Ermənistana son xəbərdarlıqlar

Bakı:

28 °C

49 %

5 m/s

Əlaqə

AZ RU EN

Ana səhifə / Xəbər lenti / Ermənistana son xəbərdarlıqlar

Ermənistana son xəbərdarlıqlar

16.12.2023 [16:47]

Rusiyanın səbir kasası daşmaq üzrədir

Günel ABBAS

Ötən günlərdə Rusiya Xarici İşlər Nazirliyinin rəsmi nümayəndəsi Mariya Zaxarova Ermənistan-Azərbaycan münasibətlərinin normallaşdırılması prosesini şərh edib.

O bildirib ki, İrəvanda bəzi siyasətçilər Ermənistan-Azərbaycan münasibətlərinin normallaşdırılmasına köməklə bağlı Rusiyanın səylərinə narazılıqlarını bildirir, 2020-2022-ci illərdə əldə edilmiş yüksək səviyyəli üçtərəfli bəyanatların “qeyri-səmərəliliyi” haqqında mühakimə aparırlar.

M.Zaxarova qeyd edir ki, Rusiya, Azərbaycan və Ermənistan liderlərinin 2020-ci il 9 (10) noyabr, 2021-ci il 11 yanvar və 26 noyabr, 2022-ci il 31 oktyabr tarixli bəyanatlarından ibarət olan üçtərəfli razılaşmalar kompleksi Bakı və İrəvanın barışığının alternativsiz “yol xəritəsi”dir. “Ermənistan ilə Azərbaycan arasında sülh sazişinin olmaması səbəbindən bu mühüm sənədləri etibarsız hesab etməyi həddən artıq təhlükəli sayırıq. Bu çağırışları Qərbin saxta vasitəçilərinin köməyi ilə dayandırmaq alınmayacaq. Rusiyadan fərqli olaraq, ABŞ və Avropa İttifaqı Ermənistana və Cənubi Qafqazın digər dövlətlərinə sülh və sabitlik gətirməyə səy göstərmirlər”, - deyə Rusiya XİN-in təmsilçisi diqqətə çatdırıb.

Şərhdə vurğulanır ki, Moskva tərəfləri üçtərəfli bəyanatların icrasına dönməyə çağırır. Rusiya tərəfi aktuallığı və faydalılığı artıq dəfələrlə sübuta yetirilmiş bütün zəruri köməyi göstərməyə hazırdır.

Mövzunu şərh edən politoloq Ramiz Alıyev yeniazerbaycan.com-a açıqlamasında bildirib ki, Ermənistanın üçtərəfli bəyanatdan geri çəkilməyi gələcəkdə böyük bir təhlükələrə gətirib çıxaracaq: “Biz bunu 2020-ci ilin 10 noyabr razılaşmasından sonra dəfələrlə bildirmişik ki, Ermənistan həmin bəyanatda üzərinə götürdüyü öhdəlikləri yerinə yetirməkdən boyun qaçırır və həm Azərbaycan tərəfini, həm də o bəyanata vasitəçi tərəf olaraq imza atan Rusiya liderini, eyni zamanda dünyanı aldatmağa cəhd göstərir. Ancaq təəssüflər olsun ki, nə Rusiya, nə digər Qərb dövlətləri və digər qonşu dövlətlər bu məsələnin ciddiyyətini qəbul etmirdilər. Onlar vaxtında Paşinyanın imza atdığı bəyanata hörmətlə yanaşaraq üzərinə götürdüyü öhdəlikləri yerinə yetirməsini tələb etmirdilər. Bu, əlbəttə ki, yeni problemlərin ortaya çıxmasına rəvac verdi. M.Zaxarova elə bir bəyanat verməklə əslində özlərinin də günahkar olduğunu bildirməlidir. Çünki bu məsələdə Rusiya həmin zamanlarda Ermənistana lazımi formada təzyiqlər göstərmədi. Yəni bunu biz açıq deməliyik. Çünki Ermənistana lazımi formada təzyiqlər göstərilsəydi, bu gün Ermənistan öhdəliklərin hamısını lazımınca və vaxtında yerinə yetirərdi.

İndi isə Ermənistan Rusiyadan uzaqlaşmağa başlayıb və buna cəhd edir. Belə olan halda Qərbdən müəyyən dəstəkləri də alır. Qərb dövlətləri və xüsusən də Fransa Ermənistanı aldadaraq yeni təxribatlara sövq edir. Ermənistan da elə düşünür ki, qonşu dövlətlərlə onun arasında problemlər yarananda və ya Ermənistan müharibə şəraitinə düşəndə ya Fransa, ya da başqa Qərb dövlətlərindən kimlərsə gəlib

kömək edəcək. Ancaq bunu hər kəs yaxşı bilir ki, elə bir məsələ mümkün deyil. Ermənistan təxribat törədəcəyi təqdirdə həm dövlət, həm də Ermənistanın hazırkı hakimiyyəti məsuliyyət daşıyır və onlar lazımi cavablarını alacaqlar. Hesab edirəm ki, Ermənistanın ən böyük problemlərindən biri hazırda Rusiya ilə münasibətləri korlaması və Rusiyanın da imza atdığı bəyanatdan geri çəkilərək üzərinə götürdüyü öhdəlikləri yerinə yetirməməsidir. Bu, Ermənistan üçün çox təəssüfləndiricidir və təhlükəlidir. Ona görə də Ermənistan vaxtında bunu anlamalıdır və vasitəçinin imzasına hörmətlə yanaşmalıdır”.

Onun sözlərinə görə, Ermənistan hazırda başqa bir ampuladan çıxış edir və ona görə də yeni problemlərin ortaya çıxmağı yaxındır: “Fikrimcə, Rusiya ilə Ermənistan arasında yeni problemlər ortaya çıxacaq. Rusiya-Ukrayna müharibəsində Ukraynanın hansı vəziyyətə düşdüyünün də biz şahidiyik. Ancaq Ermənistan yəqin bunu anlamır, anlamadığı üçün də yeni problemlərlə qarşı-qarşıya olacaq. Hesab edirəm ki, Rusiya Ermənistanın bu şıltaqlığından artıq cana doyub. Bütün səbrin bir həddi olduğu olduğu kimi, Rusiyanın da Ermənistanla bağlı olan səbr kasası daşmaq üzrədir. Ona görə də Rusiya rəsmilərinin bu cür bəyanat verməsi onu bir daha göstərir ki, artıq Rusiya da Ermənistana xəbərdarlıq etməkdən yorulub.

Rusiya çox yaxşı bilir ki, Ermənistan özünü Azərbaycanla yeni müharibə şəraitinə gətirsə və ya təxribatlar nəticəsində buna yol açsa, Ermənistan üçün heç də yaxşı olmayacaq. Rusiyanın özü ilə problemləri olan bir ölkənin Rusiyadan kömək istəməsi də mümkünsüz olacaq. Ona görə də Rusiya son ana qədər Ermənistana xəbərdarlıq edərək, bu yoldan çəkilməsini və uzaq olmasını, üzərinə götürdüyü öhdəlikləri yerinə vaxtında yerinə yetirməsini tələb edir. Ancaq bunu vaxtında eləsə daha yaxşı olardı. Çünki bu artıq gecikmiş bir qatardır.”, - deyə R.Alıyev qeyd edib.

Paylaş:

Baxılıb: 540 dəfə