TƏBİB: “Etimad xətti”nə etik normalar, fərdlərarası münasibətlər və iş prosesi ilə bağlı müraciətlər daxil olur

Bakı:

26 °C

73 %

3 m/s

AZ RU EN

Ana səhifə / Sosial / TƏBİB: “Etimad xətti”nə etik normalar, fərdlərarası münasibətlər və iş prosesi ilə bağlı müraciətlər daxil olur

TƏBİB: “Etimad xətti”nə etik normalar, fərdlərarası münasibətlər və iş prosesi ilə bağlı müraciətlər daxil olur

02.07.2026 [22:46]

Bu günədək Tibbi Ərazi Bölmələrini İdarəetmə Birliyinin (TƏBİB) “Etimad xətti”nə 100-ə yaxın müraciət daxil olub.

Bu barədə AZƏRTAC-ın sorğusuna cavab olaraq TƏBİB-in İctimaiyyətlə əlaqələr və kommunikasiya departamentindən məlumat verilib.

Bildirilib ki, TƏBİB-də fəaliyyət göstərən tibb və qeyri-tibb işçiləri qısa müddət öncə fəaliyyətə başlayan “Etimad xətti”nə müraciət edirlər. Müraciətlər gündəlik olaraq nəzərdən keçirilir və həll edilməsi üçün müvafiq addımlar atılır.

“Müraciətlər etik normalar, fərdlərarası münasibətlər, iş prosesi kimi məsələlərlə bağlı daxil olur. Bütün müraciətlər yalnız səlahiyyətli şəxslər tərəfindən məxfilik prinsipləri qorunmaqla nəzərdən keçirilir və qiymətləndirilir. Müraciət edən əməkdaşların hüquqlarının qorunması, müraciətlərə qərəzsiz yanaşılması və ədalət prinsipinin təmin edilməsi bu prosesin əsas prioritetlərindəndir”, - deyə məlumatda vurğulanıb.

Xatırladılıb ki, peşəkar münasibətlərin, qarşılıqlı etimadın gücləndirilməsi və iş mühitində təhlükəsizliyin artırılması məqsədilə TƏBİB-in rəsmi saytında “Etimad xətti” bölməsi fəaliyyətə başlayıb. Bu bölmə vasitəsilə əməkdaşlar iş mühiti, peşəkar münasibətlər, etik davranış və ümumilikdə xidmət keyfiyyətinə mane olan bütün məsələlərlə bağlı fikir və narahatlıqlarını anonim şəkildə bölüşə bilirlər.

“Qarşılıqlı hörmət və etimada əsaslanan, hər kəsin özünü dəyərli hiss etdiyi iş mühitinin formalaşmasında hər bir əməkdaşın fikri önəmlidir. “Etimad xətti” də məhz bu məqsədlə - TƏBİB-in əməkdaşlarının rəyini və səsini eşitmək, eləcə də onların töhfələri əsasında daha güclü təşkilati mədəniyyət qurmaq üçün yaradılıb. “Etimad xətti” daxili kommunikasiya platforması olaraq yalnız TƏBİB-in əməkdaşlarının istifadəsi üçün nəzərdə tutulur. “Etimad xətti” hər bir əməkdaşın səsinin eşidildiyi, məsələlərin ədalətli şəkildə qiymətləndirildiyi və daha sağlam iş mühitinin qurulmasına xidmət edən bir platformadır. İnanırıq ki, sağlam iş mühiti hər bir əməkdaşın öz fikrini sərbəst ifadə edə bildiyi, dinlənildiyini hiss etdiyi və məsələlərə ədalət prinsipləri əsasında yanaşıldığı zaman formalaşır”, - deyə məlumatda diqqətə çatdırılıb.

Paylaş:

Baxılıb: 457 dəfə