Azərbaycan ilə İslam Əməkdaşlıq Təşkilatı arasında əməkdaşlığın perspektivləri müzakirə olunub

Bakı:

30 °C

43 %

1 m/s

Əlaqə

AZ RU EN

Ana səhifə / Siyasət / Azərbaycan ilə İslam Əməkdaşlıq Təşkilatı arasında əməkdaşlığın perspektivləri müzakirə olunub

Azərbaycan ilə İslam Əməkdaşlıq Təşkilatı arasında əməkdaşlığın perspektivləri müzakirə olunub

08.03.2014 [09:58]

Martın 7-də iqtisadiyyat və sənaye naziri Şahin Mustafayev Bakıda səfərdə olan İslam Əməkdaşlıq Təşkilatının (İƏT) baş katibi İyad bin Amin Mədəni ilə görüşüb.
İqtisadiyyat və Sənaye Nazirliyinin mətbuat xidmətindən AzərTAc-a bildiriblər ki, görüşdə Azərbaycan və İslam Əməkdaşlıq Təşkilatı arasındakı mövcud əlaqələrə, əməkdaşlıq perspektivlərinə və qarşılıqlı maraq doğuran digər məsələlərə dair fikir mübadiləsi aparılıb.
İqtisadiyyat və sənaye naziri Şahin Mustafayev Baş katibi yüksək vəzifəyə seçilməsi münasibətilə təbrik edib, bu səfərin Azərbaycan və İƏT arasında uğurlu əməkdaşlığın göstəricisi olduğunu vurğulayıb. Qeyd olunub ki, Azərbaycan İƏT tərəfindən hazırlanan yardım layihələrində fəal iştirak edir. 2013-cü ildə Azərbaycanın İƏT ölkələri ilə ticarət dövriyyəsinin həcmi daha 7,7 faiz artaraq 6,8 milyard dollara çatıb. İƏT-in maliyyə qurumu olan İslam İnkişaf Bankı bu günədək ölkəmizə 18 layihə üzrə 960 milyon dollar məbləğində kredit, 14 layihə üzrə 5 milyon dollar texniki yardım ayırıb.
İƏT-in əsas qurumlarından olan İqtisadi və Ticarət Əməkdaşlığı üzrə Daimi Komitə (COMCEC) çərçivəsində də iqtisadi əməkdaşlıq yüksək səviyyədədir. İndiyədək Bakıda İƏT çərçivəsində bir sıra beynəlxalq tədbir və forumlar keçirilib. 2010-cu ildə İslam İnkişaf Bankının illik toplantısının Bakıda təşkili, Azərbaycanın 2017-ci ildə 4-cü İslam Həmrəyliyi Oyunlarına ev sahibliyi edəcəyi xüsusi vurğulanıb.
Nazir Şahin Mustafayev Ermənistan-Azərbaycan, Dağlıq Qarabağ münaqişəsində İƏT-in Azərbaycanın haqlı mövqeyini daim dəstəklədiyini və məsələ ilə bağlı bir neçə qətnamə qəbul etdiyini deyib.
Görüşdə, həmçinin Azərbaycan iqtisadiyyatına dair məlumat verən nazir ölkəmizin etibarlı tərəfdaş, regionun iqtisadi və mədəni mərkəzi olduğunu, siyasi və makroiqtisadi sabitliyini diqqətə çatdırıb.
İslam Əməkdaşlıq Təşkilatının Baş katibi İyad bin Amin Mədəni təmsil etdiyi qurumun Azərbaycanla əməkdaşlığa önəm verdiyini, qarşılıqlı əlaqələrin bundan sonra da genişlənəcəyinə əminliyini ifadə edib, İƏT-lə əməkdaşlığın inkişaf perspektivləri barədə məlumat verib. Qonaq ölkəmizdə əldə olunmuş nailiyyətləri yüksək qiymətləndirib, iqtisadiyyatın şaxələndirilməsi, sahibkarlığın inkişafı sahələrində Azərbaycan təcrübəsinin İƏT üzv olan digər ölkələr üçün örnək ola biləcəyini qeyd edib.

Paylaş:

Baxılıb: 1058 dəfə