Heydər Əliyev
yeni azerbaycan logo

Ana səhifə / Ədəbiyyat / Mən bir Şuşa gördüm...

Mən bir Şuşa gördüm...

29.09.2021 [15:31]

Şuşaya getmişdim-ədalətin, ləyaqətin, qürurun, zəfərin, igidin, şəhidin şəhərinə....

Sonuncu dəfə 10 yaşımda Ağdamdan Əsgəran və Xankəndindən keçib burularaq dağa dırmaşan yolla getdiyim şəhərə bu dəfə igidlik və qanla salınmış yeni yolla - Zəfər Yolu ilə getmişdim....Yol burula-burula müqəddəs şəhərə qalxırdı...Və birdən o əzəmətli qaya şəhər - Şuşa göründü. Maşındakı üç nəfərin üçü də eyni anda “Hiiiiii, Şuşa...Şuşanı gördüm” dedi...

Mən düz 32 ildən sonra yenə bir Şuşa gördüm...Bir həftədir 140-dan enməyən təzyiqim öz-özünə endi, nəfəsim genəldi, gözüm açıldı, ürəyim fərəhləndi, çünki mən bir Şuşa gördüm....

Mən bir Şuşa gördüm - əzəməti göyə ucalan qayalarda, abır-həyası başındakı dumanda saxlı...

Mən bir Şuşa gördüm - Cıdır düzünə qalxan qayalarda DƏMİR YUMRUQ izi...

Mən bir Şuşa gördüm - işığı yanır, iti hürür, quşları cükküldəşir, cırcıraması cırıldayır, gündüz günəşi, gecə ayı parlayır, hənirtimizi duyur, bizi havası ilə sığallayır...

Mən bir Şuşa gördüm - Üzeyir Bəyin səsi gələn...

Mən bir Şuşa gördüm - 29 il əvvəl dağılan yerləri kif bağlamış, azərbaycanlılara məxsus məhlələrin və evlərin çoxu I Qarabağ savaşından bəri darmadağın, içincə ağac, kol-kos bitmiş, uşaq ikən həsəd apardığım kübar eyvanları yanıb kül-olmuş, çürüyüb tökülmüş...

Mən bir Şuşa gördüm - bulaqlarının yarısı qurumuş...

Mən bir Şuşa gördüm - alması, gavalısı, payızlıq böyürtkəni dəymiş...

Mən bir Şuşa gördüm - yetim məzarlara qucaq açan...Gəlib dədə-babasının qəbrini tapa bilməyənlərin küçədə boynunu burub çarəsizcə oturduğu...

Mən bir Şuşa gördüm - şəhərini, evini görməyə gələnlərin hıçqırıqlarına təsəlli verən...

Mən bir Şuşa gördüm - başı dik, ürəyi nisgilli...alnında qürur, boğazında 2907 qəhərli düyün...

Mən bir Şuşa gördüm - küçələrində, divarlarında, pəncərələrində üzbəüz döyüşün izlərini saxlayan...

Mən bir Şuşa gördüm -1524 mertlik uca zirvəsindəki bayrağımızla düşmənə və dünyaya meydan oxuyan...

Mən bir Şuşa gördüm - Zəfər bayrağını bu müqəddəs zirvəyə sancan ərənlərin oylağı...

Mən bir Şuşa gördüm - misilsiz qəhrəmanlığa şahid olan, küçələrində şəhid ruhu dolaşan...

Mən bir Şuşa gördüm - iri çay daşlı küçələrinə axan şəhid qanına tumar çəkən...

Mən bir Şuşa gördüm - Şəhid anasına bənzər...qəlbi qubarlı, gözü nəmli... Dərdini udub, dərindən nəfəs alıb “Vətən sağ olsun” deyən...

Mən bir Şuşa gördüm - Şəhid balasına bənzər...titrəyən səsini boğub “Atam qəhrəmandır” deyən...

Mən bir Şuşa gördüm - Qulağıma pıçıldadı ki, bura gələndə öncə sükuta dalın... şşş.......Şuşa Şəhid Şəhəridir...

Səadət Məmmədova,

Əməkdar jurnalist

Paylaş
Baxılıb: 66 dəfə

Xəbər lenti

Hamısına bax

31 389 vaksin vurdurdu

20 Oktyabr 16:49

ARXİV
B Be Ça Ç Ca C Ş
1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31