Ford Fusion (Mondeo)

Bakı:

25 °C

60 %

4 m/s

Əlaqə

AZ RU EN

Ana səhifə / Maraqlı / Ford Fusion (Mondeo)

Ford Fusion (Mondeo)

24.04.2012 [21:01]

Ford Detroyt avtosalonunda Ford Fusion sedanının yeni nəslini təqdim etdi. O, Avropada Mondeo adı ilə satılacaq. Hazırda Fusion bizim bazarda münasib qiymətli kompakt hetçbek kimi tanınır, Amerikada isə bu model ömrü boyu orta ölçülü sedan kimi tanınıb. Bu avtomobil 2006-cı ildə Mazda 6-nın əvvəlki nəslinin şassisi üzərində istehsal olunub. 2009-cu ildə o, restaylinqə məruz qalıb, bunun nəticəsində model kifayət qədər yaxşı satılıb. Məlumdur ki, Amerika bazarı Avropa bazarından ciddi surətdə fərqlənir. ABŞ-da çoxlu sayda Ford modelləri var ki, amerikalılardan başqa, onları heç kim tanımır. Amma Ford konserni “One Ford” strategiyası çərçivəsində tədricən modellərin geniş çeşidliliyindən imtina etməyə başlayır və bununla da yeni avtomobillərin layihələşdirilməsinə və istehsalına çəkilən xərcləri azaldır. Odur ki, ABŞ-dakı Fusion ilə Avropadakı Mondeo eyni avtomobillərdir.
2013-cü model ilinin avtomobili Ford Mondeo üç növ mühərrik versiyaları ilə təklif olunur: benzin mühərriki, hibrid (Hybrid) və elektrik şəbəkəsi vasitəsilə enerji yığan hibrid (Energi). Benzin mühərrikləri dörd silindrli EcoBoost motorları ilə təmsil olunub. Onlardan biri 1,6 litr həcmə və 179 at gücünə, digəri isə 2,0 litr həcmə və 237 at gücünə malikdir (3,0 litr həcmli altı silindrli mühərrik artıq tarixə qovuşub). Hibrid mühərrikləri isə 2,0 litr həcmə və 185 at gücünə malik motorlarla (Atkinson tsikli ilə) təmsil olunacaq. Yeri gəlmişkən, Energi versiyası təkcə elektrik mühərriki ilə də hərəkət edə biləcək. Hibrid aqreqatlı avtomobil həm də tam ötürücü ilə təklif olunacaq. Qeyd edək ki, amerikanlar üçün Fusion modelinin əvvəlki versiyaları da tam ötürücülü idi.
Zahirən sedan olduqca cazibədar görkəm alıb və idman cizgiləri əldə edib, iri radiator barmaqlığı, daraldılmış əsas faralar, kuzovun iti və dəqiq xətləri, güclü kapot buna əyani sübutdur. Bu avtomobildə ötən il ictimaiyyətə təqdim edilmiş Evos konseptinin cizgiləri sezilir. Yeni Fusion bütün müasir tələblərə cavab verir. Mərkəzi konsol sensor displeylə təchiz olunub, əsas idarəetmə düymələri sükana keçirilib. MyFordTouch sistemini səs göstərişləri vasitəsilə də idarə etmək olar.
Avtomobil kifayət qədər zəngin elektronika paketi əldə edib: dayandırıcı əyləcin elektrik ötürücüsü, hərəkət zolağına nəzarət edən sistem, parkinqə yardım edən sistem, görünməyən zonalara nəzarət edən sistem, adaptiv kruiz-kontrol və əlbəttə ki, təhlükəsizlik yastıqları. Bütün bunlar artıq baza komplektasiyasına daxildir. Yeri gəlmişkən, 1,6 litr həcmli mühərriki olan Fusion 2013 avtomobili avtomat transmissiyalı ilk Ford modelidir ki, Auto-Start-Stop sistemi ilə təchiz olunub. Bu sistem atmosferə buraxılan zərərli tullantıların miqdarını azaldır və yanacağa 3,5% qənaət edir.
Avropada yeni avtomobilin premyerası payızda baş tutacaq. Hibrid motorların Avropa bazarına ixrac edilməsi hələlik planlaşdırılmır. Buna görə də Ford alternativ variant qismində dizel modifikasiyalarını nəzərdə tutub.
Mənbə: Avtomobil.az

Paylaş:

Baxılıb: 2806 dəfə