Erməni vandalizminə məruz qalan Piçənis məscidi...

Bakı:

18 °C

50 %

0 m/s

Əlaqə

AZ RU EN

Ana səhifə / Xəbər lenti / Erməni vandalizminə məruz qalan Piçənis məscidi...

Erməni vandalizminə məruz qalan Piçənis məscidi...

01.12.2023 [11:39]

M.BAYRAMLI

Bu gün sizinlə birlikdə Laçının Piçənis kəndinə virtual səyahət edəcəyik. Kəndin adının peçeneq türk tayfalarından götürüldüyü deyilir. Piçənisin düzü, Piçənisçay adları bu gün də yaşamaqdadır.

Piçənis kəndi Laçın şəhərinin şimal-qərb istiqamətində 45 km məsafədə, dəniz səviyyəsindən 1,550 m yüksəklikdə yerləşir. Laçın–Şamkənd şose yolu kəndin içərisindən keçir. Kənd əsasən Şəlvəçay və Ələkçiçay çayları ilə əhatələnib. Kəndin yaxın ətrafında Ağcayazı, Arduşlu, Xaçınyalı yaşayış məntəqələri yerləşir. Şimaldan Sallıq, Qırxbulaq dağları ilə, cənubdan isə Piçənis düzü adlanan təxminən 60 hektarlıq sahə ilə əhatələnib. Kəndin yaxın ətrafında Xanölən dərə, Talıbxan dərə yurdu adlanan ərazilər yerləşir. Kəndin ətrafında Meşə bulağı, Sərin bulağı, Pəri bulağı və s. var.

Bundan başqa, bir orta məktəb, mədəniyyət ev, musiqi məktəbi, poçt şöbəsi, tibb məntəqəsi, uşaq bağçası, kitabxana, mağaza, qədim məscid və Qafqaz Albaniyasına məxsus qədim kilsə var. Kəndin yaxınlığında su dəyirmanı, çayın üzərində salınmış Çiçəyin körpüsü adlı tarixi abidə də mövcuddur.

Erməni vandalizmi Laçındakı ibadət ocaqları, məscid və digər abidələrdən də yan keçməyib. Erməni işğalı zamanı daş-divarlarındakı yaddaş tarixləri silinərək erməniləşdirilməyə və dünyaya erməni xalqının yazılı abidələri kimi təqdim edilməyə cəhd olunub. Belə abidələrdən biri də Piçənis məscidi idi. Məscid yerlə-yeksan edildi. Ondan geriyə sadəcə xatirələri qaldı.

Sevindirici haldır ki, torpaqlarımız azad olunduqdan sonra dini abidələrin, məscidlərin, məbədlərin bərpası və yenidən inşası xüsusi diqqətdə saxlanılır. Bu məqəsədlə də, hazırda Laçın şəhərində yeni məscid inşa olunur. Azad olunan ərazilərdə ən böyük məscidlərdən biri olacaq. Tikintisində iştirak edənlər də elə laçınlılardır. Bu barədə “Laçın Abadlıq Xidməti” ASC-dən məlumat verilib. Məscid kompleksinin ərazisi 1 hektara yaxın sahəni əhatə edəcək. Relyefə uyğun inşa edilən bina iki mərtəbədən ibarət olacaq, birinci mərtəbədə texniki otaqlar yer alacaq. İkinci mərtəbə isə birbaşa məscidin qarşısındakı eyvana açılacaq ki, bu da əhalinin rahat ibadəti üçün buraya girişi təmin edəcək. Qadınlar və kişilər üçün ayrıca ibadət zalları, dəstəmaz otaqları olacaq.

600 kvadratmetrə yaxın sahəsi olacaq məscid binası 16 metr hündürlükdə bir günbəz və hər biri 24 metr hündürlükdə iki minarə ilə layihələndirilib. Bura şəhərin hər yerindən görünəcək və azan səsinin şəhər ərazisinə daha rahat yayılmasına imkan yaranacaq. Məscid şəhərin qərb hissəsində girişdə magistral yolun kənarında yerləşir ki, bu da şəhərə gələn turist və qonaqların burada rahat ibadət etməsi üçün nəzərdə tutulub.

Paylaş:

Baxılıb: 498 dəfə