Çin mədəniyyətində göl obrazı: fəlsəfə, poeziya və rəssamlığın vəhdəti

Bakı:

27 °C

83 %

3 m/s

Əlaqə

AZ RU EN

Ana səhifə / Elm / Çin mədəniyyətində göl obrazı: fəlsəfə, poeziya və rəssamlığın vəhdəti

Çin mədəniyyətində göl obrazı: fəlsəfə, poeziya və rəssamlığın vəhdəti

25.08.2026 [16:10]

Azərbaycan Dillər Universitetinin (ADU) Konfutsi İnstitutunun yay onlayn lektoriya fəaliyyəti çərçivəsində Ümumdünya Göllər Gününə həsr olunmuş “Çindəki məşhur göllərin mədəni əhəmiyyəti” mövzusunda mühazirə təşkil olunub. Mühazirə institutun direktoru Rafiq Abbasovun təşəbbüsü ilə baş tutub.

Dillər Universitetindən AZƏRTAC-a bildiirlib ki, mühazirədə Çin mədəniyyətində göl obrazının fəlsəfi, ədəbi və estetik əhəmiyyətindən bəhs olunub. İnstitut direktoru bildirib ki, Çin fəlsəfəsində, poeziyasında və rəssamlığında xüsusi yer tutan göl obrazı “Yin” – sülh, qadınlıq başlanğıcı və düşüncə anlayışlarını təcəssüm etdirir. “Dağlar və sular” janrında isə göl insanla təbiət arasındakı əlaqəni və Kainatın fəlsəfi harmoniyasını simvolizə edir. Mühazirədə Çinin məşhur göllərinin tarixi və mədəni irsdə rolu geniş şəkildə təqdim edilib. O, UNESCO-nun Ümumdünya İrs Siyahısına daxil edilmiş Xihu gölünün tarixi-mədəni əhəmiyyətindən danışıb. Gölün mənzərələri, lotus və osmantus çiçəkləri, eləcə də ətraf ərazilərdə yerləşən tarixi məkanlar Tan və Sun sülalələrinin məşhur şairlərinin yaradıcılığında mühüm yer tutub. Mühazirə zamanı Xihu gölü ilə bağlı əfsanələrə, onunla əlaqəli tarixi şəxsiyyətlərə və milli qəhrəmanlara da diqqət çəkilib. Göl ətrafındakı məbədlər, körpülər və bağlarla birlikdə formalaşan “Xihu gölünün ən yaxşı on mənzərəsi” ənənəvi Çin mədəniyyətinin mühüm nümunələri kimi təqdim olunub.

Rafiq Abbasov, həmçinin Qu Yuanın xatirəsinə həsr olunan Əjdaha Qayıqları Festivalı ilə bağlı əfsanələri özündə yaşadan Duntin gölü, daoist ənənələrdə mühüm yer tutan Junşan adası, eləcə də Xiao və Xiang çaylarının Duntin gölünə qovuşduğu ərazinin mədəni və bədii əhəmiyyəti barədə məlumat verib. Bu məkanların Çin poeziyası və klassik rəssamlığında geniş əks olunduğu vurğulanıb. Mühazirədə Tibet buddistləri üçün müqəddəs sayılan Çinghay gölünün yaranması ilə bağlı əfsanələr, Buddanın zühuru haqqında rəvayətlər və Xan sülaləsi dövrünə gedib çıxan su ruhuna sitayiş ənənələri də diqqətə çatdırılıb. Çinin məşhur Tayhu gölü haqqında danışan Rafiq Abbasov onun Çin şairlərinin yaradıcılığında əks olunması ilə yanaşı, Böyük Kanalla əlaqəsi, burada yetişdirilən məşhur “Bi Lo Çun” yaşıl çayı və ənənəvi Çin bağçılığında xüsusi əhəmiyyət daşıyan “Tayhu daşları” ilə tanındığını bildirib. Bu daşların əsrlərboyu imperator saraylarının və parklarının bəzədilməsində istifadə edildiyi qeyd olunub.

Mühazirə iştirakçılara Çin göllərinin yalnız təbii sərvət deyil, həm də ölkənin fəlsəfi dünyagörüşünü, ədəbi irsini, incəsənətini, dini inanclarını və tarixi yaddaşını özündə birləşdirən mühüm mədəni irs nümunələri olduğunu göstərib. Azərbaycan Dillər Universitetinin Konfutsi İnstitutunun təşkil etdiyi yay onlayn lektoriya Çin dili və mədəniyyətinin müxtəlif aspektlərinin öyrənilməsinə, eləcə də Azərbaycan və Çin arasında mədəni-humanitar əlaqələrin inkişafına töhfə verir.

Paylaş:

Baxılıb: 92 dəfə