Türk Şurasına üzv ölkələrin diaspor məsələlərinə məsul dövlət qurumlarının rəhbərlərinin növbəti iclası keçirilib

Bakı:

27 °C

44 %

4 m/s

AZ RU EN

Ana səhifə / Diaspor / Türk Şurasına üzv ölkələrin diaspor məsələlərinə məsul dövlət qurumlarının rəhbərlərinin növbəti iclası keçirilib

Türk Şurasına üzv ölkələrin diaspor məsələlərinə məsul dövlət qurumlarının rəhbərlərinin növbəti iclası keçirilib

13.11.2018 [09:26]

Ankarada Türkdilli Dövlətlərin Əməkdaşlıq Şurasına (TDƏŞ-Türk Şurası) üzv ölkələrin diaspor məsələlərinə məsul dövlət qurumlarının rəhbərlərinin üçüncü iclası keçirilib. Diasporla İş üzrə Dövlət Komitəsindən qəzetimizə verilən məlumata görə, rəsmi şəxslər, o cümlədən səfirlərin və beynəlxalq təşkilat rəhbərlərinin iştirakı ilə keçirilən iclasda Azərbaycanı Diasporla İş üzrə Dövlət Komitəsinin sədri Fuad Muradovun rəhbərlik etdiyi nümayəndə heyəti təmsil edib.
Türkdilli Dövlətlərin Əməkdaşlıq Şurasının baş katibi Bağdad Amreev iclasın gündəliyində olan məsələlər barədə ümumi məlumat verərək diqqətə çatdırıb ki, təşkilata üzv ölkələrin diaspor məsələlərinə məsul dövlət qurumları arasında əməkdaşlığın genişləndirilməsi və vahid fəaliyyət strategiyasının qəbul olunması tərəflərin maraqlarını təmin edir.
Türkiyənin diaspor siyasətinin ayrı-ayrı istiqamətləri barədə ətraflı məlumat verən mədəniyyət və turizm naziri Mehmet Nuri Ersoy ilə Xaricdəki Türklər və Əqrəba İcmaları İdarəsinin sədri Abdullah Eren çıxışlarında diqqətə çatdırıblar ki, müasir dünyada türkdilli diaspor təşkilatları arasında koordinasiyanın müəyyən edilməsi və əməkdaşlıq formalarının tapılması, bu sahədə birgə fəaliyyət xarici ölkələrdə yaşayan vətəndaşlarımız və soydaşlarımız üçün mühüm əhəmiyyət daşıyır.
Diasporla İş üzrə Dövlət Komitəsinin sədri Fuad Muradov Azərbaycanda diaspor fəaliyyətinin yaranması, inkişaf istiqamətləri, perspektivləri və qarşıya qoyulan məqsədlər barədə danışıb, həmçinin bu sahədə türkdilli ölkələrlə əməkdaşlığın əhəmiyyətindən bəhs edib. Fuad Muradov diqqətə çatdırıb ki, türk dünyasının birliyi ideyası yüzillərdən bəri mövcud olsa da, yalnız XX əsrdə bu ideyanın reallaşması istiqamətində əhəmiyyətli addımlar atılıb. Bu istiqamətdə türk dünyasının iki böyük öndəri - Ümummilli lider Heydər Əliyev və Türkiyə Respublikasının banisi Mustafa Kamal Atatürk tarixi uğurlara imza atıblar. Bu sahədə Azərbaycanda böyük işlər görülüb, ciddi qərarlar qəbul olunub. Prezident İlham Əliyevin təşəbbüsü ilə 2007-ci ildə Bakıda Azərbaycan və Türk Diaspor Rəhbərlərinin I Forumunun təşkili və elə həmin il paytaxtımızda keçirilən Türk Dövlət və Cəmiyyətlərinin XI Dostluq, Qardaşlıq və Əməkdaşlıq Qurultayı türkdilli xalqların diaspor fəaliyyətində birgə əməkdaşlığın formalaşmasına böyük töhfələr verib.
Azərbaycanda diaspor fəaliyyətinin səmərəli nəticələr verməsi üçün bu sahədə işin təşkilində edilən yeniliklər barədə məlumat verən Fuad Muradov qeyd edib ki, ölkəmizin ərazi bütövlüyünün bərpası, Ermənistan-Azərbaycan Dağlıq Qarabağ probleminin beynəlxalq hüququn normaları çərçivəsində həllinə nail olmaq, o cümlədən “Xocalıya Ədalət!” beynəlxalq məlumatlandırma kampaniyası çərçivəsində Xocalı soyqırımının tanınmasına, həmçinin bu bəşəri cinayət barədə beynəlxalq ictimaiyyəti daha geniş şəkildə tanış etmək diaspor fəaliyyətinin başlıca istiqamətləridir.
Rəsmi açılışdan sonra təqdim olunan qərar layihəsi ətrafında müzakirələr aparılıb. İclas “Türk Şurasının Türkdilli Diaspora Birgə Fəaliyyət Strategiyası”na dəyişikliklərin təsdiq edilməsi haqqında qərarın və “2019-cu ildə Türk Şurası Diaspor Birgə Fəaliyyət Planı”nın imzalanması ilə başa çatıb.
İclas çərçivəsində Türk Şurasına üzv ölkələri təmsil edən nümayəndə heyətləri Xaricdəki Türklər və Əqrəba İcmaları İdarəsində olublar. Burada diaspor sahəsində qarşılıqlı əməkdaşlığa dair sənədlərin imzalanması mərasimi təşkil olunub. Əvvəlcə Türkiyənin diaspor fəaliyyəti sahəsində əldə etdiyi uğurlardan bəhs edən film nümayiş olunub. Sonra sənədlərin imzalanması keçirilib. Azərbaycan Respublikasının Diasporla İş üzrə Dövlət Komitəsi ilə Türkiyə Respublikasının Xaricdəki Türklər və Əqrəba İcmaları İdarəsi arasında “Diaspor siyasəti sahəsində birgə fəaliyyətə dair Anlaşma Memorandumu” imzalanıb.
MÜŞFİQƏ

Paylaş:

Baxılıb: 2078 dəfə