“Onlayn media: peşəkarlıq və məsuliyyət”

Bakı:

20 °C

77 %

6 m/s

Əlaqə

AZ RU EN

Ana səhifə / Siyasət / “Onlayn media: peşəkarlıq və məsuliyyət”

“Onlayn media: peşəkarlıq və məsuliyyət”

28.02.2014 [09:04]

Mətbuat Şurasının təşkil etdiyi “dəyirmi masa”da bu məsələlər müzakirə olunub
Fevralın 27-də Azərbaycan Mətbuat Şurasında (MŞ) “Onlayn media: peşəkarlıq və məsuliyyət” mövzusunda “dəyirmi masa” keçirilib.
AzərTAc xəbər verir ki, tədbirdə MŞ-nin idarə heyətinin üzvləri, onlayn xəbər portallarının baş redaktorları, KİV nümayəndələri, həmçinin jurnalist təşkilatlarının təmsilçiləri və müstəqil ekspertlər iştirak ediblər.
İnternetin cəmiyyətdə ictimai fikrin formalaşmasında mühüm rol oynadığını deyən MŞ-nin sədri Əflatun Amaşov bildirib ki, əgər 10 il əvvəl ictimai fikrə televiziyalar təsir edirdisə, son illərdə onlayn media bu sahədə əsas rol oynamaqdadır. Aparılan sorğulara əsasən, hazırda xüsusən paytaxt sakinlərinin informasiya mənbəyinin 40 faizini internet, 40 faizini televiziya kanalları, digər hissəsini isə qəzet, jurnal və başqa media orqanları təşkil edir. Buna baxmayaraq, internetin rolunun artaraq 60-70 faizə çatacağı proqnozlaşdırılır.
İnternet medianın problemlərindən danışan Ə.Amaşov vurğulayıb ki, əgər onlayn jurnalistika KİV sayılırsa, onlar gələcəkdə Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun büdcəsi artdıqca bu qurumun maliyyə yardımından faydalana biləcəklər.
Onlayn jurnalistikada mənbənin etibarlılığının önəmini diqqətə çatdıran MŞ sədri deyib ki, internet media faktların yoxlanılmasını arxa plana keçirməməlidir. Ə.Amaşov bildirib ki, internet media ilə bağlı bu il bir neçə beynəlxalq konfrans və tədbirlər təşkil olunacaq, qabaqcıl xarici ölkələrin sahə üzrə mütəxəssisləri ilə görüşlər keçiriləcək.
MŞ-nin internet media resursları üzrə komissiyasının rəhbəri Elnur Baimov xəbər portallarına kiberhücumlardan danışaraq bu sahədə Rabitə və İnformasiya Texnologiyaları Nazirliyi yanında Elektron Təhlükəsizlik Mərkəzinin yaradıldığını diqqətə çatdırıb, xəbər portallarının rəhbərlərini bu qurumla əməkdaşlığa dəvət edib. Onlayn mediada plagiatçılığın çox yayıldığını deyən E.Baimov bu sahədə də etik normaların gözlənilməsinin vacibliyini vurğulayıb.
MŞ-nin idarə heyətinin üzvü Azər Həsrət isə xəbər portallarının sayının sürətlə artdığı bir zamanda ana dilimizin qorunmamasından bəhs edib. O bildirib ki, xəbər portalları keyfiyyətdən çox kəmiyyətə üstünlük verirlər. Bu isə Azərbaycan dilinin normalarının kobud şəkildə pozulması ilə müşahidə olunur. Xəbər yarışı dövründə bu vacib amili arxa plana keçirmək olmaz.
Onlayn mediada jurnalistlərin peşə davranışı qaydalarına əməl etmələrinin önəminə diqqət çəkən A.Həsrət deyib ki, bəzi saytlarda hər hansı bir xəbərin şərhlərində qeyri-etik ifadələrin işlədilməsi çoxalıb. Bunun təhlükəli hal olduğunu vurğulayan idarə heyətinin üzvü, bunun qarşısının alınması üçün oxucuların həqiqi adı ilə qeydiyyatdan keçdikdən sonra şərh yazılmasına icazə verilməsi təklifini irəli sürüb.
Sonra “dəyirmi masa” müzakirələrlə davam edib. Tədbirdə Mətbuat Şurasının elan etdiyi “İnternet media ili” çərçivəsində nəzərdə tutulan işlər barədə məlumat verilib, eyni zamanda, internet mediada peşəkarlıq məsələlərinə toxunulub.

Paylaş:

Baxılıb: 841 dəfə