Qafqaz Müsəlmanları İdarəsinin sədri Qaraçay-Çərkəz Respublikasında keçirilən konfransda radikalizmə qarşı mübarizənin zəruriliyindən danışıb

Bakı:

21 °C

46 %

1 m/s

AZ RU EN

Ana səhifə / Siyasət / Qafqaz Müsəlmanları İdarəsinin sədri Qaraçay-Çərkəz Respublikasında keçirilən konfransda radikalizmə qarşı mübarizənin zəruriliyindən danışıb

Qafqaz Müsəlmanları İdarəsinin sədri Qaraçay-Çərkəz Respublikasında keçirilən konfransda radikalizmə qarşı mübarizənin zəruriliyindən danışıb

12.04.2014 [09:56]

Qafqaz Müsəlmanları İdarəsinin (QMİ) sədri şeyxülislam Allahşükür Paşazadənin başçılıq etdiyi nümayəndə heyəti aprelin 10-da Rusiya Federasiyasının Qaraçay-Çərkəz Respublikasında səfərdə olub.
Paytaxt Çerkessk şəhərində keçirilən “Ruhanilik-Rusiyanın birliyinin möhkəmləndirilməsində və millətlərarası münasibətlərdə mühüm amil kimi” mövzusunda konfransda iştirak edən Allahşükür Paşazadə Qaraçay-Çərkəz Respublikasının başçısı Rəşid Temrezova, Şimali Qafqaz Müsəlmanlarının Koordinasiya Şurasının sədri, Qaraçay-Çərkəz müftisi İsmayıl Berdiyevə və tədbir iştirakçılarına Azərbaycan Respublikasının Prezidenti İlham Əliyevin salamlarını çatdırıb.
Şeyxülislam çıxışında Qafqazda baş verən hadisələrdən, radikal cərəyanlardan danışıb, radikalizmə qarşı mübarizədə din xadimlərinin birgə addımlarının önəmini qeyd edib. Regionda sülh və əmin-amanlığın qorunması üçün radikal cərəyanları mötədil İslama çağıran Qafqaz Müsəlmanları İdarəsinin sədri bu yolda bütün səyləri əsirgəməməyin vacibliyini vurğulayıb.
Səfər zamanı Allahşükür Paşazadə Şimali Qafqaz Müsəlmanlarının Koordinasiya Şurasının sədri, Qaraçay-Çərkəz müftisi İsmayıl Berdiyevin 60 illik yubileyi münasibətilə təşkil olunan tədbirlərdə də iştirak edib, Azərbaycan Prezidenti İlham Əliyevin təbriklərini çatdırıb.
Şeyxülislam, həmçinin sədrlik etdiyi Qafqaz Xalqları Ali Dini Şurasının üzvləri ilə də görüşüb, Şuranın son yığıncağından ötən dövrdə görülən işlər haqqında hesabatı dinləyib.
Səfərin sonunda Qafqaz Müsəlmanları İdarəsinin sədri Qaraçay-Çərkəz Respublikasının başçısı Rəşid Temrezovla görüşüb. Söhbət zamanı Rəşid Temrezov ötən il Azərbaycana səfərini, Prezident İlham Əliyevlə görüşünü məmnunluqla xatırladıb. O deyib ki, Azərbaycanın sürətli inkişafı bütün bölgə üçün böyük önəm kəsb edir.
Allahşükür Paşazadəni Çerkessk şəhərində tikilən yeni Cümə məscidinin açılışına dəvət edən Rəşid Temrezov onun salamlarının Prezident İlham Əliyevə və Azərbaycan xalqına çatdırılmasını xahiş edib.
Səfərdə Allahşükür Paşazadəni Rus Pravoslav Kilsəsinin Bakı və Azərbaycan Yeparxiyasının arxiyepiskopu Aleksandr İşein, QMİ sədrinin birinci müavini Salman Musayev və digər şəxslər müşayiət ediblər.

Paylaş:

Baxılıb: 830 dəfə