ABŞ Azərbaycana 2 milyon dollar ayırıb

Bakı:

30 °C

45 %

5 m/s

Əlaqə

AZ RU EN

Ana səhifə / Xəbər lenti / ABŞ Azərbaycana 2 milyon dollar ayırıb

ABŞ Azərbaycana 2 milyon dollar ayırıb

13.09.2022 [10:40]

Hərbi ekspert: Ərazilərin minalardan tam təmizlənməsi üçün 100 milyonlarla dollar lazımdır

Günel ABBASOVA

44 günlük müharibədən sonra Azərbaycan dövlətinin əsas prioritetlərindən biri də Qarabağ həqiqətlərinin, oradakı vəziyyətin dünyaya çatdırılmasıdır. Bunu əsas götürərək bərpa-quruculuq işlərinin başladığı andan etibarən müxtəlif ölkələrin nümayəndələrinin bu bölgələrə səfərləri təşkil edilir. İşğaldan azad edilmiş ərazilərdə beynəlxalq tədbirlərin keçirilməsi və ölkəmizdə fəaliyyət göstərən diplomatik korpus nümayəndələrinin tez-tez Şuşaya, eləcə də digər ərazilərə səfər etməsi təsadüfi deyil. Qarabağ və Şərqi Zəngəzurda xüsusilə minalarla bağlı problemlərin dünyaya çatdırılmasında bu addımlar əhəmiyyətli rol oynayır. İşğaldan azad olunmuş ərazilərdə mövcud vəziyyətlə tanış olan nümayəndələr Azərbaycana minalardan təmizlənmə işləri üçün dəstək və maliyyə yardımının ayrılmasını dünyanın diqqətinə çatdırmağa davam edirlər. Dünya ictimaiyyətinə belə açıqlamaların nəticəsidir ki, ötən gün ABŞ Qarabağ müharibəsindən zərər çəkmiş ərazilərin minalardan təmizlənməsinə 2 milyon dollar ayırıb.

ABŞ departamentinin mətbuata yaydığı məlumatda qeyd olunub ki, regional sülh və əməkdaşlığı təşviq etmək üçün Birləşmiş Ştatlar 2020-ci ilin payızında Cənubi Qafqazda Ermənistan və Azərbaycan hərbi qüvvələri arasında baş vermiş intensiv döyüşlərdən zərər çəkmiş ərazilərdə humanitar minatəmizləmə əməliyyatları üçün 2 milyon dollar ayırdığını elan etməkdən məmnundur: “Münaqişə zonasında minalar və partlamamış hərbi sursatlar dinc sakinləri öldürməkdə və şikəst etməkdə, iqtisadi inkişafı əngəlləməkdə və köçkünlərin təhlükəsiz geri qayıtmasının qarşısını almaqda davam edir. 2021-ci ilin noyabrında elan edilən 500 000 dollara əsaslanaraq, ABŞ-ın yeni maliyyəsi minaları və partlamamış hərbi sursatları təmizləmək üçün minatəmizləmə təşkilatlarının texniki imkanlarını gücləndirməyə davam edəcək. Bu səylər insanların təhlükəsizliyinin yaxşılaşdırılması və məcburi köçkünlərin öz evlərinə qayıtmasına və həyatlarını təhlükəsiz şəkildə bərpa etməsinə imkan yaratmaq üçün çox vacibdir”.

Əlbəttə ki, ABŞ-ın Azərbaycanın minalardan təmizləmə işini təkbaşına yerinə yetirməməli olduğunu anlaması və bu xüsusda maliyyə yardımı göstərməsi müsbət bir addımdır. Bəs, bu vəsait 4.5 milyona yaxın minalarla örtülü olan ərazilərin təmizlənməsinə nə qədər kömək olacaq, vəsait hansı istiqamətdə istifadə ediləcək?

Hərbi Ekspert Ədalət Verdiyev “Yeni Azərbaycan”a açıqlamasında bildirib ki, ayrılan vəsaitin cəmi 2 milyon dollardan ibarət olması təəssüf doğurur: “ABŞ yaxşı anlayır ki, minatəmizləmə nə qədər uzun müddət tələb edən və təhlükəli prosesdir. Ona görə də ayrılan 2 milyon dollar nisbətən az məbləğdir. Ümid edirik ki, bu vəsait yaxın perspektivdə ən azı bir neçə dəfə artırılacaq. Nəzərə alsaq ki, ANAMA və onunla birgə ərazilərimizin minalardan təmizlənməsində iştirak edən şirkətlər bu bölgələrin tamamilə təmizlənməsi üçün 100 milyonlarla dollar vəsaitə ehtiyac duyur. O zaman bu məbləğin nə qədər kiçik bir rəqəm olduğunu da aşkar şəkildə görə bilərik. Bu məbləğ, sadəcə kiçik bir ərazinin təmizlənməsi üçün kifayətdir”.

Paylaş:

Baxılıb: 638 dəfə