Paytaxtın siması dəyişəcək

Bakı:

10 °C

81 %

5 m/s

Əlaqə

AZ RU EN

Ana səhifə / İqtisadiyyat / Paytaxtın siması dəyişəcək

Paytaxtın siması dəyişəcək

09.01.2024 [10:50]

Bakının 2040-cı ilədək inkişafına dair Baş planı təsdiqlənib

Çoxdan gözlənilən vacib sənəd təsdiqlənib. Söhbət Bakı şəhərinin 2040-cı ilə qədərki dövrdə inkişafına dair Baş planının təsdiq edilməsindən gedir. Bununla bağlı Baş nazir Əli Əsədov müvafiq Qərar imzalayıb. Qərar Şəhərsalma və Tikinti Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə haqqında 29 iyun 2012-ci il tarixli qanunun tətbiqi barədə ölkə Prezidentinin 4 sentyabr 2012-ci il tarixli Fərmanına əsasən, Dövlət Şəhərsalma və Arxitektura Komitəsinin təklifi nəzərə alınaraq qəbul edilib.

Dünya təcrübəsinin və müasir çağırışların nəzərə alınması

Son illərdə meqapolis kimi inkişaf edən paytaxtımızın 2040-cı ilə qədərki dövrdə inkişafına dair Baş planı hazırlanarkən dünya şəhərlərinin qabaqcıl təcrübəsi, müasir şəhərsalma trendləri, yeni çağırışlar və əlbəttə ki, perspektiv inkişaf, genişlənmə hədəfləri nəzərə alınıb. Bakı onilliklər boyunca qədimliyin və müasirliyin vəhdətində inkişaf etdirilib. Paytaxtımız üçün xarakterik haldır ki, bu gün həm tarixi tikililər - İçəri şəhər, Qız qalası, Şirvanşahlar sarayı, Atəşgah və s., həm də müasir binalar - Heydər Əliyev Mərkəzi, Ağ Şəhər, Üç Alov qüllələri və digərləri bir harmoniya halında şəhərin gözəllik rəmzlərini təşkil edir. Yeni Baş planda da bu ənənə qırmızı xətt kimi saxlanılacaq.

Sənədin paytaxtın perspektiv inkişafı baxımından mühüm önəmi nəzərə alınmaqla onun hazırlanmasına kifayət qədər ciddi yanaşma ortaya qoyulub. Belə ki, Bakı şəhərinin təsdiq edilmiş Baş planı Azərbaycan Respublikası Dövlət Şəhərsalma və Arxitektura Komitəsinin sifarişi ilə beynəlxalq tenderin qalib “AS+P Albert Speer + Partner Gmbh” şirkəti (Almaniya) tərəfindən hazırlanıb. “AS+P Albert Speer +Partner Gmbh” şirkəti tərəfindən Baş plan layihəsinin hazırlanmasına yerli layihə təşkilatı qismində Bakı Dövlət Layihə İnstitutu, həmçinin mühəndis-kommunikasiya sistemləri, nəqliyyat və iqtisadi aspektlərin işlənməsi məqsədilə “Ramboll UK” (Böyük Britaniya) və “EY Advisory” (Fransa) şirkətləri cəlb edilib.

Dörd mühüm prioritet

Baş Plan paytaxtın 212,3 min hektarlıq bütün inzibati ərazisini əhatə etməklə növbəti 20 il ərzində şəhərin əsas inkişaf prioritetlərini özündə əks etdirir. O cümlədən, güclü və dayanıqlı inkişafı təmin edəcək mütəşəkkil çoxmərkəzli şəhər, ərazilərdən kompleks istifadə nəticəsində formalaşan dayanıqlı şəhər mühiti, mədəni və tarix-memarlıq irsinin qorunması, ərazi zonalaşdırılması, əsaslı tikinti, nəqliyyat və sosial infrastrukturlar, kommunal sistemlər, ətraf mühitin təmizlənməsi və ərazilərin abadlaşdırılması tədbirləri habelə post-sənaye dövrünə keçidi təmin edəcək yeni şəhər iqtisadiyyatı məsələlərini özündə ehtiva edir. Bütövlükdə sənəddə şəhərin perspektiv inkişafını təmin etmək məqsədilə dörd mühüm prioritet müəyyənləşdirilib. Bunlar aşağıdakılardır:

-Bakının dayanıqlı inkişafı,

-Şəhər və ətraf mühitin regenerasiyası,

-Şəhərin memarlıq siması və tarixi irsə qayğı,

-Yeni məzmun.

Eyni zamanda, hər prioritet üzrə konkret hədəflər müəyyənləşdirilib. Məsələn, sonuncu yeni məzmun prioritetinə nəzər salaq. Bu prioritet əsasən yeni trendlərin, innovasiyaların şəhər həyatına gətirilməsini özündə ehtiva edir. Bura müasir sənaye sahələrinin və yeni sektorların yaradılması, Bakının regionun ən yaxşı turizm məkanına çevrilməsi, mədəni-kütləvi tədbirlərin təşviqi, yaradıcı və neo-ənənəvi sahələrin dəstəklənməsi, xidmətlərin rəqəmsallaşdırılması, şəhərin və ölkənin ahəngdar inkişafının təmin edilməsi hədəfləri daxildir.

Mübariz ABDULLAYEV

Paylaş:

Baxılıb: 568 dəfə