Jurnalistlərin VIII qurultayından GÖZLƏNTİLƏR

Bakı:

25 °C

61 %

6 m/s

Əlaqə

AZ RU EN

Ana səhifə / Xəbər lenti / Jurnalistlərin VIII qurultayından GÖZLƏNTİLƏR

Jurnalistlərin VIII qurultayından GÖZLƏNTİLƏR

15.09.2022 [11:14]

İlk növbədə, jurnalistlər və oxucular dəyişməlidir

Mətbuat Şurasının İdarə Heyətinin 2022-ci ilin 6 sentyabr tarixli iclasında Şuranın Nizamnamə tələblərinə uyğun olaraq Azərbaycan jurnalistlərinin VIII qurultayının keçirilməsi qərara alınıb. Qurultayının keçirilməsi üzrə Təşkilat Komitəsi yaradılıb. Sentyabrın 24-də baş tutacaq qurultayda Mətbuat Şurasının rəhbərliyinin yenilənməsi də nəzərdə tutulur. O cümlədən qurultayda idarə heyətinin yeni tərkibi seçiləcək.

Xatırladaq ki, indiyədək Azərbaycan jurnalistlərinin 7 qurultayı keçirilib. Jurnalistlərinin sonuncu qurultayı 2018-ci ildə baş tutub.

Əvvəlcə jurnalistlərin mediaya münasibəti dəyişməlidir

Qurultayla bağlı fikirlərini “Yeni Azərbaycan”la bölüşən “Ədalət” qəzetinin baş redaktoru İradə Tuncay sentyabrın 24-də baş tutacaq qurultaydan heç bir gözləntisinin olmadığını söyləyib: “Düşünürəm ki, ilk növbədə, jurnalistlərin mediaya olan münasibəti dəyişməlidir. Eyni zamanda jurnalistlər iş üslublarında da müəyyən yeniliklər etməlidirlər. Bundan başqa, oxucuların da öz fikri olmalıdır. Bir sözlə, həm oxucular, həm də jurnalistlər nə istədiklərini bilməlidirlər. Jurnalist və oxucunun özü dəyişmirsə, qurultay nəyi dəyişəcək ki? Təbii ki, heç nəyi”.

Qurultay səmərəli keçəcək

“İki Sahil” qəzetinin baş redaktoru Vüqar Rəhimzadənin sözlərinə görə, Azərbaycan Mətbuat Şurası bu gün kifayət qədər nüfuzlu bir quruma çevrilib: “Şura həm cəmiyyətin, həm də jurnalistlərin diqqət mərkəzində olan bir qurum kimi fəaliyyətini qura bilib. Mətbuat Şurası jurnalistlərin peşəkarlığının artırılması yönündə çox uğurlu layihələrə imza atıb. Həmçinin redaksiyaların maddi-texniki bazasının yaxşılaşması istiqamətində xeyli işlər görüb. Beynəlxalq təşkilatlarla əlaqələrin formalaşması istiqamətində uğurlu iş aparıb.

Baş tutacaq hər bir qurultayda istənilən təşkilatın keçmiş olduğu fəaliyyət dövrünə nəzər yetirilir, görülən işlər qiymətləndirilir və gələcək planlarla bağlı müzakirələr aparılır. Təbii ki, Mətbuat Şurasının da ötən dövr ərzində gördüyü işlərin hesabatı aparılacaq və qurultayda təqdim ediləcək, həmçinin qarşıda duran hədəflər, məqsədlər və jurnalistikanın inkişafı ilə bağlı vəzifələr müzakirə ediləcək. Düşünürəm ki, digər məsələlər jurnalistlərin qurultayda qərarından asılı olacaq. Ümid edirəm ki, qərarlar obyektiv veriləcək və bu qərarlar da jurnalistikamızın inkişafında müstəsna əhəmiyyət kəsb edəcək. Ona görə də, obyektiv və səmərəli bir qurultaya şahid olacağımızı düşünürəm”.

Yeganə BAYRAMOVA

Paylaş:

Baxılıb: 654 dəfə