Daha çevik və səmərəli...

Bakı:

14 °C

77 %

9 m/s

Əlaqə

AZ RU EN

Ana səhifə / İqtisadiyyat / Daha çevik və səmərəli...

Daha çevik və səmərəli...

01.03.2025 [11:16]

Yeni islahatlar nəqliyyat və logistika əməliyyatlarının operativliyini təmin edəcək

Prezident İlham Əliyevin “Azərbaycan Dəmir Yolları” Qapalı Səhmdar Cəmiyyətinin yenidən təşkili haqqında” fərmanına əsasən, “Bakı Beynəlxalq Dəniz Ticarət Limanı” QSC Dəmir Yollarına qoşulmaqla yenidən təşkil ediləcək. Məqsəd dəmiryol nəqliyyatı sahəsində nəqliyyat əməliyyatlarını və logistika proseslərini daha səmərəli və operativ qaydada həyata keçirmək, eləcə də dəniz nəqliyyatına olan ehtiyacların daha dolğun ödənilməsini təmin etməkdir. Yeni strukturun formalaşdıqdan sonra bu sahədə ali idaretmə funksiyasını isə Azərbaycan Nəqliyyat və Kommunikasiya Holdinqi (AZCON) həyata keçirəcək.

Dəmir Yolu və Beynəlxalq Dəniz Ticarət Limanının birləşdirilərək yeni funksional struktura çevrilməsi dövlət şirkətlərində aparılan yeni idarəetmə modelinin tələblərinə əsaslanır. Belə ki, son illərdə idaretmə ilə bağlı həyata keçirilən islahatlar çərçivəsində dövlət müəssisələrinin diaqnostikası aparılır, müşahidə şuraları, müvafiq komitələr və koordinasiya ofisləri formalaşdırılır, korporativ idarəetmə standartları tətbiq edilir. Məqsəd daha yığcam, məqsədyönlü və dinamik idaretmə modelləri ilə səmərəliliyi təmin etməkdir.

Hazırkı yeni çağırışlar mərhələsində layihə idarəetməsi, risk menecment, investisiya və xəzinə siyasəti, pul vəsaitlərinin hərəkətinin idarə edilməsi, müəssisə resurslarının planlaşdırılması və sərmayə cəlbi kimi istiqamətlərdə islahatların aparılması əsas iqtisadi tələblər kimi daha da aktuallaşıb.

Ölkəmizin beynəlxalq daşımalarda potensialı artacaq

Azərbaycan Şərq-Qərb nəqliyyat dəhlizinin ən axıcı qovşaqlarının yerləşdiyi regiondur, ölkəmizin ərazisindən keçən beynəlxalq nəqliyyat dəhlizlərində həm Şərq-Qərb, həm də Şimal-Cənub marşrutları üzrə tranzit həcmləri sürətlə artır. Təkcə, 2024-cü ildə Trans-Xəzər Beynəlxalq Nəqliyyat Marşrutu (Orta Dəhliz) ilə yük daşımaları təxminən 60 faiz artıb. Eyni zamanda, Azərbaycandan keçən “Şimal-Cənub” Beynəlxalq Nəqliyyat Dəhlizinin Qərb marşrutu üzrə yük daşımaları da 30 faiz yüksəlib. Bütün bunlar Azərbaycanın Avrasiya regionunda nəqliyyat-logistika qovşağı kimi mövqeyini gücləndirir.

Qlobal tələbatlara uyğun olaraq ölkəmiz öz nəqliyyat infrastrukturunu tam yeniləşdirir, Xəzər dənizində ən böyük ticarət qovşağı olan Bakı Beynəlxalq Dəniz Limanının yükgötürmə gücünü artırır, dəmir yolu infrastrukturlarını bu dəhlizlərlə şaxələndirir. Nəticədə bu sistemli və əhatəli tədbirlər dəmir yolu- liman logistikası zəncirinin ötürücülük qabiliyyətinin yüksəldilməsinə xidmət edir. “Azərbaycan Dəmir Yollları” və Beynəlxalq Dəniz Ticarət Limanının birləşdirilməsi də bu sahədə ahəngdarlığı, nəqliyyat ritminin keyfiyyətini artırmaq baxımından mühüm əhəmiyyət daşıyır.

AZCON nəqliyyat şirkətlərini vahid çətir altında birləşdirir

Müasir geoiqtisadi reallıqlar, tranzit-logistika xətlərində meydana çıxan yeni fraqmentasiyalar beynəlxalq nəqliyyat daşınmalarında təmsil olunan şirkətlərin fəaliyyətində vahid siyasətin tənzimlənməsini də labüd edir. Bu baxımdan Yeni nəqliyyat qurumunun AZCON-nun idarəetməsinə verilməsi isə nəqliyyat sektorunun vahid çətir altında platforma kimi birləşdirilməsində və yeni institusional çərçivədə idarə olunmasında çevikliyi və səmərəliliyi artıracaq. Eyni zamanda, nəqliyyat sektorunun bağlantısını artırmaqla, rəqəmsallaşdırmanı da tamamlayacaq. Bu siyasət, eyni zamanda, tariflərin təkmilləşməsində və optimist tarif təyinetməsinə imkan yaradacaq.

Beləliklə, nəqliyyat və logistika, liman müəssisələrinin birləşdirilməsi və fəaliyyətinin yeni idarəetmə prinsiplərinə uyğunlaşdırılması nəqliyyat-tranzit sektorunda modernləşməni də təmin edəcək. Bu sahədə tətbiq edilən yeni alətlər isə əməliyyatların və inzibati prosedurların optimallaşmasına, koordinasiyanın yaxşılaşmasına və vahid platforma üzərindən tətbiqinə imkan verəcək. Eyni zamanda, tranzit daşınmaları zamanı vaxt və əməliyyatların müddətinin minimuma endirilməsinə, nəticədə Azərbaycan üzərindən həyata keçirilən yükdaşımalarının həcminin artmasına səbəb olacaq.

E.CƏFƏRLİ

Paylaş:

Baxılıb: 459 dəfə