ABŞ-Azərbaycan münasibətləri uğurlu strateji tərəfdaşlıq nümunəsidir

Bakı:

26 °C

43 %

4 m/s

Əlaqə

AZ RU EN

Ana səhifə / Siyasət / ABŞ-Azərbaycan münasibətləri uğurlu strateji tərəfdaşlıq nümunəsidir

ABŞ-Azərbaycan münasibətləri uğurlu strateji tərəfdaşlıq nümunəsidir

08.06.2017 [10:11]

Birləşmiş Ştatlar Prezidenti Donald Trampın Prezident İlham Əliyevə məktubları ölkələr arasında münasibətlərin yeni mərhələyə qədəm qoyduğunu göstərir
Məlum olduğu kimi, ölkəmiz balanslaşdırılmış xarici siyasət kursu ilə beynəlxalq miqyasda əməkdaşlıq və təhlükəsizlik məsələlərinə xüsusi diqqət yetirir. Azərbaycan özünün xarici siyasətində milli maraqlar və beynəlxalq hüquq normaları ilə yanaşı, sülh, sabitlik, inkişaf, qarşılıqlı faydalı əməkdaşlıq kimi meyarları da əsas götürür, beynəlxalq münasibətlər sisteminə yeni və daha mütərəqqi dəyərlər təqdim edir. Bu isə daha çox regional və qlobal inkişafa, sabitliyə, təhlükəsizliyə töhfə kimi xarakterizə edilir. Bütün bunların müqabilində ayrı-ayrı milli dövlətlər, o cümlədən dünya siyasətinin güc mərkəzləri kimi çıxış edən geopolitik subyektlər Azərbaycanın beynəlxalq münasibətlər sistemində fəal rolunu, praqmatik xarici siyasət kursunu yüksək qiymətləndirirlər.
Bu məqamda qeyd etmək yerinə düşər ki, müasir beynəlxalq münasibətlər sisteminin güc mərkəzlərindən biri olan Amerika Birləşmiş Ştatları da ölkəmizlə əməkdaşlığa xüsusi önəm verir. Məhz ABŞ Prezidenti Donald Trampın 28 May - Respublika Günü və XXIV Beynəlxalq “Xəzər Neft və Qaz-2017” sərgi və konfransı ilə əlaqədar Azərbaycan Respublikasının Prezidenti İlham Əliyevə təbrik məktubları da bunu aşkar şəkildə ifadə edir.
Məsələyə münasibət bildirən Yeni Azərbaycan Partiyası (YAP) Siyasi Şurasının üzvü, Milli Məclisin deputatı Aydın Hüseynovun sözlərinə görə, həmin məktublarda D.Tramp həm Azərbaycan və ABŞ, həm də dünya üçün daha gözəl gələcək naminə Prezident İlham Əliyevlə fəal tərəfdaş kimi işləməyi səbirsizliklə gözlədiyini bildirib. A.Hüseynov qeyd edib ki, ABŞ Prezidenti Azərbaycanı Amerika Birləşmiş Ştatlarının dəyərli tərəfdaşı hesab edir. Buna görə də D.Trampın məktublarında Azərbaycanla tərəfdaşlıq münasibətlərinin əhəmiyyəti yüksək qiymətləndirilir, iki ölkə arasındakı əlaqələrin yaxşı perspektivə malik olduğu diqqətə çatdırılır.
Millət vəkili son illərdə dünyada gedən proseslər fonunda terrorizmə qarşı mübarizənin aktuallığının daha da artdığını bildirib: “Təəssüf doğuran haldır ki, hazırda terrorizm bir çox ölkələr üçün çox ciddi təhdidə çevrilib. Ən acınacaqlı cəhət odur ki, terror hadisələri bir çox hallarda milli-dini-irqi zəmində törədilir ki, bu da gələcək birgəyaşayış üçün daha təhlükəlidir. İnsanlarda sabaha inam azalır. Dünyanın gələcəyi üçün getdikcə daha böyük təhlükəyə çevrilən terrorun qarşısını ancaq birgə səylərlə almaq mümkündür. Bu istiqamətdə Azərbaycanın səyləri hər cür yüksək qiymətə layiqdir. Ölkəmiz özünün xoş məramına sadiq qalaraq dünyanın bu və ya digər guşəsində aparılan antiterror əməliyyatlarına öz töhfəsini verməyə çalışır. Bu amil D.Trampın Azərbaycanın dövlət başçısına ünvanladığı məktubda da nəzərə çatdırılıb”.
“Uğurlu daxili və xarici siyasətilə beynəlxalq aləmdə böyük nüfuz qazanan Azərbaycan ABŞ ilə əlaqələrə böyük əhəmiyyət verir. Əlbəttə ki, Vaşinqton da öz növbəsində Cənubi Qafqazın güc mərkəzinə çevrilən Azərbaycanla çoxtərəfli əməkdaşlığın inkişafında xüsusilə maraqlı olduğunu dəfələrlə bəyan edib. ABŞ Prezidenti Donald Trampın Prezident İlham Əliyevə göndərdiyi məktublardan isə aydın olur ki, bu gün ABŞ-Azərbaycan əlaqələri strateji tərəfdaşlıq səviyyəsində uğurla davam etdirilir”. Bunu isə Yeni Azərbaycan Partiyası (YAP) Nizami rayon təşkilatının sədri, Milli Məclisin deputatı Sədaqət Vəliyeva deyib.
“Təsadüfi deyil ki, ABŞ-ın dövlət xadimləri, siyasətçiləri və ekspertləri Amerika üçün ölkəmizin hətta inkişaf etmiş Avropa dövlətlərindən daha etibarlı tərəfdaş, müttəfiq olduğunu qeyd edirlər. Çünki Azərbaycan Amerika Birləşmiş Ştatlarının dəyərli tərəfdaşıdır və iki ölkə birgə terrorizmə qarşı mübarizə apararaq qlobal təhlükəsizliyi möhkəmləndirmək üçün çalışır”, - deyə Sədaqət Vəliyeva bildirib. Onun sözlərinə görə eyni zamanda, Azərbaycan Avropa üçün yeni enerji mənbəyi olduğundan, uzunmüddətli və uğurlu əməkdaşlığa sadiqliyini nümayiş etdirdiyindən ABŞ ölkəmizlə fəal əməkdaşlıq etmək marağını gizlətmir.
Nardar BAYRAMLI

Paylaş:

Baxılıb: 492 dəfə