Amalımızı yaşadaq!

Bakı:

12 °C

82 %

3 m/s

Əlaqə

AZ RU EN

Ana səhifə / Xəbər lenti / Amalımızı yaşadaq!

Amalımızı yaşadaq!

08.12.2023 [11:12]

“Yaşat” Fondunun üç ili...

Yeganə BAYRAMOVA

Azərbaycan xalqının Vətən sevgisi müqayisəolunmazdır. Vətəndaşlarımız çətin sınaq günlərində daim dövlətinə dəstək olub. Bunu ötən əsrdə Qarabağ müharibəsi zamanı da gördük, 44 günlük Vətən savaşında da... Nəinki gəlirli müəssisələr, təşkilatlar, şirkətlər, hətta sadə insanlar, təqaüdçülər belə əsgərlərə, şəhid ailələrinə cüzi gəlirlərini, təqaüdlərini bağışlayırdılar. Bu, xalqın birliyi, millətin həmrəyliyinin təzahürü idi.

Ərazi bütövlüyümüz uğrunda canından keçən şəhidlərimizin ailə üzvləri, həmçinin əlil vətəndaşlarımızın rifahı dövlət siyasətinin də əsasını təşkil edib. Bu məqsədlə ölkə başçısı tərəfindən müvafiq fərman və sərəncamlar imzalanıb. 44 günlük Vətən müharibəsindən sonra Prezident İlham Əliyevin 2020-ci il 8 dekabr tarixli Sərəncamı ilə “Yaşat” Fondu təsis edildi.

Bu sərəncamla ölkə başçısı torpaqlarımızın azad olunmasında iştirak edənlərə qayğı ilə yanaşıldığını bir daha sübut etdi. Nəzərə alaq ki, sərəncam təkcə 44 günlük müharibə iştirakçılarını deyil, ümumən Qarabağ müharibəsi dövründə şəhid olanlara, onların ailələrinə və bütün qazilərə, müharibə əlillərinə şamil edilir.

Bu gün “Yaşat” Fondunun yaradılmasından üç il ötür. Fond fəaliyyətə başladığı vaxtdan indiyədək vəzifələrin öhdəsindən lazımınca gəlməkdədir. Şəhid ailələri ilə keçirilən görüşlər, onların ehtiyaclarının, problemlərinin öyrənilməsi, qazilərin müalicəsinin təşkili, reabilitasiya məsələlərinin həlli fondun fəaliyyətinin ana xəttini təşkil edir. Bu da məlumdur ki, fond yaranandan indiyədək müəssissə və təşkilatlar tərəfindən, həmçinin fərdi qaydada da ianələr edilib.

Fondun hesabatında qeyd olunan məlumatlara görə, 2021-ci il dekabrın 2-dək fonda 65 milyona yaxın vəsait daxil olub. 2916 şəhid ailəsi üzvləri və 4946 yaralı olmaqla ümumilikdə 16 min 348 nəfərlə görüş keçirilib və ehtiyacları qeydə alınıb.10 min 781 şəxsin 15 min 644 müraciəti icra olunub.

Şəhid ailələrinin və yaralıların ehtiyaclarına 49 milyon 54 min 136 manat 86 qəpik pul xərclənib. 15 milyon 719 min 626 manat 91 qəpik hələlik istifadə olunmamış qalıb. Xərclənən vəsaitdən 32 milyon 173 min 789 manat 50 qəpik məişət şəraaitinin yaxşılaşdırılmasına, 445 min 228 manat 51 qəpik təhsil, peşə hazırlığı və yaradıcı potensialın inkişafına, 5 milyon 395 min 854 manat 57 qəpik istehlak kreditlərinin və başqa borc öhdəliklərinin qarşılanmasına, 11 milyon 39 min 264 manat 28 qəpik isə müalicə və psixoloji dəstək xərclərinin ödənilməsinə sərf olunub. Təhsil, peşə hazırlığı və yaradıcı potensialın inkişafı xərcləri istiqaməti üzrə şəhid ailə üzvlərinin 137 və yaralıların 20 müraciəti olmaqla ümumilikdə 157 müraciət təmin edilib. Fondun təşəbbüsü ilə təhsil haqqının qarşılanması üzrə təhsil müəssisələri tərəfindən 222 min AZN vəsait qarşılanıb. Təhsil haqqı qarşılanan 63 şəxsin ödənişi fond tərəfindən, 60 şəxsin isə ödənişi fondun təşəbbüsü ilə təhsil müəssisələri tərəfindən qarşılanıb.

2022-ci ildə isə “Yaşat” Fonduna 75 milyon 846 min 318 manat 85 qəpik vəsait toplanıb. Həmin vəsaitin 71 milyon 612 min 351 manat 53 qəpiyi fondun fəaliyyət istiqamətləri üzrə xərclənib. Ötən il toplanan vəsaitin 41 milyon 42 min 300 manatı məişət şəraitinin yaxşılaşdırılması, 22 milyon 449 min 998 manat 4 qəpiyi müalicə və psixoloji dəstək xərclərinin ödənilməsi, 6 milyon 772 min 442 manat 30 qəpiyi istehlak kreditləri və digər borc öhdəliklərinin qarşılanmasına, 1 milyon 347 min 611 manat 19 qəpiyi isə təhsil, peşə hazırlığı və yaradıcı potensialın inkişafı xərclərinə sərf olunub. Qalıq məbləğ isə 4 milyon 233 min 967 manat 32 qəpik olub.

2022-ci ildə müalicə və psixoloji dəstək xərclərinin ödənilməsi istiqaməti üzrə 15 min 694, məişət şəraitinin yaxşılaşdırılması istiqaməti üzrə 12 min 253, istehlak kreditləri və digər borc öhdəliklərinin qarşılanması istiqaməti üzrə 2 min 198, təhsil, peşə hazırlığı və yaradıcı potensialın inkişafı xərcləri istiqaməti üzrə isə 432 müraciət təmin edilib. Əlavə olaraq fondun təşəbbüsü ilə borc öhdəliyinin qarşılanması üzrə müəssisələr tərəfindən 126 min 392 manat 73 qəpik borc ləğv edilib. Həmçinin fondun təşəbbüsü ilə təhsil haqqının qarşılanması üzrə təhsil müəssisələri tərəfindən 492 min 581 manat 99 qəpik vəsait qarşılanıb.

Paylaş:

Baxılıb: 440 dəfə