Nərimanovda 2 fevral Gənclər Günü qeyd olunub

Bakı:

16 °C

63 %

10 m/s

Əlaqə

AZ RU EN

Ana səhifə / Arxiv / Nərimanovda 2 fevral Gənclər Günü qeyd olunub

Nərimanovda 2 fevral Gənclər Günü qeyd olunub

02.02.2026 [15:14]

Yeni Azərbaycan Partiyası Nərimanov rayon təşkilatı və Dəmir Yolu və Metropoliten üzrə Bakı Dövlət Peşə Təhsil Mərkəzinin birgə təşkilatçılığı ilə "2 fevral Gənclər Günü" ilə bağlı tədbir keçirilib.

Tədbirdə YAP Nərimanov rayon təşkilatının sədr müavini Anar Abbasov, Dəmir Yolu və Metropoliten üzrə Bakı Dövlət Peşə Təhsil Mərkəzinin direktor müavini Fuad Əliyev, Nərimanov rayon Gənclər və İdman sektorunun müdiri Bahəddin Hüseynov və fəal gənclər iştirak edib.

Tədbir Azərbaycan Respublikasının dövlət himninin səsləndirilməsi ilə açıq elan edilib.

Daha sonra Ümummilli lider Heydər Əliyevin və ərazimizin bütövlüyü uğrunda canından keçən şəhidlərimizin əziz ruhu bir dəqiqəlik sükutla yad edilib.

Dövlətimizin gənclərə olan diqqət və qayğısını özündə əks etdirən qısa video-çarx tədbir iştirakcılarına təqdim olunub.

Tədbiri giriş sözü ilə Dəmir Yolu və Metropoliten üzrə Bakı Dövlət Peşə Təhsil Mərkəzinin direktor müavini Fuad Əliyev açaraq 2 fevral Gənclər Günü münasibətilə tədbir iştirakçılarını təbrik edib, gənclərin hər bir dövlətin gələcəyi, cəmiyyətin aparıcı qüvvəsi olduğunu bildirib. Qeyd edib ki, bu əlamətdar günün məqsədi gənclərə diqqət və qayğı göstərməklə yanaşı, onların problemlərinin həlli istiqamətində mühüm işlərin görülməsidir. Fuad Əliyev əsası Ümummilli Lider Heydər Əliyev tərəfindən qoyulmuş dövlət gənclər siyasətinin Azərbaycan gəncliyinin inkişafında dərin izlər buraxdığını bildirib. Əlavə edib ki, Ulu Öndərin 1997-ci il fevralın 2-də imzaladığı Fərmana əsasən, fevralın 2-si Azərbaycan Gəncləri Günü elan edilib, həmin vaxtdan etibarən Azərbaycan gəncliyinin yeni erası başlayıb və bu gün də cənab Prezident, Ali Baş Komandan İlham Əliyevin rəhbərliyi ilə gənclərin fəaliyyəti daim dövlətin diqqət mərkəzindədir.

Daha sonra YAP Nərimanov rayon təşkilatının sədr müavini Anar Abbasov çıxış edərək ölkəmizdə həyata keçirilən dövlət gənclər siyasətindən danışıb. O, XXI əsrdə Azərbaycanın firavan gələcəyinin təmin olunmasında gənclərimizin üzərinə böyük vəzifələrin düşdüyünü bildirib. Gənclərin millətin inkişafının təməl daşı, müstəqilliyimizin qorunub-saxlanılmasında gələcəyimizin qarantı olduğunu deyən A. Abbasov Azərbaycanda gəncliyin inkişafı istiqamətində mühüm tədbirlərin həyata keçirilməsinin ölkə siyasətinin prioritetlərindən olduğunu qeyd edib. Sədr müavini gənclərin hərtərəfli inkişafının ölkənin sosial-iqtisadi, elmi və mədəni inkişafı ilə sıx əlaqəli olduğunu bildirərək, ölkədə dövlətin müstəqilliyinin möhkəmləndirilməsinin intellektual səviyyəli kadrların hazırlığından asılı olduğunu vurğulayıb.

Tədbirdə Nərimanov rayon Gənclər və İdman sektorunun müdiri Bahəddin Hüseynov və digərləri nitq söyləyərək Prezident İlham Əliyevin rəhbərliyi ilə dövlətimizin gənclərə göstərdiyi diqqət və qayğı nəticəsində bu gün Azərbaycanda intellektual, milli düşüncəyə sahib gənclər formalaşdığını və onların ölkənin ictimai-siyasi həyatında böyük rol oynadığını vurğulayıblar. Natiqlər Ümummilli Lider Heydər Əliyevin gənc kadrların yetişdirilməsinə hər zaman böyük əhəmiyyət verdiyini, bugün də eyni siyasi xəttin Ulu Öndər Heydər Əliyevin layiqli davamçısı, gənclərin və xalqın əvəzsiz Lideri, ölkə rəhbəri İlham Əliyev tərəfindən uğurla həyata keçirilməsini diqqətə çatdırıblar.

Çıxışlardan sonra Dəmir Yolu və Metropoliten üzrə Bakı Dövlət Peşə Təhsil Mərkəzinin tələbələrinin ifasında bədii hissə təqdim olunub.

Sonda bir qrup gənc aktiv fəaliyyətinə görə təşəkkürnamə ilə təltif olunub və xatirə şəkli çəkilib.

Paylaş:

Baxılıb: 330 dəfə