Ölkəmizdə koronavirusun geniş yayılmasının qarşısının alınması istiqamətində görülən tədbirlər beynəlxalq müstəvidə yüksək qiymətləndirilir

Bakı:

23 °C

55 %

4 m/s

AZ RU EN

Ana səhifə / Siyasət / Ölkəmizdə koronavirusun geniş yayılmasının qarşısının alınması istiqamətində görülən tədbirlər beynəlxalq müstəvidə yüksək qiymətləndirilir

Ölkəmizdə koronavirusun geniş yayılmasının qarşısının alınması istiqamətində görülən tədbirlər beynəlxalq müstəvidə yüksək qiymətləndirilir

30.04.2020 [11:05]

Pandemiya şəraitində Azərbaycan dövlətinin vətəndaşların sağlamlığı və təhlükəsizliyinin qorunması ilə bağlı atdığı addımlar nümunə kimi göstərilir

Məlum olduğu kimi, dünya miqyasında geniş yayılmış yeni növ koronavirus infeksiyası (COVID-19) əksər dövlətlər üçün ciddi təhlükə olaraq qalmaqdadır. Bütün dünyanı təhdid edən pandemiyanın ilk dövrlərindən bu təhlükənin qarşısını almaq üçün Azərbaycanda da qabaqlayıcı və təxirəsalınmaz tədbirlər görülüb. Onu da qeyd etmək lazımdır ki, yoluxmanın geniş yayılmaması üçün Azərbaycan dövlətinin Ümumdünya Səhiyyə Təşkilatı (ÜST) ilə əməkdaşlığı çərçivəsində bir sıra təxirəsalınmaz addımlar atılıb.

Təsadüfi deyil ki, dövlət tərəfindən pandemiyaya qarşı həyata keçirilən tədbilər həm Azərbaycan əhalisi tərəfindən, həm də beynəlxalq müstəvidə olduqca yüksək qiymətləndirilir. Aprelin 24-də Abşeron rayonunun ərazisində Xızı rayonunun Ağdərə kəndindən Sumqayıt şəhərinə çəkilən magistral qaz kəmərinin açılış mərasimindəki çıxışında bu məqama toxunan Prezident İlham Əliyev bildirib ki, koronavirus dövründə dövlətin qəbul etdiyi qərarlar, atdığı addımlar həm ölkə əhalisi tərəfindən yüksək qiymətləndirilir, həm də beynəlxalq təşkilatlar Azərbaycanı bu sahədə nümunəvi ölkə kimi göstərir.

Bu məqamda qeyd etmək yerinə düşər ki, ÜST-nin Baş direktoru T.A.Gebreyesus açıqlamalarında dəfələrlə ölkəmizdə pandemiyaya qarşı görülən işləri yüksək qiymətləndirib və bu sahədə Azərbaycan nümunəvi ölkə kimi qəbul edildiyini bəyan edib. Yerə gəlmişkən, ÜST rəhbəri son mətbuat konfransında da Azərbaycanın koronavirus pandemiyasına qarşı həm qlobal, həm də regional mübarizədə rolundan bəhs edib. Azərbaycanın koronavirus pandemiyasına qarşı mübarizəyə verdiyi qlobal töhfəni yüksək qiymətləndirən T.A.Gebreyesus eyni zamanda ölkəmizin COVID-19-a qarşı qlobal səylərin dəstəklənməsi Fonduna 5 milyon ABŞ dollar vəsait ayırmasına görə minnətdarlıq edib. ÜST rəhbəri, həmçinin milli, regional və qlobal səviyyədə mübarizədə güclü səylərinə görə Azərbaycan Prezidentinə təşəkkürünü bildirib.

Qeyd olunduğu kimi, Azərbaycanın vətəndaşların təhlükəsizliyi və sağlamlığı üçün gördüyü tədbirlər beynəlxalq müstəvidə də yüksək dəyərləndirilir. Belə ki, xarici mətbuatda, o cümlədən Rusiya, Çin, İsrail və digər dövlətlərin media orqanlarında dərc edilən yazılarda Azərbaycanın pandemiyaya qarşı mübarizədə bütün sahələrdə atdığı addımlar təqdir edilir və nümunə kimi göstərilir. Elə İsraildəki “Cəmiyyət üçün beynəlxalq layihələr” qeyri-hökumət təşkilatının rəhbəri, beynəlxalq münasibətlər üzrə tanınmış ekspert Arye Qutun bu ölkədə çıxan nüfuzlu ingilisdilli “The Jerusalem Post” qəzetində dərc olunmuş “Azərbaycanda koronavirus: çağırışlar və reallıq” sərlövhəli məqaləsi də bu baxımdan əhəmiyyətə malikdir. Məqalənin müəllifi xüsusi olaraq qeyd edir ki, ölkədə lüzumsuz təlaş yoxdur, ona görə ki, cəmiyyətdə dövlət təsisatlarına etimad yüksək səviyyədədir.

Bununla yanaşı, müəllif pandemiyanın ilk dövrlərindən ölkəmizin gördüyü tədbirləri yüksək qiymətləndirərək müvafiq kateqoriyaya aid olan insanlar, əhalinin aztəminatlı təbəqələrinin nümayəndələri, həmçinin koronavirusa görə işini itirmiş və qeyri-rəsmi işləyən 600.000-dən çox vətəndaşın dövlət proqramından dəstək alacağını yazır. Sözügedən yazıda risk qrupunda olan insanların bütün zəruri vasitələrlə bilavasitə dövlət tərəfindən və Heydər Əliyev Fondunun dəstəyi ilə təmin olunduğu da qeyd edilir.

Məqaləsində səhiyyə sahəsində dövlətin atdığı addımlara da diqqəti çəkən A.Qut yazır ki, keçirilmiş testlərin sayına görə regionda birinci yeri tutan Azərbaycan, həmçinin bu məsələdə qabaqcıl Avropa ölkələrinin çoxundan irəlidədir.

Vurğulamaq yerinə düşər ki, Azərbaycanda koronavirusa yoluxan xəstələrin müalicəsində səmərəli nəticələrə nail olunması üçün dövlət tərəfindən ardıcıl və məqsədyönlü tədbirlər davam etdirilir. Yeni növ koronavirus infeksiyasına yoluxmuş xəstələrin müalicəsi üçün tibb müəssisələrində lazımi şəraitin yaradılması, yeni xəstəxanaların və laboratoriyaların istifadəyə verilməsi bunu bir daha sübut edir.

Çinin nüfuzlu “China Daily” qəzetində yer alan “Azərbaycan iqtisadiyyatı koronavirus infeksiyası və neft böhranının öhdəsindən gələ biləcəkmi?” adlı məqalədə isə Azərbaycanda iqtisadiyyatın COVID-19 pandemiyası dövründə yarana biləcək böhranın öhdəsindən gələ bilmək üçün görülən işlərdən danışılır. Qeyd olunur ki, dövlətin kifayət qədər maliyyə ehtiyatlara malik olması Azərbaycan iqtisadiyyatının yeni dönəmdəki inkişafı və onun səngiyən sahələrini yenidən işə salmaq üçün çox böyük imkanlar yaradır. Məqalədə bildirilir ki, Azərbaycanda qeyri-neft sektorunun inkişafı sahəsində mühüm addımlar atılıb və bu gün də atılmaqdadır. Müəllif qeyd edir ki, Azərbaycanın hətta böhran şəraitində inkişafı və digər ölkələrə nisbətən daha az ziyan görməsi ölkə başçısının ardıcıl şəkildə apardığı müdrik, düzgün iqtisadi siyasətin və strategiyanın nəticəsidir.

Göründüyü kimi, yeni növ koronavirus infeksiyasının geniş yayılmasının qarşısını almaq üçün, həmçinin pandemiyanın ölkə iqtisadiyyatına və əhaliyə vurduğu zərəri yumşaltmaq üçün Azərbaycan dövlətinin mümkün olan bütün tədbirləri həyata keçirməsi beynəlxalq müstəvidə də öz layiqli qiymətini alır.

Beləliklə, qeyd edilənlərdən belə bir nəticəyə gəlmək mümkündür ki, yeni növ koronavirus infeksiyasının geniş yayılmasının qarşısının alınması, vətəndaşların təhlükəsizliyinin təmin edilməsi və sağlamlığının qorunması yönündə ciddi uğurlar əldə edən Azərbaycan beynəlxalq müstəvidə nümunəvi ölkə kimi səciyyələndirilir.

Qaşqay ZİYƏDDİNOĞLU

Paylaş:

Baxılıb: 345 dəfə