Vətənə sədaqət və fədakarlıq nümunəsi

Bakı:

27 °C

54 %

6 m/s

Əlaqə

AZ RU EN

Ana səhifə / Sosial / Vətənə sədaqət və fədakarlıq nümunəsi

Vətənə sədaqət və fədakarlıq nümunəsi

03.07.2026 [10:25]

Koroğlu Rəhimovun xatirəsi daim qəlblərdədir...

İyulun 3-ü xalqımızın qəhrəmanlıq salnaməsində öz igidliyi, Vətənə sonsuz sədaqəti və döyüş meydanlarında nümayiş etdirdiyi misilsiz şücaəti ilə əbədi iz qoymuş Milli Qəhrəman Koroğlu Rəhimovun anım günüdür. Koroğlu Rəhimov Vətənə sonsuz məhəbbəti və torpaqlarımızın azadlığı uğrunda göstərdiyi misilsiz igidliyi ilə xalqımızın yaddaşında əbədi yaşayan qəhrəmanlardandır. Onun həyat yolu gənc nəslə vətənpərvərlik, cəsarət, mərdlik və fədakarlıq nümunəsi kimi bu gün də böyük hörmətlə xatırlanır.

31 oktyabr 1953-cü ildə Oğuz rayonunun Xaçmaz kəndində anadan olub. 1960-cı ildə Yaqublu kənd orta məktəbinə gedib. 1961-ci ailəsi ilə birlikdə ata-baba yurdları olan Qərbi Azərbaycanın Zəngibasar mahalının Sarıcalar kəndinə köçüb. Burada təhsilini başa vurduqdan sonra isə 1969-cu ildə Azərbaycan Neft və Kimya İnstitutuna daxil olub.

1972-ci ildə hərbi xidmətə çağırılır. 1974-cü ildə Almaniyada hərbi xidmətini başa vurur və yarımçıq qalmış təhsilini tamamlayır.

Qəlbi Vətən eşqi ilə döyünən Koroğlu, Xocalı faciəsindən sonra könüllü olaraq 1992-ci il 17 mart tarixdə Milli Ordu sıralarına yazılıb. 1992-ci il 30 apreldə “N” saylı bölüyə komandir təyin edilən Koroğlunun şərəfli döyüş yolu başlayıb. 13 iyun 1992-ci ildə Buzluq, Çartaz, Erkəç kəndlərinin azad edilməsində bu bölüyün adı dilləri gəzib. Onlar 15 erməni yaraqlısını məhv edərək xeyli silah-sursat ələ keçiriblər. Koroğlu buradakı döyüşdə dörd faşisti şəxsən özü məhv edib. 14 iyunda isə cəsur döyüşçülər Mənəşlini də yaraqlılardan təmizləyiblər. 15 iyunda isə Başkənd erməni işğalçılarından təmizlənib. Bu əməliyyatlar nəticəsində Koroğlunun komandirlik etdiyi alay erməni qəsbkarlarının onlarla canlı qüvvəsini məhv edib, xeyli silah-sursat ələ keçiriblər. Bölüyün zəfər yürüşü davam edirdi. Madagiz və Gülüstan kəndləri də bir-birinin ardınca qəsbkarlardan təmizləndi. Goranboy və Ağdərədə gedən digər qanlı döyüşlərdə iştirak edib. 1992-ci il iyul ayının 3-də Ağdərədə gedən qanlı döyüşlərin birində qəhrəmancasına həlak olub.

Ailəli idi, üç övladı yadigar qalıb: Rəhimov Rəşad Koroğlu oğlu, Rəhimov Samir Koroğlu oğlu, Rəhimova Ülviyyə Koroğlu qızı.

Azərbaycan Respublikası Prezidentinin 16 sentyabr 1994-cü il tarixli, 203 nömrəli fərmanına əsasən, Azərbaycan Respublikasının suverenliyinin və ərazi bütövlüyünün qorunmasında, Vətənimizin torpaqlarının erməni işğalçılarından müdafiə edilməsində gedən döyüşlərdə qəhrəmanlıqla vuruşaraq göstərdiyi şəxsi igidlik və şücaətə, öz müqəddəs əsgəri və xidməti borclarının şərəflə yerinə yetirilməsində göstərdiyi misilsiz xidmətlərə görə leytenant Rəhimov Koroğlu İsmayıl oğlu ölümündən sonra “Azərbaycanın Milli Qəhrəmanı” adına layiq görülüb. Bakının küçələrindən birinə K.Rəhimovun adı verilib.

Koroğlu Rəhimov Vətənin taleyinin həll olunduğu ən çətin və məsuliyyətli dövrlərdə heç bir təhlükədən çəkinmədən ön cəbhədə döyüşərək, şəxsi mənafeyini deyil, xalqının gələcəyini və Azərbaycanın azadlığını hər şeydən üstün tutub. O, silahdaşlarına nümunə olub, göstərdiyi yüksək döyüş əzmi və sarsılmaz iradəsi ilə hərb tariximizdə adını qəhrəmanlıq nümunəsi kimi əbədiləşdirib.

Onun həyat yolu sübut edir ki, Vətən sevgisi yalnız sözlə ifadə olunan hiss deyil, əksinə, xalqın azadlığı və dövlətin müstəqilliyi naminə ən ağır sınaqlardan keçməyi, lazım gəldikdə isə bu müqəddəs amal uğrunda ən qiymətli nemət olan həyatdan belə tərəddüd etmədən keçməyi bacaran insanların mənəvi böyüklüyünü nümayiş etdirən ali dəyərdir. Məhz buna görə də Koroğlu Rəhimovun adı Azərbaycan tarixində əbədi yaşayacaq qəhrəmanlar sırasında xüsusi ehtiramla çəkilir.

Azərbaycan xalqı öz qəhrəman övladlarının xatirəsini daim uca tutur, onların Vətən uğrunda göstərdikləri misilsiz xidmətləri heç zaman unutmur. Koroğlu Rəhimov kimi igidlərin ömür yolu isə gənclərimiz üçün Vətənə bağlılığın, cəsarətin, mərdliyin və milli-mənəvi dəyərlərə sədaqətin ən parlaq örnəyi olaraq gələcək nəsillərin yaddaşında əbədi yaşayacaq.

Yeganə BAYRAMOVA

Paylaş:

Baxılıb: 97 dəfə