Radikal müxalifət gücsüzlüyünü icazəsiz aksiya şouları ilə kompensasiya etmək istəyir

Bakı:

4 °C

60 %

8 m/s

Əlaqə

AZ RU EN

Ana səhifə / Daxili siyasət / Radikal müxalifət gücsüzlüyünü icazəsiz aksiya şouları ilə kompensasiya etmək istəyir

Radikal müxalifət gücsüzlüyünü icazəsiz aksiya şouları ilə kompensasiya etmək istəyir

13.10.2012 [18:27]

Sosial dayağı olmayan düşərgə parklarda istirahət edən insanları “aksiya iştirakçısı” adı ilə xarici “pul mənbələri”nə təqdim etmək fikrindədir
Azərbaycanın radikal müxalifəti yenidən öz ampluasına geri dönür. Əslində, hər zaman eyni yerdə addımlayan, sadəcə cild dəyişməklə özünü siyasi palitrada saxlamağa cəhd göstərən və şəxsi mənafedən başqa bir şeyi düşünməyən radikal düşərgə bu dəfə də özünün “sui-istifadə” taktikasından istifadə etmək fikrinə düşüb.
Xəbər verildiyi kimi, düşərgə təmsilçiləri bu günlərdə aksiya keçirmək üçün Bakı şəhər İcra Hakimiyyətinə müraciət edib. BŞİH isə bu müraciətə cavab verib və aksiyanı keçirmək üçün əvvəlcədən təyin edilən yerlərin ünvanlarını göstərib. Amma hər zaman olduğu kimi cığallıqdan başqa peşəsi olmayan bu siyasi kəsim həmin ərazilərdə deyil, öz istədiyi yerlərdə aksiya keçirməkdə israr edir.
İnsan hüquq və azadlıqlarının, söz azadlığının, sərbəst toplaşmaq azadlıqlarının qorunduğu Azərbaycanda hər bir siyasi partiya üçün öz fikrini azad şəkildə ifadə etməyə bərabər şərait yaradılıb və aksiya keçirmək istəyən hər bir siyasi təşkilat kütləvi aksiyaların keçirilməsi üçün nəzərdə tutulan məkanlarda bunu reallaşdıra bilər. Amma müxalifət bu dəfə də edilən təklifləri “bəyənməyib”.
Məsələyə münasibət bildirən YAP-ın Sədr müavini-İcra katibi, millət vəkili Əli Əhmədov da bildirib ki, İctimai Palataya daxil olan partiyaların kütləvi aksiyalar keçirilməsi üçün ayrılan yerlərdən bir qayda olaraq imtina etməsi və aksiyanı özlərinin istədiyi yerlərdə keçirmək istəyi onların özləri üçün xüsusi imtiyazlar əldə etmək istəməsindən irəli gəlir: “Nəyə görə hansısa bir partiya aksiyanı məhz özlərinin istədiyi yerlərdə keçirməlidir? Aksiyanı istənilən yerdə keçirmək mümkün deyil. Çünki bir tərəfdən, aksiyada həmin ərazidə yaşayan insanların çox cüzi bir hissəsi iştirak edir və bu tədbir zamanı həmin ərazidə yaşayan digər insanlar əziyyət çəkməməlidir. Digər tərəfdən, həmin aksiya üçün təhlükəsizlik tədbirləri görülməlidir, çünki istənilən aksiya digər xoşagəlməz məqsədlər üçün istifadə edilə bilər”.
Əslində, radikal müxalifət kəsiminin yalnız özünün seçdiyi yerdə aksiya keçirmək istəyinin səbəbləri bəllidir. Heç bir siyasi konsepsiyası, proqramı olmayan, ölkəmizin gələcəyi ilə bağlı hər hansı bir adi təklifə malik olmayan bu partiyalar varlıqlarını sübut etmək üçün bu yola baş vururlar. Doğrudur, aksiya keçirmək siyasi taktikalardan biridir, amma Azərbaycanın radikal müxalifəti üçün bu şou-xarakterli aksiyalar yeganə taktikadır ki, bu da, hər zaman fiasko ilə nəticələnir. Səbəbi isə radikal düşərgənin cəmiyyətdən, ictimaiyyətdən dəstəyinin olmamasıdır. Yəni, müxalifət özünün varlığını nümayiş etdirmək üçün icazəsiz aksiyalardan başqa yol bilmir.
Aksiyaların “icazəsiz” xarakterli olmasına gəlincə isə bunun da səbəbi bəllidir. Hər zaman olduğu kimi, bu dəfə də cəmiyyətin müxalifətin yalançı, əsassız və gülünc iddialarına etinasız münasibət göstərəcəyindən ən çox əmin olan elə düşərgənin özüdür. Həm Müsavat Partiyasının rəhbəri İsa Qəmbər, həm də AXCP başçısı Əli Kərimli bilir ki, Azərbaycan xalqının onlara münasibəti birmənalıdır. Bu iki partiyanın və onların rəhbərlərinin yürütdüyü antimilli siyasət xalqda onlara qarşı yalnız ikrah hissi yaradıb. Digər tərəfdən isə, bu iki partiyanın hər zaman olduğu kimi bu dəfə də icazəli aksiyaya adam “yığa” bilməyəcəyi gün kimi aydındır. Çünki öncədən keçirilən aksiyalarda olduğu kimi bu dəfə də iştirakçılığın qohum-qardaş ansamblından ibarət olacağı hər kəsə bəllidir. İP məhz bunun üçün də “aksiyasını” icazəsiz və Fəvvarələr Meydanında keçirmək istəyir ki, parkda istirahət edənləri də hesabat şəklində öz maddi mənbələrinə aksiya iştirakçısı qismində təqdim edə bilsin.
KİV-ə müsahibəsində bu məsələyə toxunan YAP İcra katibinin müavini, millət vəkili Mübariz Qurbanlı da bildirib ki, müxalifətin radikal qanadının kütləvi aksiya keçirmək üçün kifayət qədər sosial dayağı yoxdur. M.Qurbanlı deyib ki, müxalifətin radikal qanadının əhalinin böyük hissəsinin bilavasitə toplaşdığı, istirahət etdiyi ərazilərdə kütləvi aksiya keçirmək istəyi bu aksiyada tamaşaçı rolunda çıxış edən insanları iştirakçı kimi göstərmək məqsədi daşıyır: “Fəvvarələr Meydanı bu gün Bakının ən gözəl istirahət məkanlarından biridir və bütün saatlarda, xüsusilə, günorta saatlarında burada insanların kütləviliyi müşahidə olunur. Məhz o saatlarda orada kütləvi aksiya keçirmək hansı məntiqə uyğun gəlir? Müxalifət Fəvvarələr Meydanında iğtişaş yaradarsa, buna cavabdehlik daşımalıdır. Cavabdehlik də onlarda heç vaxt olmur”.
Pərviz SADAYOĞLU

Paylaş:

Baxılıb: 1975 dəfə