Rusiya mətbuatı Azərbaycan Prezidentinin yerli telekanallara müsahibəsindən sitatlar dərc edib

Bakı:

19 °C

72 %

6 m/s

Əlaqə

AZ RU EN

Ana səhifə / Siyasət / Rusiya mətbuatı Azərbaycan Prezidentinin yerli telekanallara müsahibəsindən sitatlar dərc edib

Rusiya mətbuatı Azərbaycan Prezidentinin yerli telekanallara müsahibəsindən sitatlar dərc edib

08.01.2025 [18:12]

Rusiyanın bir çox mətbu orqanı Azərbaycan Prezidenti İlham Əliyevin yerli televiziya kanallarına müsahibəsindən sitatlar dərc edib.

AZƏRTAC xəbər verir ki, “TASS” agentliyinin materiallarında Azərbaycan Prezidenti İlham Əliyevin Ermənistanın silahlandırılmasını region üçün yeni gərginliyə səbəb olacaq təhlükə mənbəyi hesab etdiyi bildirilir. Agentlik ölkə rəhbərinin Azərbaycanın Ermənistanın silahlanmasına kənardan baxmayacağına və bu prosesi dərhal dayandırmağı tələb etdiyinə dair sözlərinə diqqət çəkilib. “Fransa və onu silahla təmin edən digər ölkələr bu müqavilələri ləğv etməlidir. Artıq Ermənistana göndərilmiş silahlar geri qaytarılmalıdır. Bu, bizim şərtimizdir”, - deyə Azərbaycan Prezidenti vurğulayıb.

“İnterfaks” Azərbaycan Prezidentinin müsahibəsindən sitatlarla material dərc edib ki, burada dövlət başçısı Azərbaycan və Ermənistan arasında sərhədin delimitasiyası və demarkasiyası üzrə danışıqların növbəti raundunu elan edir.

“Veçernyaya Moskva” nəşri Prezident İlham Əliyevin sözlərinə istinadən qeyd edir: “İrəvandakı hakimiyyət dərk etməlidir ki, Azərbaycan Ermənistan üçün təhlükə yaratmır – Bakı Cənubi Qafqazda sülh və əməkdaşlığa yönəlib, ona mane olmaq lazım deyil”.

“Qazeta.ru” yazır ki, Prezident İlham Əliyev Azərbaycan və Ermənistan arasında münasibətlərin birbaşa danışıqlar yolu ilə normallaşdırılmasını vacib hesab edir.

“Vestnik Kavkaza” agentliyi Azərbaycan Prezidentinin respublikanın D-8 təşkilatına qəbul edilməsinin əhəmiyyəti barədə sözlərinə diqqət çəkib. Nəşrin yazdığına görə, Azərbaycan 2024-cü ilin sonunda “İslam Səkkizliyi”nə qoşulub və təxminən 30 ildən sonra təşkilata daxil olan ilk ölkə olub. Prezident İlham Əliyev qeyd edib ki, bu qərar Azərbaycanın beynəlxalq aləmdəki nüfuzunu göstərir.

“News.ru” portalı “Əliyev Fransa rəhbərliyini “yetişmədiyinə” görə tənqid edib” sərlövhəli materialında Azərbaycan liderinin Fransanın hazırkı rəhbərliyinin siyasi cəhətdən yetişməmiş olması ilə bağlı sözlərindən sitat gətirir. Prezident İlham Əliyev Fransanın siyasi səhnəsində azərbaycanofobiyaya əsaslanan konsensusa diqqət çəkib, deyə materialda qeyd olunur. “Bu, həm Avropa ölkəsinin indiki hakimiyyətləri, həm də onların əleyhdarları arasında müşahidə olunur. Prezident İlham Əliyev qeyd edib ki, eyni zamanda, Parisin Azərbaycana münasibətdə siyasəti erməni lobbisinin təsirini formalaşdırır. Beləliklə, onlar Fransada erməni icmasının dəstəyini əldə edirlər”, - deyə nəşr yazır.

“Hərbi icmal” nəşrindəki materialda bildirilir ki, Azərbaycan Prezidenti Cənubi Qafqazda sülhün bərqərar olmasının vacibliyini bəyan edib. O əlavə edib ki, Ermənistan Türkiyə ilə Azərbaycan arasında coğrafi maneə kimi çıxış etməməlidir. “Zəngəzur dəhlizi açıq olmalıdır və olacaq. Onlar bunu nə qədər tez başa düşsələr, bir o qədər yaxşıdır”, - deyə nəşr Prezident İlham Əliyevin sözlərindən sitat gətirir.

“PRAYM” saytı Azərbaycan Prezidenti İlham Əliyevin müsahibəsinə istinadən yazır ki, ölkə 2025-ci ildə “Azəri-Çıraq-Günəşli”də “dərin” qaz layihəsi çərçivəsində ilk qazı əldə etməyə ümid edir. Materialda qeyd olunur ki, Azərbaycan dövlətinin başçısı “Abşeron” yatağında qaz hasilatını 1,5 milyard kubmetrdən 5 milyard kubmetrə çatdırmaq üçün tərəfdaşlarla işləmək planlarını açıqlayıb.

Paylaş:

Baxılıb: 472 dəfə