundan sonra Azərbaycanda fəaliyyət göstərən 50 siyasi partiyanın əksər beynəlxalq təşkilatlara ünvanlanan müraciətində qeyd edilir ki, Ermənistan islaholunmaz, terrorçu ölkə olduğunu növbəti dəfə nümayiş etdirib. Belə ki, düşmən Gəncənin dinc sakinlərini, o cümlədən uşaqları hədəfə alıb. Siyasi partiyalar Ermənistanın mülki əhaliyə qarşı həyata keçirdiyi terror aktını qətiyyətlə qınayıb, terrorçu dövlətin cəzalandırılmasını tələb edib. Eyni zamanda, həmin müraciətdə Vətən müharibəsində Azərbaycan Prezidenti, Ali Baş Komandan İlham Əliyevin həyata keçirdiyi siyasəti qətiyyətlə dəstəklədiyimizi, Azərbaycan xalqı ilə birlikdə Onun ətrafında polad yumruq kimi birləşdiyimizi Ermənistanın və dünya ictimaiyyətinin diqqətinə çatdırdıq”.
Millət vəkili onu da deyib ki, təcavüzkar Ermənistanın bütün cəhdlərinə baxmayaraq, Azərbaycan Ordusu Ali Baş Komandanın rəhbərliyi altında yeni-yeni qələbələrə imza atır: “1 həftə ərzində iki dəfə elan olunan humanitar atəşkəsi kobud şəkildə pozan düşmənə Azərbaycan Ordusu nəinki layiqli cavab verib, Cəbrayıldan sonra işğal altında olan Füzuli, Zəngilan şəhərlərini və digər yaşayış məntəqələrimizi azad etməyə nail olub. Ali Baş Komandan hər bir şəhərin, rayonun, kəndin, strateji yüksəkliyin azad edilməsini Azərbaycan xalqına müraciətlərində elan edir, onu təbrik edir. Müzəffər ordumuzun yeni-yeni uğurlarına hazırda bütün Azərbaycan xalqı sevinir”.
Qaşqay ZİYƏDDİNOĞLU

Paylaş:

Baxılıb: 408 dəfə