Bu günün gəncliyi...

Bakı:

20 °C

77 %

4 m/s

Əlaqə

AZ RU EN

Ana səhifə / MEDİA / Bu günün gəncliyi...

Bu günün gəncliyi...

16.05.2023 [11:06]

Sabahın nüfuzlu Azərbaycanı

“Mənim üçün ən əziz nemət Azərbaycanın uşaqlarıdır, Azərbaycanın gəncləridir. Çünki Azərbaycan Prezidenti kimi mən bu gün Azərbaycanın gələcəyi haqqında düşünürəm. Azərbaycanın gələcəyi isə Azərbaycanın gənclərindən və uşaqlarından asılıdır”
Heydər Əliyev

Bir millətin mövcud olması üçün onun sağlam gəncliyinin olması vacib şərtdir. Bu baxımdan gənc nəslin düzgün yetişdirilməsi hər zaman ölkə siyasətində önəmli yer tutub. Gənclərin sağlam, vətənpərvərlik ruhunda böyüməsi, dövlət siyasətinin ən mühüm istiqamətlərindən biridir. Bu istiqamətdə həyata keçirilən işlər isə hər zaman çoxşaxəli olub.
Gəncliyi ayaqda saxlayan, daim səfərbər edən bir hiss var - vətənpərvərlik, milli şüura bağlılıq. Gənclikdə milli ruhun formalaşması mərhələləri müxtəlif dövrlərə təsadüf edir. Məktəbdə təlqin edilən vətənpərvərlik ruhu sonrakı dönəmlərdə daha da təkmilləşir. Bəzən deyirlər ki, müəyyən qisim gənclər vətənpərvərliyin nə olduğunu bilmir. Ancaq belə deyil. Hər bir gəncdə bu hiss var, sadəcə, o hissin üzə çıxarılması üçün bəlli mexanizm olmalıdır.
Çoxlarına məlumdur ki, gənclik zamanın, dövrün hərəkətverici qüvvəsidir. Hər bir sivil cəmiyyətin sağlam düşüncəli, təfəkkürlü gənclərə böyük ehtiyacı var. Aydın məsələdir ki, milli mənlik şüuruna malik olan gənclərin formalaşması üçün müəyyən zaman lazımdır.
Mövzu barədə fikirlərini “Yeni Azərbaycan”la bölüşən Gənclər Mərkəzi İctimai Birliyinin icraçı direktoru Kənan Qubadzadə bildirib ki, hər bir demokratik dövlətinin qarşısında duran əsas məsələlərdən biri də gələcəyini etibar edəcəyi sağlam düşüncəli yeni nəslin yetişdirilməsidir. Onun sözlərinə görə, sağlam əqidəyə malik olmaq sağlam düşüncə ilə bağlıdır. Bütün bunların da kökündə fiziki və mənəvi cəhətdən sağlam tərbiyə olunan gənclərimiz durur: “Vətənpərvərlik hisslərinin tərbiyə edilməsinin əsas mahiyyəti vətənə məhəbbət və öz şəxsi maraqlarını vətən yolunda fəda etmək, milli-mədəni dəyərlərin qorunmasına əsaslanan emosional bağlılıqdır.

Bu bağlılıq həm də özünün aid olduğu millətin etnik, mədəni, siyasi və tarixi xüsusiyyətlərinə arxalanan milli hissiyyat və ya milli qürur kimi də hallanır. Vətənpərvərliyin kökündə min illər boyu yaşamış, möhkəmlənmiş, öz ana torpağına, dilinə və adət-ənənələrinə bağlanmış dövlətçilik durur. Millətin və dövlətçiliyin formalaşması şəraitində vətənpərvərlik onun inkişafının ümummilli anlarını əks etdirən ictimai düşüncənin tərkib hissəsinə çevrilir”.
K.Qubadzadə qeyd edib ki, dövlətimizin gənclər siyasətinin əsas məqsədi məhz gənclərin dövlətin və cəmiyyətin sosial-iqtisadi, ictimai-siyasi və mədəni həyatında iştirakını artırmaq, ölkənin gələcək inkişafında məsuliyyətini yüksəltməkdən ibarətdir: “Cənab Prezident tərəfindən uğurla həyata keçirilən gənclər siyasəti bu gün gənclərin ölkə həyatının bütün sahələrindəki fəallığını daha da artırıb. Aparılan uğurlu siyasətin nəticəsidir ki, artıq Azərbaycan gəncliyi cəmiyyətin inkişafında fəal sosial təbəqəyə çevrilib. Ölkədə aparılan islahatlarda gənclərin önə çəkilməsi, idarəçilikdə onlara göstərilən etimad bir daha bunu sübut etdi ki, artıq Azərbaycanda yüksək intellektə malik, vətənpərvər, işini mükəmməl bilən gənclər ordusu formalaşıb.

Bundan sonra da gənclərdə milli mənlik şüurunun daha da inkişaf etdirilməsi və onlarda vətənpərvərlik hisslərinin artırılması əsas prioritet məsələlərdən olmalıdır. Milli-mənəvi dəyərlərin qorunması üçün ən yaxşı vasitə təbliğat və təhsildir. Gənclər arasında milli-mənəvi dəyərlərin qorunması istiqamətində işlər görülməli, onlarda vətənpərvərlik və vətəndaşlıq hissləri gücləndirilməlidir. Xüsusən bu istiqamətdə təhsil prosesinin keyfiyyətini artırmalı, elmi-nəzəri və metodiki tövsiyələr işləyib hazırlanmalı, normativ-hüquqi bazanın yaradılmasına nail olunmalıdır. Gənclərin yad təsirlərdən qorunması üçün həm ailə daxilində, həm də təhsil ocaqlarında tərbiyəvi işlər aparılmalıdır. Bütün bunlar aidiyyətı strukturların bilavasitə nəzarəti altında məqsədyönlü şəkildə aparılmalıdır”.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Gənc nəslin milli mənlik şüurunun inkişaf etdirilməsi və vətənpərvərlik hisslərinin tərbiyəsi” istiqaməti üzrə hazırlanmışdır

Paylaş:

Baxılıb: 737 dəfə