Ukraynaya Aİ yolu göründü

Bakı:

26 °C

47 %

1 m/s

Əlaqə

AZ RU EN

Ana səhifə / Xəbər lenti / Ukraynaya Aİ yolu göründü

Ukraynaya Aİ yolu göründü

24.06.2022 [10:35]

Rəsmi Kiyev İttifaqa üzv ola biləcəkmi?

Nicat PAŞA

Köhnə qitənin siyasi paytaxtı Brüsseldə Aİ liderlərinin ikigünlük sammiti öz işinə başlayıb. 23-24 iyun tarixlərində reallaşan sammitdə ən prioritet məsələlərdən biri də Ukraynanın Aİ-yə üzvlüyə namizədlik statusunun verilməsidir. Başqa sözlə, sammitin əsas müzakirə mövzusu Ukrayna, Moldova və Gürcüstanın üzvlük müraciətləridir. Ukrayna üçün yeni statusunu itirməmək və prosedurun növbəti mərhələsinə keçmək üçün yerinə yetirməli olduğu yeddi tələb irəli sürülüb.

Qeyd edək ki, rəsmi Kiyev Aİ-yə üzvlük üçün hələ bir neçə ay bundan öncə - fevralın 28-də müraciət etmişdi. İyunun 17-də isə Avropa Komissiyası məsələ ilə bağlı öz rəyini dərc edib və orada Ukraynanın Avropa perspektivinin tanınmasını, ona birliyə üzv olmaq üçün namizəd statusunun verilməsini tövsiyə edib. Aİ namizədlərlə rəsmi danışıqların Avropa Komissiyasının üzvlük müraciətləri ilə bağlı rəylərində göstərilən şərtlərin yerinə yetirilməsindən sonra başlanacağını bildirib.

Bununla bağlı Ukrayna Baş nazirinin Avropa və Avro-Atlantik inteqrasiya üzrə müavini Olqa Stefanişina deyib ki, ölkəsi Aİ üzvlüyünə namizədlik statusunu əldə etmək üçün Avropa Komissiyasının tövsiyələrini bu ilin sonuna kimi yerinə yetirməyi planlaşdırır. Avropa Komissiyasının sədri Ursula fon der Leyen isə Avropa dövlətlərinin liderlərini Ukraynaya namizəd ölkə statusunun verilməsi haqqında gözlənilən qərarla bağlı tarixi məsuliyyəti öz üzərlərinə götürməyə çağırıb. Onun sözlərinə görə, Ukrayna, Moldova və Gürcüstanın nə qədər irəli gedəcəyi və hansı sürətlə irəliləyəcəyi, ilk növbədə, onların hərəkətlərindən və tərəqqisindən asılı olacaq. “Amma onların istək və tərəqqisinə necə cavab verəcəyimiz yalnız və yalnız bizim seçimimizdir. Bu haqda yüksək səslə və aydın şəkildə danışılıb. İndi qərar qəbul edilməli və tarixi məsuliyyət yerinə yetirilməlidir”, - Avropa Komissiyasının sədri bildirib.

Digər maraqlı məqam Gürcüstanla bağlıdır. Belə ki, parlamentin “Xalqın xidmətçisi” fraksiyasının rəhbəri David Araxamia Gürcüstanın Baş naziri İrakli Qaribaşvilini yalan danışmaqda ittiham edib. Buna səbəb isə guya Tbilisiyə Aİ üzvlüyünə namizəd statusunun verməsinin qarşısının Araxamiyanın aldığını iddia etməsidir: “Bu yaxınlarda AŞPA-nın iclasında çıxış edən Qaribaşvili bildirib ki, guya mən Avropa və ABŞ-a səfər edərək Gürcüstanın Aİ üzvlüyünə namizədliyinin qeydə alınmasına mane olmuşam. Birincisi, Araxamiya Avropada deyildi. İkincisi, o, ABŞ-da konkret olaraq İvanişvilinin Rusiya planı əsasında ortaya çıxan oliqarx olması ilə bağlı konsepsiyasını əsaslandırmaqla məşğul olub”.

Araxamiya əlavə edib ki, Ukrayna hakimiyyəti “Gürcüstana Avropa Birliyinə üzv olmaq üçün maksimum kömək edəcək”.

Avropa Komissiyasının qərarına görə, Gürcüstanda demokratiyanın durumu Kopenhagen kriteriyalarına cavab vermir və Gürcüstan dövləti bu statusu əldə etmək üçün dəyişikliklər həyata keçirməlidir.

Paylaş:

Baxılıb: 642 dəfə