İstintaq necə aparılmalıdır?

Bakı:

27 °C

54 %

7 m/s

Əlaqə

AZ RU EN

Ana səhifə / Xəbər lenti / İstintaq necə aparılmalıdır?

İstintaq necə aparılmalıdır?

28.01.2023 [10:25]

Azərbaycanın İrandakı səfirliyinə hücum pislənilir...

Nicat Dilqəmli

Azərbaycanın İrandakı səfirliyinə edilən hücum qətiyyətlə pislənilir. Qardaş ölkə Türkiyədən gələn ilk dəstəyin ardından İsrail XİN, Rusiya XİN, Ukayna XİN, Gürcüstan XİN, Slovakiya XİN, Moldova XİN, Səudiyyə Ərəbistanı XİN, BƏƏ XİN və digər ölkələrin xarici işlər nazirlikləri, eləcə də ABŞ -ın, Fələstinin, İtaliyanın və Əfqanıstanın ölkəmizdəki səfirlikləri, Aİ-nin Azərbaycandakı nümayəndəsi, TDT, GUAM hücumu terror aktı olaraq dəyərləndirərək, həlak olan və yaralanan əməkdaşlar üçün dərindən kədərləndiklərini bildiriblər. Bəyanatlarda mülki şəxslərə və mülki obyektlərə, o cümlədən diplomatik missiyalara qarşı hücumların beynəlxalq humanitar hüquqa əsasən qəti şəkildə qadağan olduğu diqqətə çatdırılıb.

Səfirliyimizə edilən hücum dünya ictimaiyyətində geniş müzakirələrin açılmasına səbəb olub. İstər yerli, istərsə də xarici ekspertlər baş vermiş hadisəni terror aktı olduğundan əmin olduqlarını qeyd edirlər. Bu isə heç də təsadüfi deyil.

Digər önəmli məqam isə hadisənin səbəblərinin araşdırılması prosesidir. Hüquq müdafiəçiləri Azərbaycanın hüquq-mühafizə orqanlarının əməkdaşlarının da istintaqda iştirak etməsinin vacibliyini xüsusi qeyd edirlər. Ekspertlər hesab edirlər ki, Azərbaycan ərazisində törədilən bu terror hadisəsinin istintaqında İranın hüquq-mühafizə orqanları ilə yanaşı, Azərbaycan xüsusi xidmət orqanlarının, eyni zamanda, prokurorluq əməkdaşlarının iştirakı olduqca əhəmiyyətlidir.

Məlum olduğu kimi, bu günə qədər İranla Azərbaycan arasında bir çox sahədə qarşılıqlı əməkdaşlığın inkişaf etdirilməsini özündə ehtiva edən yüzlərlə sənəd imzalanıb. Bu yerdə Baş prokuror Kamran Əliyevin rəhbərlik etdiyi nümayəndə heyətinin ötən ilin avqust ayında Tehrana işgüzar səfərini xatırlatmaq yerinə düşər. Belə ki, İranın daxili işlər naziri Əhməd Vəhidi ilə görüşdə təhlükəsizlik və hüquq-mühafizə fəaliyyəti sahəsində qarşılıqlı əməkdaşlıq məsələsi də müzakirə edilən mövzulardan olub.

Məsələ ilə bağlı sualımızı cavablandıran Demokratiya və İnsan Hüquqları komitəsinin sədri Çingiz Qənizadə “Yeni Azərbaycan” qəzetinə açıqlamasında İran tərəfinin istintaqla bağlı bizi tez-tez məlumatlandırmalı olduğunu deyib.

Artıq məsələ ilə bağlı Dövlət Təhlükəsizliyi Xidmətində (DTX) və Baş Prokurorluqda cinayət işi açılıb. DTX verilən məlumata görə, faktla bağlı Dövlət Təhlükəsizliyi Xidmətində Cinayət Məcəlləsinin 12.2, 120.2.1, 12.2, 120.2.4, 12.2, 120.2.11, 12.2, 29, 120.2.7, 12.3, 214.2.1, 12.3, 214.2.3 və 12.2, 228.2.1-ci maddələri ilə cinayət işi başlanılmışdır. Hazırda istintaq-əməliyyat tədbirləri həyata keçirilir.

Nəticə etibarı ilə baş vermiş terror hadisəsi ilə bağlı İran dövləti Azərbaycana bildirməli, hadisənin hansı səbəbdən baş verdiyi haqda hesabat verməlidir.

Xatırladaq ki, yanvarın 27-də Bakı vaxtı ilə səhər saat 8:30 radələrində Azərbaycanın İrandakı səfirliyinə terror hücumu olub. Terroru törədən şəxs “Kalaşnikov” markalı avtomat silahla mühafizə postunu yararaq, mühafizə xidmətinin rəisi Orxan Əsgərovu qətlə yetirib. Səfirliyin iki nəfər mühafizə əməkdaşı da hücumun qarşısını alarkən yaralanıblar. Yaralıların vəziyyəti qənaətbəxşdir.

Paylaş:

Baxılıb: 589 dəfə