Bakı gəmiqayırma zavodu ilə “Şahdəniz” konsorsiumu arasında müqavilə imzalanıb

Bakı:

13 °C

88 %

7 m/s

Əlaqə

AZ RU EN

Ana səhifə / İqtisadiyyat / Bakı gəmiqayırma zavodu ilə “Şahdəniz” konsorsiumu arasında müqavilə imzalanıb

Bakı gəmiqayırma zavodu ilə “Şahdəniz” konsorsiumu arasında müqavilə imzalanıb

24.04.2014 [09:07]

Aprelin 23-də “Bakı Gəmiqayırma Zavodu” Məhdud Məsuliyyətli Cəmiyyəti (MMC) və “bp Exploration” (“Şahdəniz”) MMC arasında sualtı tikinti gəmisinin layihələndirilməsi və tikintisi üzrə müqavilə imzalanıb.
Azərbaycan Respublikası Dövlət Neft Şirkətinin (ARDNŞ) mətbuat xidmətindən AzərTAc-a bildiriblər ki, mərasimdə ARDNŞ-in prezidenti Rövnəq Abdullayev çıxış edərək bu müqavilənin imzalanmasının Bakı gəmiqayırma zavodunun istehsal potensialının beynəlxalq miqyasda təsdiqlənməsinin bariz təzahürü olduğunu deyib.
Bildirilib ki, Prezident İlham Əliyevin uzaqgörən siyasəti nəticəsində tikilib istismara verilmiş zavod artıq dövlətimizin başçısının “XXI əsrin müqaviləsi” adlandırdığı “Şahdəniz-2” layihəsi çərçivəsində ilk böyük kontraktını imzalayır. Bu, son dərəcə əlamətdar hadisədir.
Azərbaycan Respublikasının iqtisadiyyat və sənaye naziri Şahin Mustafayev əlamətdar hadisə münasibətilə gəmiqayırma zavodunun kollektivini və tərəfdaş şirkətləri təbrik edərək, bildirib ki, sualtı tikinti gəmisi “Şahdəniz-2” layihəsinin icrası üçün mühüm əhəmiyyət kəsb edir. Nazir ən mürəkkəb sualtı texniki işlərin həyata keçirilməsi üçün nəzərdə tutulan bu gəminin Bakı gəmiqayırma zavodunda uğurla inşa olunacağına əminliyini ifadə edib.
Sonra bp şirkətinin Azərbaycan, Gürcüstan, Türkiyə üzrə regional prezidenti Qordon Birrell və “Bakı Gəmiqayırma Zavodu” MMC-nin baş meneceri Devid Loh müqaviləni imzalayıblar.
Onlar görüləcək işlərin beynəlxalq standartlara tam uyğun şəkildə həyata keçiriləcəyini, Azərbaycan iqtisadiyyatında ən müasir və qabaqcıl dünya texnologiyalarının tətbiq olunduğunu vurğulayıblar.
Mərasimdə qeyd edilib ki, artıq bundan sonra Azərbaycan üçün tələb olunan bütün gəmilər məhz bu zavodda tikiləcək. Bütün bunlar son illər respublikamızda həyata keçirilən layihələrdə maksimum yerli işçi qüvvəsindən və yerli şirkətlərin xidmətindən istifadə olunması istiqamətində aparılan işlərin tərkib hissəsidir.
Bildirilib ki, hazırda Xəzər Qazma şirkətinin (CDC) sifarişinə əsasən, yeni üzən qazma qurğusunun pantonları da bu zavodda inşa olunur. “Şahdəniz” qaz-kondensat yatağının işlənilməsinin ikinci mərhələsi çərçivəsində istifadə olunacaq sualtı tikinti gəmisinin inşaat işlərinin 2017-ci ilin ikinci yarısında tamamlanması nəzərdə tutulub. Çoxfunksiyalı quraşdırma, elastik sualtı kabel/boruların tikintisinə dəstək və dalğıc işlərini təmin etmək gücünə malik gəmi “Keppel Offshore & Marine” şirkətinin qolu olan “Marine Technology Development” tərəfindən layihələndirib.
Bakı gəmiqayırma zavodu ARDNŞ (65 faiz ), Azərbaycan İnvestisiya Şirkəti (25 faiz) və “Keppel O & M.” şirkəti (10 faiz) tərəfindən təsis edilib.

Paylaş:

Baxılıb: 1299 dəfə