Milli Məclisin plenar iclasında...

Bakı:

20 °C

77 %

7 m/s

Əlaqə

AZ RU EN

Ana səhifə / Xəbər lenti / Milli Məclisin plenar iclasında...

Milli Məclisin plenar iclasında...

27.12.2023 [10:33]

9 məsələ müzakirə edildi

Günel ABBASOVA

Dekabrın 26-da Milli Məclisin payız sessiyası üzrə növbəti plenar iclası keçirilib. Sahibə Qafarovanın sədrliyi ilə keçirilən toplantının gündəliyinə 9 məsələnin müzakirəsi daxil edilib.

Əvvəlcə deputatlar Əli Məsimli, Etibar Əliyev, Vüqar Bayramov, Tural Gəncəliyev, Hikmət Məmmədov, Sahil Alıyev, Elşad Mirbəşir, Fatma Yıldırım, Emin Hacıyev, Zahid Oruc, Bəhruz Məhərrəmov, Nizami Səfərov, Fazil Mustafa, Razi Nurullayev, Elman Nəsirov, Sabir Rüstəmxanlı, Tahir Kərimli, İsa Həbibbəyli, Aqil Abbas cari məsələlər ətrafında çıxış ediblər.

Milli Məclisin deputatı Tural Gəncəliyev çıxışı zamanı Ermənistanı yenidən silahlandıranların məqsədlərinə nail ola bilməyəcəklərini bildirib: “Bu günlərdə mətbuatda Fransanın Evian-le Ba şəhərində yerləşən parkda Xurşidbanu Natəvanın irsinə qarşı təhqiramiz hərəkətlərin edildiyi barədə məlumatlar yayılır. Ermənistanı yenidən silahlandıranlar revanşist qüvvələri alovlandırmaq məqsədi güdürlər, amma buna nail ola bilməyəcəklər. Təəssüflər olsun ki, vaxtilə Ermənistandan manipulyasiya aləti kimi istifadə edən, sonradan xunta rejiminin əli ilə Qarabağda xaos yaratmaq istəyən Fransa indi də Azərbaycan mədəniyyətinə qarşı, Qarabağın, mədəniyyətimizin simvolu olan Xurşidbanu Natəvana qarşı belə hərəkətlərə yol verir”.

Onun fikrincə, ironiya ondan ibarətdir ki, dünyada mədəni və qeyri-mədəni irsin qorunmasına məsul olan UNESCO-ya ev sahibliyini Fransa edir. Bu da çox təəssüfedici haldır.

“Ümumiyyətlə, Fransanın irtica siyasətini ifşa edən rıçaqlarımızı işə salmalıyıq. Fransa insan hüquqları, mədəni irslə bağlı Azərbaycana və dünyanın digər ölkələrinə dərs keçəcək sonuncu ölkədir”, - T.Gəncəliyev deyib.

Sonra Milli Məclisdə təmsil olunan Qərbi Azərbaycan İcması nümayəndələrinin Bəyanatı qəbul olunub. Bununla bağlı məsələ parlamentin plenar iclasında müzakirəyə çıxarılıb. Bəyanatı Qərbi Azərbaycan İcmasının İdarə Heyətinin sədri, Milli Məclisin deputatı Əziz Ələkbərli oxuyub.

Qeyd edək ki, bəyanatın mətni parlamentdə Qərbi azərbaycanlı kimi təmsil olunan 23 deputat tərəfindən hazırlanıb.

Daha sonra “Sahibkarlıq sahəsində aparılan yoxlamaların dayandırılması haqqında” qanun layihəsi, “Arbitraj haqqında” qanun layihəsi (üçüncü oxunuş), Mülki Prosessual Məcəllədə dəyişiklik edilməsi haqqında qanun layihəsi (üçüncü oxunuş), “Mediasiya haqqında” qanunda dəyişiklik edilməsi barədə qanun layihəsi (üçüncü oxunuş), “Cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında” və “Hədəfli maliyyə sanksiyaları haqqında” qanunların icrası ilə əlaqədar bəzi qanunlarda dəyişiklik edilməsi barədə qanun layihəsi (üçüncü oxunuş), “Prokurorluq haqqında” qanunda dəyişiklik edilməsi barədə qanun layihəsi (üçüncü oxunuş), “Azərbaycan Respublikasının Şəhərsalma və Tikinti Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə haqqında” qanunda dəyişiklik edilməsi barədə qanun layihəsi (üçüncü oxunuş), “Dövlət rüsumu haqqında” qanunda dəyişiklik edilməsi barədə qanun layihəsi (üçüncü oxunuş) müzakirə edilərək səsverməyə çıxarılıb və qəbul edilib.

Beləliklə, Milli Məclisin payız sessiyası üzrə növbəti plenar iclası başa çatıb.

Paylaş:

Baxılıb: 554 dəfə