2010-cu il ölkə sahibkarları üçün əlamətdar olub

Bakı:

21°C

37%

7m/s

Əlaqə

AZ RU EN

Ana səhifə / İqtisadiyyat / 2010-cu il ölkə sahibkarları üçün əlamətdar olub

2010-cu il ölkə sahibkarları üçün əlamətdar olub

11.01.2011 [09:09]

ötən il 1430 sahibkara 115 milyon manat güzəştli kredit verilib
Azərbaycan hökumətinin həyata keçirdiyi mükəmməl iqtisadi siyasət 2010-cu ildə bütün bölmələrdə olduğu kimi, sahibkarlıq sektorunda da yüksək inkişaf göstəricilərinin qeydə alınmasına səbəb olub. 2010-cu ilin əvvəllərindən başlayaraq hökumətin sahibkarlara maliyyə dəstəyinin gücləndirməsi və sahibkarlığa başlamaq istəyənlərə əlverişli imkanların yaradılması bu sahədə inkişaf meyillərinin müşahidə olunması ilə nəticələnib. Bu tendensiya həm sahibkarlıqla məşğul olmaq istəyənlərin sayının, həm də həyata keçirilən investisiya layihələrinin miqyasının genişlənməsini stimullaşdırıb. ötən il ərzində Sahibkarlığa Kömək Milli Fondu (SKMF) tərəfindən 1430 sahibkara 115 milyon manat güzəştli kredit verilib. Həmin kreditlərin 99,8 faizi regionların payına düşür. Verilmiş kreditlər hesabına 5600 yeni iş yerinin yaradılması nəzərdə tutulur.
Prezident İlham Əliyev tərəfindən uğurla davam etdirilən sosial-iqtisadi inkişaf strategiyasının mühüm istiqamətlərindən biri ölkədə sahibkarlığın inkişaf etdirilməsindən ibarətdir. Dövlət başçısı sahibkarların bütün qayğılarına diqqətlə yanaşıb və onların ən yaxın dostu olduğunu bəyan edib. Prezident İlham Əliyevin rəhbərliyi ilə ölkəmizdə son 7 ildə sahibkarlıq sektorunda davamlı islahatların həyata keçirilməsi, biznes mühitinin daha da yaxşılaşdırılması, qanunvericilik bazasının təkmilləşdirilməsi, eləcə də, yerli və xarici investisiyaların, müasir texnologiyaların cəlb edilməsi və bu yolla yüksəkkeyfiyyətli, rəqabət qabiliyyətli məhsulların istehsalı və digər sahələrlə bağlı sistemli tədbirlərin miqyası daha da genişlənib. Sahibkarların hüquqlarının müdafiəsi və sahibkarlığın inkişafına mane olan müdaxilələrin qarşısının alınması ilə bağlı qətiyyətli addımlar atılıb.
2010-cu ildə bölgələrdə fəaliyyət göstərən sahibkarlıq subyektlərinin kreditlə təmin edilməsi ilə bağlı keçirilən kredit yarmarkalarının sayı da çoxalıb. ötən il bütün rayonlarda fəaliyyət göstərən sahibkarlıq subyektləri güzəştli kreditlərlə təmin olunub. Verilən kreditlərin 74 faizi aqrar infrastruktur sahələrinin (soyuducu və taxıl anbarları kompleksləri) inkişafına, kənd təsərrüfatı məhsullarının istehsalı və emalına, 21 faizi sənaye məhsullarının istehsalı və emalına, 5 faizi turizm infrastrukturunun inkişafına yönəldilib. Bununla yanaşı, ötən il sahibkarlıq sektorunda maliyyələşmə mexanizminin təkmilləşdirilməsi və əhatə dairəsinin artırılması ilə yanaşı, yeni texnologiyaların tətbiqi ilə bağlı da mühüm yeniliklər baş verib. İqtisadiyyatın prioritet sahələrinin inkişafı, həmçinin, müasir standartlara cavab verən, ixracyönümlü və rəqabət qabiliyyətli istehsal və emal müəssisələri yaradılıb, müasir texnologiyaların tətbiqi ilə əlaqədar layihələr həyata keçirilib.
Sahibkarlığa dövlət dəstəyi 2011-ci ildə daha da gücləndiriləcək və güzəştli kreditlərlə əhatə olunan sahibkarların sayı daha da artacaq. Belə ki, Sahibkarlığa Kömək Milli Fondu tərəfindən bu il sahibkarlara 125 milyon manat həcmində güzəştli kreditlər verilməsi nəzərdə tutulur. Bu, ötən illə müqayisədə 10 milyon manat artıq vəsait deməkdir. Yəni, 2011-ci ildə əlavə olaraq daha 200 sahibkara kredit veriləcək. 2011-ci ildə orta hesabla 1600 sahibkar güzəştli kreditlərlə təmin olunacaq. Yeri gəlmişkən, artıq sahibkarların aldıqları kreditləri geri qaytarmaq imkanları da artıb və bu il 90 milyon manatdan çox vəsait Sahibkarlığa Kömək Milli Fonduna ödənilib. Bu isə o deməkdir ki, 2011-ci ildə sahibkarlara verilən ümumi kreditlərin təxminən 35 milyon manatı dövlət büdcəsindən ayrılacaq, qalan 90 milyon manat isə əvvəllər verilmiş kreditlərin geri qaytarılması hesabına təmin olunacaq.
Hazırda hökumətin həyata keçirdiyi siyasət sahibkarlığa dövlət himayəsinin gücləndirilməsinə, sahibkarlara dövlət dəstəyi tədbirlərinin səmərəsinin yüksəldilməsinin təmin edilməsinə yönəldilib. Dövlət Sahibkarlığa Kömək Milli Fondunun vəsaitləri ilə yanaşı, digər maliyyə mənbələri, eləcə də, maliyyə-kredit təşkilatlarının, bankların, Kənd Təsərrüfatı üzrə Kredit Agentliyinin və digər qurumların güzəştli şərtlərlə verilən kreditləri hesabına 100-lərlə sahibkarın maliyyə təminatı yaxşılaşdırılacaq. Beləliklə, bu il ölkəmizdə sahibkarların fəaliyyətinin daha da stimullaşdırılması üçün davamlı tədbirlər həyata keçiriləcək.Bu tendensiya sahibkarların aldıqları vəsaitlər hesabına gəlir əldə etdiklərini və kreditləri geri qaytarmaq imkanlarına malik olduğunu təsdiqləyir. Hər il geri ödənilən kreditlər isə əlavə maliyyələşmə üçün əlverişli şərait yaradır. Bu isə növbəti illərdə sahibkarlara daha çox kredit verilməsini şərtləndirir.
Onu da qeyd edək ki, verilən kreditlərin 99 faizi regionların payına düşür ki, bu da bölgələrdə sahibkarlıq fəaliyyətinin dada da inkişafına geniş imkan yaradır. Son illərdə rayonlarda yüzlərlə yeni istehsal sahəsinin yaradılması və ölkəmizdə istehsal olunan kənd təsərrüfatı məhsullarının həcminin artması milli sahibkarlıq sektorunun yüksək inkişafının göstəricisidir. Beləliklə, bölgələrdə sahibkarlığın intensiv inkişafı hər il daha geniş vüsət alır və bu tendensiya qarşıdakı illərdə yeni nailiyyətlərin əldə olunmasına impuls verir.
Elbrus CƏFƏRLİ

Paylaş:

Baxılıb: 1265 dəfə