Elşən Musayev: 50 siyasi partiyanın birgə bəyanatı Azərbaycanda mövcud olan siyasi birliyin göstəricisidir

Bakı:

21 °C

83 %

8 m/s

AZ RU EN

Ana səhifə / Siyasət / Elşən Musayev: 50 siyasi partiyanın birgə bəyanatı Azərbaycanda mövcud olan siyasi birliyin göstəricisidir

Elşən Musayev: 50 siyasi partiyanın birgə bəyanatı Azərbaycanda mövcud olan siyasi birliyin göstəricisidir

03.10.2020 [09:10]

“Ermənistan 30 ilə yaxındır ki, BMT-nin Təhlükəsizlik Şurasının qətnamələrinə məhəl qoymur və əfsuslar olsun ki, o, buna görə cəzalandırılmır. Bu, qəbuledilməzdir”. Bu fikirləri Demokratik Maarifçilik Partiyasının sədri, millət vəkili Elşən Musayev deyib.
E.Musayev bildirib ki, Ermənistanın işğalçı siyasətinə etiraz, eləcə də xalqın haqq tələbi ölkədəki siyasi qüvvələri birləşdirir. Siyasi partiyaların rəhbərlərinin birgə bəyanatı Azərbaycan xalqının və ölkənin siyasi partiyalarının yekdilliklə cənab Prezidentin yanında olduğunu nümayiş etdirir: “Ölkənin 50 siyasi partiyasının Ali Baş Komandan İlham Əliyevin yanında olduqlarına dair bəyanatları milli və siyasi həmrəyliyin əyani göstəricisidir. Bu bəyanat, həmçinin ölkədə siyasi dialoqun mövcudluğunun sübutudur”.
Partiya sədrinin sözlərinə görə, bu gün Azərbaycan cəmiyyəti hər zaman olduğundan daha böyük milli həmrəyliyin şahididir. Ölkənin siyasi tarixində ilk dəfə olaraq 50 siyasi partiya rəhbərinin Ali Baş Komandan, Prezident İlham Əliyevin yanında olduqlarına dair birgə bəyanatı milli birliyinin təcəssümüdür. Başqa sözlə, bu bəyanat təkcə xalqla hökumətin vahid mövqeyindən xəbər vermir, bu, eyni zamanda, Azərbaycanda mövcud olan həmrəyliyin göstəricisidir.
E.Musayev deyib ki, düşmənin total hücumlarının qarşısını almaq, əhalimizin təhlükəsizliyini təmin etmək məqsədilə qəhrəman ordumuz əks-hücum əməliyyatlarına başlayıb və təcavüzkara ağır zərbələr endirməkdədir: “Demokratik Maarifçilik Partiyası olaraq Ali Baş Komandan İlham Əliyevlə və Silahlı Qüvvələrimizlə bərabər olduğumuzu bəyan edirik, ordumuzun əks-hücum əməliyyatlarını alqışlayırıq. İnanırıq ki, Ali Baş Komandan İlham Əliyevin rəhbərliyi ilə rəşadətli ordumuz uzun illərdən bəri işğala məruz qalan müqəddəs torpaqlarımızı azad edəcək, dövlətçilik və hərb tariximizə şanlı səhifələr yazacaq”.
AXCP və “Müsavat”ın həmrəylik bəyanatına qoşulmamasına gəlincə, E.Musayev qeyd edib ki, bu partiyalar antimilli fəaliyyətlə məşğuldur: “Antimilli qüvvələrin ümummilli məsələlərdə həmrəylik göstərməsi mümkün deyil. Bu səbəbdən də onlar siyasi partiyaların birgə bəyanatına imza atmayıblar. Radikal müxalifət partiyaları, eləcə də xaricdəki “mühacirlər” erməni dəyirmanına su tökməklə məşğuldurlar. Onlar belə çirkin fəaliyyətləri ilə ölkəmizin nüfuzuna zərbə vurmağa cəhd göstərir, Qarabağ uğrunda mübarizədə ermənilərin maraqları naminə çalışırlar”.

Paylaş:

Baxılıb: 339 dəfə