Azərbaycan-Gürcüstan əməkdaşlığı: regional sabitlik və iqtisadi inteqrasiyaya töhfə

Bakı:

25 °C

73 %

10 m/s

Əlaqə

AZ RU EN

Ana səhifə / Arxiv / Azərbaycan-Gürcüstan əməkdaşlığı: regional sabitlik və iqtisadi inteqrasiyaya töhfə

Azərbaycan-Gürcüstan əməkdaşlığı: regional sabitlik və iqtisadi inteqrasiyaya töhfə

09.04.2026 [11:02]

Elşən Alıyev

YAP Daşkəsən rayon təşkilatının sədr müavini

Prezident İlham Əliyevin aprelin 6-da Gürcüstana səfəri çərçivəsində mətbuata verdiyi bəyanat iki dövlət arasında münasibətlərin yüksək səviyyədə olduğunu və bu əməkdaşlığın regional miqyasda mühüm əhəmiyyət daşıdığını bir daha nümayiş etdirdi. Səfər zamanı səsləndirilən fikirlər göstərdi ki, Azərbaycan–Gürcüstan əlaqələri yalnız qonşuluq münasibətləri ilə məhdudlaşmır, artıq strateji tərəfdaşlıq səviyyəsinə yüksələrək geniş və çoxşaxəli gündəliyə malikdir.

Dövlətimizin başçısının vurğuladığı kimi, Əsrlər boyu gürcü və Azərbaycan xalqları dostluq, qardaşlıq şəraitində yaşamışlar və bu gün bu ənənələr davam etdirilir. Bu tarixi əlaqələr dövlətlərarası münasibətlər üçün möhkəm zəmin rolunu oynayır. Müasir mərhələdə isə bu münasibətlər qarşılıqlı etimad və ortaq maraqlar əsasında daha da möhkəmlənib. İki dövlət beynəlxalq təşkilatlar çərçivəsində də daim bir-birinin suverenliyini və ərazi bütövlüyünü dəstəkləyir. Bu yanaşma yalnız siyasi həmrəylik deyil, həm də regionda sabitliyin qorunması baxımından mühüm amildir.

Azərbaycan–Gürcüstan münasibətlərinin əsas istiqamətlərindən biri iqtisadi əməkdaşlıqdır. Son illərdə ticarət dövriyyəsinin artması və qarşılıqlı sərmayə qoyuluşlarının genişlənməsi bu sahədə davamlı inkişafın göstəricisidir. Gürcüstanda formalaşmış əlverişli investisiya mühiti Azərbaycan investorlarının bu bazara marağını daha da artırır. Məlumata görə, artıq Azərbaycan tərəfindən Gürcüstan iqtisadiyyatına milyardlarla dollar həcmində sərmayə qoyulub. Bu amillər iki ölkə arasında iqtisadi inteqrasiyanın yüksək səviyyədə olduğunu göstərir. Eyni zamanda, gələcəkdə üçüncü ölkələrdə birgə investisiya layihələrinin həyata keçirilməsi perspektivi əməkdaşlığın daha geniş coğrafiyanı əhatə edəcəyindən xəbər verir.

Prezident İlham Əliyevin mətbuata bəyanatında diqqət çəkən əsas məqamlardan biri Cənubi Qafqazda formalaşan yeni vəziyyətlə bağlı idi. Dövlətimizin başçısı qeyd edib ki, bu gün Cənubi Qafqaz artıq sülh, əmin-amanlıq, təhlükəsizlik, əməkdaşlıq məkanına çevrilir. Bu isə region ölkələrinin qarşısında yeni imkanlar yaradır, həmin kontekstdə Ermənistan ilə münasibətlər və sülh prosesi də diqqət mərkəzində olub. Davamlı sülhün təmin olunması üçün yalnız sənədlər kifayət deyil, eyni zamanda real iqtisadi əməkdaşlıq və ticarət əlaqələri də inkişaf etdirilməlidir. Gürcüstanın bu prosesdə tranzit və vasitəçi rol oynaması xüsusi əhəmiyyət kəsb edir.

Energetika sahəsində əməkdaşlıq Azərbaycan–Gürcüstan münasibətlərinin ən mühüm istiqamətlərindən biridir. Bu gün Azərbaycan qazı geniş coğrafiyaya ixrac olunur və bu ixracın əsas marşrutlarından biri məhz Gürcüstan ərazisindən keçir. Bakı-Tbilisi-Ceyhan neft kəməri və Cənub Qaz Dəhlizi kimi iri layihələr regionun enerji xəritəsini dəyişdirən strateji təşəbbüslərdir. Bu layihələr yalnız enerji ixracını təmin etmir, eyni zamanda geniş regionun enerji təhlükəsizliyinə də töhfə verir.

Enerji layihələri ilə yanaşı, nəqliyyat infrastrukturu da mühüm əhəmiyyət daşıyır. Orta Dəhliz Azərbaycan və Gürcüstandan keçərək Asiya ilə Avropanı birləşdirən əsas logistika marşrutlarından birinə çevrilib. Bu dəhliz təkcə iqtisadi deyil, həm də geosiyasi baxımdan strateji əhəmiyyətə malikdir. Hazırda Orta Dəhlizin genişləndirilməsi və yükdaşıma imkanlarının artırılması istiqamətində görülən işlər regionun qlobal ticarət sistemində rolunu daha da gücləndirir.

Prezident İlham Əliyevin mətbuata bəyanatı bir daha təsdiq edir ki, Azərbaycan–Gürcüstan münasibətləri qarşılıqlı hörmət, etimad və ortaq maraqlar üzərində qurulmuş möhkəm tərəfdaşlıq modelidir. Bu münasibətlər regionda sabitliyin, təhlükəsizliyin və inkişafın təmin olunmasında mühüm rol oynayır. Mövcud dinamika göstərir ki, tərəflər gələcəkdə də birgə səylərlə yeni layihələr həyata keçirəcək, iqtisadi və siyasi əməkdaşlığı daha da genişləndirəcək və Cənubi Qafqazın sülh və əməkdaşlıq məkanına çevrilməsinə töhfə verməyə davam edəcəklər.

Paylaş:

Baxılıb: 435 dəfə