İstanbulda 28-ci Avrasiya İqtisadi Zirvəsi işə başlayıb

Bakı:

13 °C

82 %

5 m/s

Əlaqə

AZ RU EN

Ana səhifə / İqtisadiyyat / İstanbulda 28-ci Avrasiya İqtisadi Zirvəsi işə başlayıb

İstanbulda 28-ci Avrasiya İqtisadi Zirvəsi işə başlayıb

07.05.2025 [15:03]

İstanbulda Mərmərə Qrupu Strateji və Sosial Araşdırmalar Vəqfi tərəfindən təşkil olunan 28-ci Avrasiya İqtisadi Zirvəsi işə başlayıb.

AZƏRTAC xəbər verir ki, bu il “Yaşanabilən bir dünya üçün dialoq” mövzusunda təşkil edilən tədbirdə 50-yə yaxın ölkədən 300-dən çox siyasətçi, diplomat, akademik, dini lider və iş adamının iştirakı gözlənilir.

İki gün davam edəcək tədbirdə qlobal iqtisadiyyat, iqlim böhranı, miqrasiya, ticarət müharibələri və regional sabitlik kimi mövzularda fürsət və təhdidlər bütün aspektləri ilə müzakirə olunacaq.

Bu gün keçirilən açılış mərasimində çıxış edən İstanbul valisi Davut Gül, Türkiyə İxracatçılar Məclisinin (TİM) sədr müavini Ahmet Fikret Kileci, Mərmərə Qrupun rəhbəri Akkan Suver dünyada baş verən miqrasiya və ticarət müharibələri kimi qlobal problemlərin əsas səbəbinin beynəlxalq sistemin ədalətsizliyi, iqtisadi balansın pozulması ilə əlaqələndiriblər. Həmçinin dünyada baş verən dəyişikliklər və transformasiyanın sürətləndiyi bildirilərək bu prosesə uyğunlaşmağın əhəmiyyətli ola biləcəyi qeyd olunub. Qeyd olunub ki, qlobal sistem müharibələr, terrorizm və iqtisadi dalğalanmalara qarşı ortaq reaksiya verə bilmir. Bu dövrdə dialoq, anlaşma və regional əməkdaşlıq hər zamankından daha çox əhəmiyyət kəsb edir.

Zirvə çərçivəsində “Qlobal liderlərin rolu” başlığı altında təşkil olunacaq paneldə beynəlxalq siyasətə yön verən liderlərin populizmdən bəhrələnən yeni diplomatiya üslubu müzakirə ediləcək.

Qeyd edək ki, Azərbaycan Milli Elmlər Akademiyasının fəxri üzvü, Nobel mükafatı laureatı, dünyaşöhrətli alim Aziz Sancar builki zirvə toplantısının şərəf qonağıdır.

Xatırladaq ki, Mərmərə Qrupu Strateji və Sosial Araşdırmalar Vəqfi yaradılmasının 40-cı ildönümü münasibətilə 16 nominasiya üzrə mükafat təsis edib. Vəqfin əbədiyyətə qovuşan üzvlərinin və könüllülərinin adlarının yaşadılması məqsədi daşıyan nominasiyalar arasında Azərbaycan xalqının Ulu Öndəri Heydər Əliyevin xatirəsinə “Türk Dünyası Mükafatı” da var. Ümummilli Liderin adına həsr edilən mükafata Aziz Sancar layiq görülüb.

Mükafatlar “Süleyman Dəmirəl-Demokratiya”, “Zhelyu Zhelev-Fəlsəfə”, “Erhard Busek-İdarəçilik”, “Bernard Levis-Tarix”, “Corc Maroviç-Mədəniyyətlərarası Dialiq”, “Şahap Kocatopçu-İxracat”, “Hüsamettin Kavi-Sənaye”, “Jak Kamhi-Sevgi və Sülh”, “Ahmet Samsunlu- Ətraf Mühit”, “Yüksel Çengel-Siyasət”, “Ogan Soysal-Xarici İşlər”, “Yalçın Sönməz-Sənaye Bölgəsi”, “Orsçelik Balkan-Yaradıcı Düşüncə”, “Sami Kohen-Media” və “Hadi Türkmen-Əngəlsiz Həyat” nominasiyaları üzrə hazırlanıb.

28-ci Avrasiya İqtisadi Zirvəsində mükafatlar sahiblərinə təqdim ediləcək.

Paylaş:

Baxılıb: 447 dəfə