Azərbaycanlı deputatlar Avronest PA-da erməni təxribatlarının qarşısını alıblar

Bakı:

31 °C

55 %

6 m/s

Əlaqə

AZ RU EN

Ana səhifə / Siyasət / Azərbaycanlı deputatlar Avronest PA-da erməni təxribatlarının qarşısını alıblar

Azərbaycanlı deputatlar Avronest PA-da erməni təxribatlarının qarşısını alıblar

30.06.2018 [09:28]

Azərbaycan Respublikası Milli Məclisinin Avronest Parlament Assambleyasında (PA) nümayəndə heyətinin təşkilatın yeddinci plenar sessiyasında iştirak etmək məqsədilə Belçikaya səfəri başa çatıb. Milli Məclisin Avronest PA-da nümayəndə heyətinin rəhbəri Sahibə Qafarovanın başçılığı ilə baş tutan səfərdə deputatlar Cavanşir Feyziyev, Azər Kərimli, Məlahət İbrahimqızı, Rasim Musabəyov və Tahir Mirkişili iştirak ediblər.
Plenar sessiyadan əvvəl keçirilən komitə iclasları çərçivəsində qətnamə layihələrinin müzakirəsi baş tutub. Siyasi komitədə hazırlanan və Azərbaycan üçün xüsusi əhəmiyyət kəsb edən qətnamə layihəsinin müzakirəsi xüsusilə gərgin keçib. Avropa Parlamentinin İsveçdən olan üzvü Günnar Hökmar və Gürcüstan parlamentinin üzvü xanım Tamar Xuroldovanın birlikdə hazırladığı qətnamə layihəsində Avropa İttifaqı tərəfindən bütün Şərq Tərəfdaşlığı ölkələrinin, o cümlədən Azərbaycanın ərazi bütövlüyünə və suverenliyinə hərtərəfli dəstəyin bildirildiyi maddə öz əksini tapıb. Azərbaycanın ərazi bütövlüyünə dəstəyin ifadə olunduğu bəndin sənəddən çıxarılması üçün çoxsaylı düzəlişlər təklif edən Ermənistanın Avronest PA-da nümayəndə heyəti deputatlarımızın səyləri nəticəsində istəklərinə nail ola bilməyib.
Beləliklə, Azərbaycanın ərazi bütövlüyü və suverenliyinə tam dəstəyin ifadə olunduğu qətnamə layihəsi plenar sessiyaya tövsiyə olunub və orada səs çoxluğu ilə qəbul edilib.
Daha sonra Ermənistan nümayəndə heyətinin “təxirəsalınmaz qətnamə” proseduru altında ölkəmizə qarşı yönəlmiş qətnamə layihəsi təklifinin qarşısı alınıb. Siyasi korrupsiya və siyasətdə etik davranış adı altında təklif edilən layihənin məqsədi Qərb mətbuatında Azərbaycanla bağlı səsləndirilən ittihamların Avronest çərçivəsinə gətirilməsi olub. Buna görə də Azərbaycan nümayəndə heyətinin rəhbəri Sahibə Qafarova Büro iclasında bunun qəti əleyhinə çıxıb və qətnamə layihəsinin geri götürülməsini təmin edib.
Bundan əlavə, deputat Tahir Mirkişilinin həmməruzəçi olduğu qətnamə plenar sessiyada qəbul edilib.
Təşkilatın sosial komitəsinin iclasında isə “ASAN xidmət”in təqdimatı baş tutub. Avronest PA-nın sosial komitəsinin həmsədri Məlahət İbrahimqızının təşəbbüsü ilə baş tutan təqdimatı “ASAN xidmət”in rəsmisi Kamran Ağası edib.
Avronest PA-nın plenar sessiyası çərçivəsində keçirilən digər bir mühüm tədbir Qadın Forumu olub. Nümayəndə heyətimizin qadın üzvləri Sahibə Qafarova və Məlahət İbrahimqızının iştirak etdiyi forumda deputatlarımız tərəfindən Azərbaycan Respublikasında qadın hüquqlarının təmin edilməsi ilə bağlı həyata keçirilən siyasət və tədbirlər haqqında məlumat verilib.
Təşkilatın iqtisadi komitəsinin iclasında Azər Kərimli çıxış edərək ölkəmizin iqtisadi siyasəti barədə məlumat verib.
Plenar sessiyanın sonuncu iclas günündə keçirilən dinləmələrdə Azərbaycan nümayəndə heyətinin üzvləri Rasim Musabəyov və Cavanşir Feyziyev çıxış ediblər. Cavanşir Feyziyev Avropa qurumlarında lobbiçilik fəaliyyətlərinin bu qədər geniş vüsət almasını pisləyib. O, Avropa qurumlarının qərarlarının bəzən müxtəlif qrupların marağına görə verildiyini, qərarların verilməsində heç də ümumbəşəri dəyərlərin deyil, şəxsi mənfəətin ön planda olmasının arzuolunmaz nəticələr doğurduğunu vurğulayıb.
Avronest PA-nın yeddinci plenar sessiyası iyunun 27-də öz işini başa vurub.

Paylaş:

Baxılıb: 561 dəfə