Azərbaycan dövlətçiliyinin təntənəsi

Bakı:

21 °C

88 %

7 m/s

Əlaqə

AZ RU EN

Ana səhifə / Arxiv / Azərbaycan dövlətçiliyinin təntənəsi

Azərbaycan dövlətçiliyinin təntənəsi

25.05.2026 [23:35]

28 May – Azərbaycan xalqının taleyində xüsusi yer tutan, milli dövlətçilik tariximizin ən şərəfli səhifələrindən biri olan Müstəqillik Günüdür. 1918-ci il mayın 28-də yaradılmış Azərbaycan Xalq Cümhuriyyəti təkcə xalqımızın deyil, bütün Şərq və müsəlman aləminin tarixində yeni siyasi mərhələnin əsasını qoymuşdur. Azərbaycan xalqı həmin gün öz iradəsini nümayiş etdirərək Şərqdə və müsəlman dünyasında ilk demokratik, hüquqi və dünyəvi parlament respublikasını yaratdı. Bu tarixi hadisə xalqımızın azadlıq arzularının, milli müstəqillik düşüncəsinin və dövlətçilik ənənələrinin təcəssümü idi.

Azərbaycan Xalq Cümhuriyyətinin yaradılması ilə xalqımız əsrlər boyu yaşatdığı milli dövlətçilik ideyalarını reallığa çevirdi. 1918-ci il mayın 28-də qəbul edilən İstiqlal Bəyannaməsi Azərbaycanın müstəqil dövlət olduğunu bütün dünyaya bəyan etdi. Bu sənəd xalqımızın milli iradəsini, azad yaşamaq əzmini və öz müqəddəratını təyin etməyə qadir olduğunu nümayiş etdirdi. İstiqlal Bəyannaməsi həm də Azərbaycan xalqının hüquqi və demokratik dövlət qurmaq niyyətini ortaya qoydu.

Cəmi 23 ay fəaliyyət göstərməsinə baxmayaraq, Azərbaycan Xalq Cümhuriyyəti çox mühüm və tarixi əhəmiyyət daşıyan addımlar atdı. İlk parlament və hökumət formalaşdırıldı, dövlət atributları təsis edildi, üçrəngli bayrağımız qəbul olundu, milli ordu yaradıldı. Xalq hakimiyyəti və bərabərlik prinsiplərinə əsaslanan Cümhuriyyət bütün vətəndaşlara dini, milli və sosial mənsubiyyətindən asılı olmayaraq bərabər hüquqlar verdi. Bu isə müsəlman Şərqində demokratiyanın inkişafına böyük töhfə idi.

Təhsil və mədəniyyət sahəsində də mühüm işlər görüldü. Təhsilin ana dilində aparılması haqqında qərar qəbul edildi. Milli kadrların hazırlanması istiqamətində mühüm addımlar atıldı. Ədliyyə və məhkəmə sistemi formalaşdırıldı, dövlət idarəçiliyinin əsasları yaradıldı. Qısa müddətdə qəbul edilən qanunlar ölkənin siyasi, iqtisadi və mədəni inkişafına xidmət edirdi.

Xalq Cümhuriyyətinin əsas məqsədlərindən biri də Azərbaycanın beynəlxalq aləmdə tanınması idi. Paris Sülh Konfransında iştirak edən nümayəndə heyəti Azərbaycanı müstəqil dövlət kimi tanıtmağa nail oldu. Diplomatik əlaqələrin qurulması nəticəsində Azərbaycan beynəlxalq hüququn subyekti kimi qəbul edildi. Bu amil sonradan Azərbaycanın siyasi xəritədən silinməsinin qarşısını alan mühüm faktorlardan biri oldu.

1920-ci ildə bolşevik işğalı nəticəsində Azərbaycan Xalq Cümhuriyyəti süqut etsə də, xalqımızın azadlıq ruhu sarsılmadı. Ümummilli Lider Heydər Əliyev qeyd edirdi: “Müstəqilliyi qorumaq, saxlamaq onu əldə etməkdən qat-qat çətin vəzifədir.” Bu fikir Azərbaycanın sonrakı taleyində öz təsdiqini tapdı.

Ağır və mürəkkəb siyasi dövrdə xalqın tələbi ilə hakimiyyətə qayıdan Heydər Əliyev dövlətçiliyin qorunması, ölkədə sabitliyin təmin olunması və müstəqilliyin möhkəmləndirilməsi istiqamətində mühüm addımlar atdı.

Ulu Öndərin rəhbərliyi ilə milli dövlətçilik ənənələri daha da gücləndirildi, azərbaycançılıq ideologiyası formalaşdırıldı. Məhz onun təşəbbüsü ilə 1990-cı il noyabrın 17-də Naxçıvanda üçrəngli bayrağımız ilk dəfə rəsmi dövlət bayrağı kimi qaldırıldı. Bu hadisə xalqımızın azadlıq iradəsinin və gələcək müstəqilliyinin rəmzinə çevrildi.

Bu gün İlham Əliyev tərəfindən uğurla davam etdirilən siyasət nəticəsində Azərbaycan güclü, müstəqil və qalib dövlət kimi dünya miqyasında böyük nüfuz qazanmışdır. Prezident İlham Əliyevin rəhbərliyi ilə ölkəmiz öz ərazi bütövlüyünü və suverenliyini tam bərpa etmiş, Azərbaycan bayrağı işğaldan azad edilmiş torpaqlarımızda qürurla dalğalanmağa başlamışdır. Bu, Azərbaycan Xalq Cümhuriyyətinin qurucularının arzularının həyata keçməsinin parlaq nümunəsidir.

2021-ci ildə qəbul olunmuş “Müstəqillik günü haqqında” Qanuna əsasən 28 May rəsmi olaraq Müstəqillik Günü elan edilmişdir. Bu qərar bir daha təsdiq edir ki, müasir Azərbaycan Respublikası 1918-ci ildə yaradılmış Azərbaycan Xalq Cümhuriyyətinin siyasi və hüquqi varisidir.

Bu gün Azərbaycan xalqı 28 May – Müstəqillik Gününü böyük qürur və fəxarət hissi ilə qeyd edir. Çünki bu tarix xalqımızın azadlıq iradəsinin, milli birlik ruhunun və dövlətçilik ənənələrinin təntənəsidir.

Yaşasın müstəqil Azərbaycan! Yaşasın Azərbaycanın əbədi və sarsılmaz dövlət müstəqilliyi!

Vəli Sərxanlı

YAP Culfa rayon təşkilatının fəalı

Paylaş:

Baxılıb: 206 dəfə