Şans oyunları biznesi

Bakı:

30 °C

41 %

2 m/s

Əlaqə

AZ RU EN

Ana səhifə / Xəbər lenti / Şans oyunları biznesi

Şans oyunları biznesi

16.02.2023 [10:37]

Ölkə iqtisadiyyatına verilən töhfə...

Yeganə BAYRAMOVA

Lotereya oyunları dünyanın hər yerində olduğu kimi, ölkəmizdə də şans oyunlarının bir növü kimi olduqca populyardır. Əlbəttə ki, söhbət fəaliyyəti qanunvericiliklə tənzimlənən lotereya oyunlarından gedir...

Türkiyə təcrübəsinin faydası

İqtisadçı Fuad İbrahimov “Yeni Azərbaycan”a açıqlamasında bildirib ki, son illər ölkəmizdə şans oyunlarına maraq artıb. İqtisadçının sözlərinə görə, “Azərlotereya” uzun müddətdir ki, iqtisadiyyatın mühüm iştirakçısı kimi özünü göstərir: “”Azərlotereya” 2021-ci ilin avqustundan Türkiyənin dünyada nüfuzlu “Demirören Şans Oyunları” şirkəti ilə əməkdaşlıq edir. Həmin ilin sonunda lotereya və idman mərc oyunlarını tənzimləyən qanunvericilik aktlarına dəyişiklik edilib, qanuni oyunlarla qanunsuz oyunlar arasında “sədd” çəkilib. Eyni zamanda, qanunsuz oyunları təşkil edənlərə qarşı cinayət məsuliyyəti sərtləşdirilib. Bundan başqa, qanunsuz oyunların keçirilməsinə dəstək verənlər üçün inzibati cərimələr müəyyən edilib.

Türkiyə lotereya və idman mərc oyunlarının təşkili və yeni məhsulların bazara çıxarılması baxımından təcrübəyə malik olan ölkələrdən biridir. Bu baxımdan Türkiyə ilə əməkdaşlıq həm də Azərbaycanda bu sahənin inkişafı baxımından vacib addımdır. Belə ki, qardaş dövlətin şirkətinin “Azərlotereya”nın idarəçiliyinə cəlb edilməsi ölkəmizdə lotereya və idman mərc oyunları sənayesini inkişaf etdirmək üçün investisiya və yeni texnologiya cəlb etməyə imkan verib, dünya təcrübəsində mövcud olan ən yaxşı modellərin, oyun sistemlərinin, texnoloji infrastruktur, müasir satış, cəlbetmə və stimullaşdırma mexanizmlərinin ölkəmizdə tətbiqinə şərait yaradıb”.

Şans oyunlarının iqtisadi dvidenti

İqtisadçı qeyd edib ki, şans oyunları biznesinin inkişafı yeni iş yerlərinin açılması, sosial layihələrin təşkili üçün mənbə yaradır. Eyni zamanda, dövlət büdcəsinə ödənilən vergilər lotereya oyunlarının iqtisadi dividentlərindən xəbər verir: “İqtisadiyyat Nazirliyi prosesə ciddi nəzarət edir və lotereya təşkilatçıları tərəfindən elan olunan uduş məbləğlərinin tam şəffaflıqla udan tərəfə çatdırılması təmin olunur. Son dövrlər “Azərlotereya”nın fəaliyyətində yenilik hiss olunur. Bundan başqa, müvafiq dövlət qurumları ilə müəyyən müqavilələr və memorandumlar imzalanır. Bu yaxınlarda “Azərlotereya” ASC ilə UNEC arasında memorandum imzalandı. Bu, “Azərlotereya”nın fəaliyyətini genişləndirmək istədiyini və cəmiyyətin ayrı-ayrı strukturlarının prosesdə iştirakının təmin edilməsinin əsas hədəflərdən biri olduğunu göstərir.

Qeyri-neft sektorunda vergi ödəyicisi

Şans oyunlarını təşkil edən şirkətlər mühasibat uçotu standartlarına uyğun maliyyə intizamının tətbiqi nəticəsində qeyri-neft sektorunun iri vergi ödəyicilərindən birinə çevrilib. Təəssüf ki, bu sahədə problemlər də var. Qanunsuz şans oyunlarının qadağan edilməsinə baxmayaraq, belə oyunların təşkil edilməsi, keçirilməsi və reklamı davam etməkdədir. Nəticədə qeyri-qanuni lotereya və idman mərc oyunları platformalarına edilən ödənişlər vergidən yayınır. Bununla da dövlətimiz ciddi maliyyə itkiləri ilə üzləşə bilər. Lakin qanuni şans oyunlarının təşkil edən şirkətlər qeyri-neft sektorunda əhəmiyyətli iştirakçıya çevrilməyi hədəfləyir”.

Nəticə olaraq bildirək ki, şans oyunları biznesi ölkə iqtisadiyyatına verdiyi töhfələrdə böyük pay sahibidir. Ümid edirik ki, bu sektor dövlətin tərəqqisində önəmli rol oynayan layihələrdən biri kimi fəaliyyətini davam etdirəcək.

Paylaş:

Baxılıb: 541 dəfə