Sarkisyanın siyasi dilənçiliyi, yaxud erməni lobbisi mövcud rejimdən üz döndərib

Bakı:

21 °C

88 %

6 m/s

Əlaqə

AZ RU EN

Ana səhifə / Siyasət / Sarkisyanın siyasi dilənçiliyi, yaxud erməni lobbisi mövcud rejimdən üz döndərib

Sarkisyanın siyasi dilənçiliyi, yaxud erməni lobbisi mövcud rejimdən üz döndərib

11.03.2017 [10:36]

Azərbaycanın diplomatik cəbhədə və hərbi müstəvidə əldə etdiyi uğurların müqabilində dalana dirənən işğalçı ölkə başçısının Fransa səfəri parlament seçkilərində siyasi dəstək qazanmağa hesablanıb
Ermənistanda aprelin 2-də növbəti parlament seçkiləri keçiriləcək. Bu tarix yaxınlaşdıqca Ermənistan siyasi həyatında ziddiyyətlərin artması, yeni konfrantasiya meyillərinin ortaya çıxması müşahidə edilir. Bununla yanaşı, parlament seçkilərində ciddi uğursuzluğa düçar olacağını düşünən Sarkisyan rejimi yeni siyasi manipulyasiyalarla xilas yolu axtarmağa başlayıb. Belə ki, Cənubi Qafqazın forpost ölkəsinin başçısının Fransaya səfəri bu kontekstdə bir sıra məqamlara aydınlıq gətirib. Ekspertlər bu səfəri Sarkisyanın yeni dəstək axtarışına çıxması, daha doğrusu, növbəti siyasi dilənçiliyi kimi səciyyələndirirlər.
Sarkisyan rejimi çıxılmaz vəziyyətdə...
Hər şeydən öncə, Sarkisyan rejimi anlayır ki, Azərbaycanın diplomatik cəbhədə və hərbi müstəvidə əldə etdiyi uğurların müqabilində dalana dirənən Ermənistan çıxılmaz vəziyyətə düşüb. Və bu hal Sarkisyan rejimi üçün yaxşı heç nə vəd etmir. Ermənistan ictimaiyyəti mövcud rejimi ciddi tənqid atəşinə tutmaqdadır və dolayısıyla, bu durum hakimiyyətdə olan hərbi xuntanın əleyhinədir. Ermənistanın aprel döyüşlərindən və cari ilin fevral ayında baş verən hadisələrdən sonra mövcud situasiyanı öz lehinə dəyişdirmək imkanına malik olmaması Sarkisyan rejimində ciddi təlaş yaradıb. Buna görə də mövcud rejim silsilə xarakterli uğursuzluqların fonunda parlament seçkilərində siyasi iflasla qarşılaşmamaq üçün Avropada özünə dəstək axtarır...
Erməni diasporu Sarkisyan rejiminə qarşı təzyiqləri artırır
Sarkisyanın Fransa səfərinin ifadə etdiyi başqa bir reallıq isə erməni lobbisinin mövcud rejimdən üz döndərməsidir. Belə ki, istər diplomatik, istərsə də hərbi-psixoloji cəbhədə düçar olunan uğursuzluq erməni lobbisi ilə Ermənistan hakimiyyəti arasındakı ziddiyyətləri daha da artırıb. Ermənistan hakimiyyətinin xaricdəki başlıca dayaq nöqtəsi olan erməni lobbisi hazırkı hakimiyyəti ciddi tənqid obyektinə çevirib. Fransa, Livan və ABŞ-da erməni lobbisi, demək olar ki, davamlı olaraq Serj Sarkisyan hakimiyyətinin əleyhinə tənqidi materiallar yayır, üstəlik, erməni lobbisinin nəzarəti altında fəaliyyət göstərən əksər mətbu orqanlar da Ermənistan hakimiyyətini tənəzzül mənbəyi adlandırırlar. Digər tərəfdən, erməni diasporu artıq əvvəlki kimi mövcud hakimiyyətin beynəlxalq aləmdəki təbliğat maşını funksiyasını yerinə yetirmir. Eyni zamanda, diaspor Sarkisyan hakimiyyətinə etdiyi maliyyə yardımlarını da tamamilə dayandırmaq haqqında məlumatlar yayır. Başlıca reallıq budur ki, erməni diasporu mövcud Ermənistan hakimiyyətinə qarşı açıq-aşkar siyasi və iqtisadi təzyiqlər etməyə başlayıb. Bu isə hakimiyyət-diaspor tandeminin tam mənada fiaskoya uğradığına dəlalət edir.
Beləliklə, bir neçə il bundan əvvəlki münasibətlərdən fərqli olaraq artıq nə Ermənistan hakimiyyəti erməni diasporunun iqtisadi-siyasi dəstəyinə arxalanır, nə də ki, erməni diasporu mövcud hakimiyyəti müdafiə edir. Erməni diasporunun qənaətincə, Serj Sarkisyan hakimiyyətinin tutduğu mövqe və sərgilədiyi fəaliyyət ermənilərin maraqlarına zərbə endirməklə yanaşı, ölkəni uçuruma doğru sürükləməkdədir. Erməni diasporunun yekun mövqeyi ondan ibarətdir ki, əgər Sarkisyan hakimiyyəti məhz bu cür mövqeyini davam etdirəcəksə, bu zaman ölkədə hökm sürən iqtisadi-siyasi böhran daha da şiddətlənəcək, Ermənistan beynəlxalq aləmdə ciddi problemlər və təzyiqlərlə qarşılaşacaq. Bir müddət öncə Ermənistanın “Tert.am” saytının yaydığı və erməni lobbisinin Sarkisyan hakimiyyəti barədəki mövqeyini ictimaiyyətə çatdıran məlumatda əks olunanlar reallığı olduqca aşkar şəkildə ifadə edir. Məlumatda qeyd edilib ki, “Sarkisyan hakimiyyətinin atdığı addımlar Ermənistan dövləti və xalqının əleyhinə yönəlib. Bizim mövqeyimiz və tələbimiz ondan ibarətdir ki, bu hakimiyyət məhz bu cür dağıdıcı siyasətindən əl çəksin. Əks halda ölkəni çox böyük fəlakətlər gözləyir”.
Bununla yanaşı, erməni siyasi ictimaiyyəti isə yeganə çıxış yolunun Dağlıq Qarabağ münaqişəsinin həlli yolunda barışıq əldə olunmasında olduğunu ifadə edirlər. Çünki Ermənistan ictimaiyyəti anlayır ki, bu ölkənin işğalçı siyasəti onların özü üçün fəlakət mənbəyi kimi çıxış edir.
Nurlan QƏLƏNDƏRLİ

Paylaş:

Baxılıb: 535 dəfə