Azərbaycanın müstəqillik yolu qələbələrlə davam edir

Bakı:

21 °C

83 %

8 m/s

Əlaqə

AZ RU EN

Ana səhifə / Arxiv / Azərbaycanın müstəqillik yolu qələbələrlə davam edir

Azərbaycanın müstəqillik yolu qələbələrlə davam edir

26.05.2026 [16:02]

28 May – Müstəqillik Günü Azərbaycan xalqının milli qürurunun, dövlətçilik ənənələrinin və azadlıq ruhunun təcəssümü kimi tariximizin ən şərəfli səhifələrindən biridir. Bu əlamətdar gün xalqımızın öz taleyinə sahib çıxmasının, müstəqil və güclü dövlət qurmaq əzminin rəmzi olaraq böyük mənəvi əhəmiyyət daşıyır. Müstəqillik əldə etmək qədər onu qorumaq və möhkəmləndirmək də böyük məsuliyyət tələb edir. Azərbaycan xalqı bu yolda müxtəlif çətinliklər və ağır sınaqlarla qarşılaşsa da, Ulu Öndər Heydər Əliyevin xilaskarlıq missiyası sayəsində dövlətçiliyimizi qoruyub saxlaya bildi. Dahi rəhbərin uzaqgörən siyasəti nəticəsində ölkədə sabitlik təmin olundu, dövlətçilik əsasları möhkəmləndirildi və Azərbaycanın gələcək inkişafının möhkəm təməli yaradıldı. Bu gün Ulu Öndərin siyasi kursu Prezident İlham Əliyev tərəfindən uğurla davam etdirilir. Son illər Azərbaycan regionun ən güclü dövlətlərindən birinə çevrilib, beynəlxalq aləmdə nüfuzu daha da artıb, iqtisadi və hərbi qüdrəti möhkəmlənib. Prezident İlham Əliyevin qətiyyətli siyasəti nəticəsində Azərbaycan öz milli maraqlarını inamla qoruyan və dünyada söz sahibi olan dövlət kimi tanınır. Azərbaycan xalqının ən böyük qürur mənbəyi isə şübhəsiz ki, Qarabağ Zəfəridir. 2020-ci ildə Müzəffər Ali Baş Komandan İlham Əliyevin rəhbərliyi ilə Azərbaycan Ordusu 44 günlük Vətən müharibəsində tarixi Qələbə qazanaraq torpaqlarımızı işğaldan azad etdi. Bu Zəfər xalqımızın birliyinin, ordumuzun gücünün və dövlətimizin siyasi iradəsinin parlaq təntənəsi oldu. Şəhidlərimizin qəhrəmanlığı və qazilərimizin fədakarlığı Azərbaycan xalqının yaddaşında daim yaşayacaq. Bu gün işğaldan azad olunmuş Qarabağ və Şərqi Zəngəzurda genişmiqyaslı quruculuq işləri həyata keçirilir. Dağıdılmış şəhər və kəndlər yenidən qurulur, yollar, məktəblər və digər sosial obyektlər inşa edilir, həyat doğma torpaqlara geri qayıdır. Azad Qarabağda dalğalanan üçrəngli bayrağımız xalqımızın əzmini, qələbə ruhunu və milli qürurunu nümayiş etdirir. Müasir Azərbaycan gəncliyi də dövlətinə bağlı, milli-mənəvi dəyərlərinə sadiq, Vətənini sevən qalib nəslin nümayəndələri kimi formalaşır. Gənclərimizin milli ruhda yetişməsi ölkəmizin gələcəyi üçün ən mühüm amillərdən biridir.
28 May – Müstəqillik Günü hər birimizə dövlətimizin qədrini bilməyi, milli birliyimizi qorumağı və Azərbaycanın daha da güclənməsi naminə birlik nümayiş etdirməyi bir daha xatırladır. Bu gün hər bir azərbaycanlı böyük qürur hissi ilə müstəqil, qüdrətli və qalib Azərbaycanın vətəndaşı olduğunu hiss edir. Qoy müstəqilliyimiz əbədi olsun, üçrəngli bayrağımız daim yüksəklərdə dalğalansın!

Səfa Ağayev
YAP İmişli rayon təşkilatının sədri

Paylaş:

Baxılıb: 64 dəfə