Aqrar sahədə yeni layihələr

Bakı:

21 °C

46 %

10 m/s

Əlaqə

AZ RU EN

Ana səhifə / İqtisadiyyat / Aqrar sahədə yeni layihələr

Aqrar sahədə yeni layihələr

19.03.2025 [09:50]

Azərbaycan İƏT ölkələri ilə imkanları nəzərdən keçirir

Bakıda keçirilən XII Qlobal Bakı Forumu çərçivəsində ölkəmizdə səfərdə olan İqtisadi Əməkdaşlıq Təşkilatının (İƏT) Baş katibi Əsəd Məcid Xanın rəhbərlik etdiyi nümayəndə heyəti Azərbaycanda kənd təsərrüfatında aparılan islahatlar və əldə edilən nəticələrlə tanış olmaq məqsədilə kənd təsərrüfatı naziri Məcnun Məmmədovla görüşüb. Görüşdə İƏT və Azərbaycan arasında aqrar sahədə əməkdaşlığın mövcud vəziyyəti və yeni imkanlar barədə müzakirələr aparılıb. İƏT rəhbəri kənd təsərrüfatı sahəsində əlaqələrin genişləndirilməsində maraqlı olduğunu bildirib.

Dayanıqlı İnkişaf Məqsədlərindən irəli gələn hədəflər

Azərbaycan hökuməti qida və ərzaq təhlükəsizliyinin etibarlı təminatında mühüm yer tutan kənd təsərrüfatının inkişafında müasir yanaşmalara, aqrar modellərə xüsusi üstünlük verir və bu istiqamətdə ən qabaqcıl aqrar institutlar, elmi-innovasiya mərkəzləri ilə sıx əməkdaşlıq edir. Dayanıqlı İnkişaf Məqsədlərində qarşıya qoyulmuş əsas istiqamətlərdən biri kənd təsərrüfatına müasir inkişaf meyarlarını gətirmək və müxtəlif ölkələrlə qarşılıqlı əməkdaşlığı gücləndirməlkdir. Qarşıya qoyulan hədəflərə nail olmaq üçün İƏT ölkələri ilə əlaqələrin inkişafı da əsas niyyətlərdən biridir.

Son illərdə Azərbaycan və İƏT ölkələri arasında aqrar sahədə səmərəli əməkdaşlıq çərçivəsində təşkilatın ixtisaslaşmış orqanları ilə birgə regional layihələr həyata keçirilib. Üzv ölkələr tərəfindən irəli sürülən yeni təşəbbüslər dəstəklənib, kənd təsərrüfatı və qida məhsullarının ticarət dövriyyəsinin artırılması, aqrar sahədə məhsuldarlığın daha da artırılması, torpaq və su resurslarından səmərəli istifadə ilə bağlı birgə addımlar atılıb.

İƏT ölkələrinə aqrar məhsulların ixracı arta bilər

Hazırda Azərbaycan İƏT aqrar sahədə ənənəvi istehsal və emal üsullarından müasir aqrar-sənaye modelinə keçidi sürətlləndirmək, “ağıllı kənd təsərrüfatı” texnologiyalarının tətbiqini genişləndirmək, bərpaolunan enerji və dayanıqlı kənd təsərrüfatı mexanizmlərinin tətbiqini təmin etmək, ekoloji təmiz və halal qida prinsipi ilə fəaliyyət göstərən kənd təsərrüfatı müəssisələri və aqroparklar yaratmaq üçün birgə təşəbbüsləri nəzərdən keçirir. Tərəflər bu layihələrin icrasında dövlət şirkətləri ilə yanaşı, özəl biznes icmasınıın fəaliyyətini əlaqələndirməyi vacib hesab edir.

Qeyd edilən sahələrdə hər iki tərəfin böyük potensialları mövcuddur. Bu resursların hərəkətə gətirilməsi İƏT ölələri ilə qarşılıqlı mal və aqrar xidmətlərin ticarətinin artmasına da yaxşı zəmin yaradır. Azərbaycanın hazırkı ixrac strategiyasında qeyri-neft ixracında aqrar-sənaye mallarının ənənəvi bazarlardan yeni bazarlara çıxışının təmin edilməsi və dayanıqlı ticarət infrastrukturlarının yaradılması mühüm yer tutur ki, bu baxımdan yeni imkanların səfərbər edilməsi ixracın coğrafiyasını daha da genişləndirə bilər. Eyni zamanda, Azərbaycanın istehsal etdiyi kənd təsərrüfatı məhsullarının İƏT ölkələri vasitəsilə Avropa bazarlarına ixracının genişləndirilməsi müasir ixrac-tranzit siyasətində mühüm yer tutur.

Azad ərazilərdə investorlara aqrar güzəştlər

Ölkəmizin perspektiv planlarına əsasən, aqrar sektorun müxtəlif bölmələrinə sərmayələrin cəlb olunması, xarici iş adamları arasında əlaqələrin gücləndirilməsi və təşviq edilməsi nəzərdə tutulur. Hökumət bu istiqamətdə müxtəlif stimullaşdırıcı iqtisadi alətlər, o cümlədən vergi və gömrük güzəştləri tətbiq edir. Xüsusilə də işğaldan azad edilmiş ərazilərdə xarici investorlar üçün geniştutumlu güzəştlər, səmərəli iqtisadi alətlər iş adamları üçün daha böyük imkanlar yaradır. Bu baxımdan İƏT ölkələrinin sərmayəçilərinə bu bölgədə aqrar layihələrdə təmsil olunmaq üçün münbit şərait mövcuddur.

Təşkilatın baş katibi Əsəd Məcid Xan mövcud əlverişli investisiya iqliminin dəyərləndirləcəyini və azad edilmiş ərazilərdə aqrar sektorda mütərəqqi texnologiyaların tətbiqi və təcrübə mübadiləsi istiqamətində İƏT-in rolunun artırılacağını bəyan edib.

Azərbaycanla İƏT arasında əməkdaşlığın gündəliyində yer alan başlıca məsələlərdən biri də bu təşkilatın Regional Aqrar Tədqiqatlar və İnnovasiya Mərkəzinin yaradılması prosesinin sürətləndirilməsidir.

Beləliklə, İƏT ölkələri ilə aqrar sahədə yeni imkanların səfərbər olunması, birgə sərmayələrin qoyulması və aqrar layihələrin icrası ölkəmizdə istehsalın artmasına və birgə mal mübadiləsinin həcminin böyüməsinə səbəb olacaq. Həmçinin, müasir aqrar alətlərin tətbiqi sayəsində respublikamızın ərzaq təhlükəsizliyinin möhkəmlənməsində mühüm rol oynayacaq.

ELBRUS CƏFƏRLİ

Paylaş:

Baxılıb: 447 dəfə