Bir həftədə 4 yarımstansiya, 1 ES...

Bakı:

16 °C

88 %

14 m/s

Əlaqə

AZ RU EN

Ana səhifə / İqtisadiyyat / Bir həftədə 4 yarımstansiya, 1 ES...

Bir həftədə 4 yarımstansiya, 1 ES...

15.02.2022 [10:17]

Qarabağ və Şərqi Zəngəzurda isə onların sayı doqquza çatdı

Mübariz ABDULLAYEV

Yeni generasiya güclərinin yaradılması

Generasiya gücləri Azərbaycanın enerji müstəqilliyinin yüksək səviyyədə təmin olunması deməkdir. Respublikamız yeni generasiya güclərinin yaradılması istiqamətində fəaliyyətini nəinki dayandırmır, əksinə, daha da genişləndirir. Bunu son günlərin statistikasında da görmək mümkündür. Prezident İlham Əliyevin bəhs olunan dövrdə iştirak etdiyi tədbirlərdən bir neçəsi yeni generasiya güclərinin təməlqoyma və yaxud istifadəyə verilməsi ilə bağlı olub. Son 1 həftə ərzində Bakıətrafı ərazilərdə 2 yarımstansiya, 1 stansiya istifadəyə verilib. İşğaldan azad edilmiş ərazilərdə isə istifadəyə verilmiş generasiya güclərinin sayı 9-dur.

Beləliklə, yanvarın 13-də Səudiyyə Ərəbistanı Krallığının “ACWA Power” şirkəti tərəfindən Azərbaycanda inşa ediləcək 240 MVt gücündə “Xızı-Abşeron” Külək Elektrik Stansiyasının Gülüstan sarayında təməlqoyma mərasimi keçirilib. Tədbirdə çıxış edən Prezident İlham Əliyev bunu əlamətdar hadisə kimi dəyərləndirib. Gələn il istifadəyə verilməsi nəzərdə tutulan həmin külək elektrik stansiyasına sərmayə qoyuluşu bütünlüklə xarici şirkətə məxsusdur. Fevralın 8-də Prezident İlham Əliyev yenidən qurulan dövlətlərarası strateji əhəmiyyətə malik 330/220/110/10 kilovoltluq “Yaşma” qovşaq yarımstansiyasının açılışında iştirak edib. Burada hər birinin gücü 250 meqavat olan üç yeni avtotransformator quraşdırılıb. Nəticədə yarımstansiyanın ümumi gücü 110 meqavat artırılmaqla 750 meqavata çatdırılıb. Bundan üç gün sonra - fevralın 11-də isə Azərbaycan Prezidenti “Qobu” Enerji Qovşağının - yükötürmə gücü 1000 meqavat olan 330/220/110 kilovoltluq “Qobu” yarımstansiyasının və 385 meqavatlıq “Qobu” Elektrik Stansiyasının açılışına qatıldı. “Qobu” Enerji Qovşağı ölkəmizdə, xüsusilə Bakıda və Abşeron yarımadasında elektrik enerjisinə sürətlə artan tələbatı ödəmək, paytaxtın və yarımadanın regionlardakı elektrik stansiyalarından asılılığını azaltmaq, elektrik enerjisi ilə təchizatın dayanıqlılığını və etibarlılığını maksimum səviyyəyə çatdırmaq, texniki itkiləri azaltmaq, sistem qəzası təhlükəsini minimuma endirmək, Bakıda və Abşeron yarımadasında tənzimləyici generasiya gücü funksiyasını üzərinə götürərək 500 kilovoltluq “Abşeron” yarımstansiyasının əvəzedicisi funksiyasını daşımaq, paytaxtın 330 kilovoltluq dairəvi elektrik təchizat sistemini yaratmaq və digər amillər baxımından olduqca əhəmiyyətlidir.

Qarabağ bölgəsində yeni elektrik stansiyaları

İşğaldan azad olunmuş ərazilərdə güclü elektrik enerjisi təchizatı sisteminin yaradılması Prezident İlham Əliyev tərəfindən müəyyənləşdirilən prioritet vəzifələr sırasında yer alır. Çünki zəruri elektrik enerjisi təchizatı sistemi yaradılmadan işğaldan azad olunmuş ərazilərdə əhalinin məskunlaşmasını və iqtisadi fəallığı təmin etmək mümkün deyil. Əslində, dövlət başçısının tapşırığına uyğun olaraq işğaldan azad edilmiş ərazilərin elektrik enerjisi ilə təminatı sistemi ötən bir ildə tam qurulub.

Hazırda bəhs olunan ərazilərin enerji dayanıqlılığının daha da gücləndirilməsi üçün yeni layihələrin icrası davam etdirilir. Prezident İlham Əliyev və birinci xanım Mehriban Əliyeva fevralın 13-də Ağdam rayonuna səfərləri çərçivəsində Ağdam şəhərində yeni inşa olunmuş “Ağdam-1” və “Ağdam-2” yarımstansiyalarının, o cümlədən “Qarabağ” Regional Elektrik Şəbəkəsinin Rəqəmsal İdarəetmə Mərkəzinin açılışında iştirak ediblər. Bildirilib ki, işğaldan azad edilən Ağdam rayonunun Azərbaycanın ümumi enerji sisteminə qoşulması, dayanıqlı və fasiləsiz elektrik enerjisi ilə təchiz edilməsi üçün “Azərenerji” ASC tərəfindən “Xındırıstan” yarımstansiyasından 35 kilometr məsafədə ikidövrəli 110 kilovoltluq yüksəkgərginlikli elektrik verilişi xətti çəkilib. Demək olar ki, xətt tam minalanmış ərazidən keçib. Bəzi yerlərdə minalar arasından bir neçə metr enində cığır açılaraq bu çətin vəzifə icra edilib. Ən əsası isə Ağcabədidən Xındırıstana, oradan da “Ağdam-1” və “Ağdam-2” yarımstansiyalarına qədər ümumilikdə 63 kilometr məsafədə 110 kilovoltluq xəttin üzərində ildırımdan mühafizə və yarımstansiyalararası informasiya mübadiləsi üçün 24 damarlı fiberoptik kabel çəkilib. Bununla da Ağdama təkcə elektrik xətti deyil, həm də ən yüksək ötürmə qabiliyyətli sürətli internet xətti gətirilib.

Prezident İlham Əliyev fevralın 13-də Qarabağ bölgəsinə səfəri çərçivəsində, həmçinin yenidən qurulan 110/35/10 kilovoltluq “Ağcabədi” yarımstansiyasının açılışını edib. 40 il əvvəl tikilən və istismar müddəti başa çatan, eləcə də artan tələbatı ödəyə bilməyən 110/35/10 kilovoltluq “Ağcabədi” yarımstansiyası genişləndirilərək rəqəmsal qaydada tam yenidən qurulub. Yarımstansiyanın gücü 23 meqavolt-amper artırılaraq 126 meqavolt-amperə çatdırılıb. Burada 110 kilovoltluq açıq paylayıcı qurğu sökülərək yenidən qurulub.

Beləliklə, Qarabağ və Şərqi Zəngəzurda yeni yarımstansiyaların istifadəyə verilməsi Azərbaycanın enerji infrastrukturunun güclənməsini təmin edir.

Paylaş:

Baxılıb: 820 dəfə