Azərbaycan dövləti məcburi köçkünlərə diqqət və qayğını davam etdirir

Bakı:

24 °C

64 %

12 m/s

Əlaqə

AZ RU EN

Ana səhifə / Siyasət / Azərbaycan dövləti məcburi köçkünlərə diqqət və qayğını davam etdirir

Azərbaycan dövləti məcburi köçkünlərə diqqət və qayğını davam etdirir

25.01.2017 [08:49]

Azərbaycan Prezidenti İlham Əliyevin məcburi köçkünlər və onlara bərabər tutulan şəxslər üçün vahid aylıq müavinətin müəyyən edilməsi haqqında imzaladığı Fərman bu qəbildən insanların sosial müdafiəsinin daha da gücləndirilməsinə, ünvanlılığın təmin olunmasına və səmərəliliyin artmasına xidmət edir.
Bu sözləri AZƏRTAC-a açıqlamasında Milli Məclisin deputatı Musa Quliyev bildirib.
Musa Quliyev deyib: “Fərmana görə qaçqın və məcburi köçkünlər üçün nəzərdə tutulan bəzi güzəştlər pul konsepsiyası ilə əvəz olunacaq və sosial müavinət şəklində onlara veriləcək. Konkret olaraq enerji daşıyıcılarının xərcləri ilə və un məmulatları ilə bağlı xərcləri 36 manatlıq aylıq sosial müavinətlə əvəz olunacaq. Bu da həmin insanların dövlətin onlara olan qayğısından daha konkret ünvanlı şəkildə istifadə etməsinə səbəb olacaq. Əvvəllər də uzun illər onlar bu güzəştlərə, imtiyazlara malik olublar, sadəcə həmin vəsait onda dövlətin büdcəsindən müvafiq qurumlara ayrılıb, indi isə onun forması dəyişib, müvafiq qurumlar əvəzinə vətəndaşın özünə verilir və onu xərcləmək istiqaməti də vətəndaşın öz seçimindən asılı olacaq. Sosial müdafiənin bu şəkildə təmin olunması ünvanlılıq prinsipinə də uyğundur.
2001-ci ildə o vaxtadək Azərbaycanda mövcud olan bəzi güzəştlər və imtiyazlar ünvanlı yardımla əvəz edilib. Buraya Qarabağ müharibəsi əlilləri, şəhid ailələri, müharibə veteranları daxil idi. Onlara verilən güzəştlər və imtiyazlar pul konsepsiyası ilə əvəz olundu. Həmin proses indi məcburi köçkünlər üçün də tətbiq edilir. O zaman bunu məcburi köçkünlərə şamil etmək mümkün deyildi. Çünki onların çoxu çadır şəhərciklərində, vaqonlarda, fin şəhərciyində və yaxud da qazma zirzəmilərdə yaşayırdılar. Belə bir şəraitdə bunu tətbiq etmək mümkün deyildi. Dövlətimiz gücləndikcə, inkişaf etdikcə Prezidentin qayğısı nəticəsində minlərlə qaçqın və məcburi köçkün ailəsinə evlər tikildi, şəhərciklər salındı, mənzillər verildi və onların demək olar ki, hamısı çadır şəhərciklərindən, vaqon evlərdən və şəraitsiz yerlərdən hər cür şəraiti olan evlərə köçürüldülər. Məcburi köçkünlərin yaşadıqları ünvanlarda pulsuz sayğaclar quraşdırılacaq. Vətəndaş işlətdiyi enerjinin haqqını dövlətin ayırdığı müavinət hesabına ödəyəcək. Bu, bir tərəfdən səmərəli və qənaətli istifadəyə gətirib çıxaracaq, digər tərəfdən də vətəndaşa seçim imkanı verir ki, vəsaitini hansı istiqamətdə, necə xərcləsin.
Bu mənada bu Fərman hesab edirəm ki, bütün məcburi köçkünlərin ürəyincədir və bundan sonra da dövlətin onlara qayğısı davam edəcək. Prezidentin söylədiyi kimi, bizim əsas məqsədimiz məcburi köçkün soydaşlarımızı doğma yurd-yuvalarına qaytarmaq və orada onların əvvəlkindən də yaxşı şəraitini təmin etməkdir. Azərbaycan dövləti də yaxın vaxtlarda bu işi həyata keçirəcək”.

Paylaş:

Baxılıb: 492 dəfə